غرب دونیاسیندا عرب اولکه لرینده اولان دئوریلیشلری « عرب باهاری» آدلاندیریب ، سوزده دئموکراسی نین عرب دونیاسینا باشلانقیجی کیمی ده یه رلندیریرلر. آمما تاسوفله بو دئوریلیشلر آرزو ائیله ن لرین عکسینه گئرییه قاییدیش دیر. سئکولئر ـ لاییک لیک و چاغداشلیغی ایسلامچی لیقلا ده ییشمک دئمکدیر. دئوریلیشه سبب اولان بو توپلوملاردا اولان زوراکیلیقلار ـ چتین لیکلر « پروبلملر» چوزولمه میش ، عکسینه یئنی چتین لیکلرده اونلارا آرتیریلماقدادیر. چاغداش شکیلده یاشاماق ایسته ین، اولکه نین آیدین و بیلیکلی اینسانلاری نین بیر بولومو اولکه نی ترک ائدیب غرب اولکه لرینده یاشاماق زوروندا قالیرلار ، اولکه نین گلیشمه سی اوچون لازیم اولان بو شخصیلرین گئتمه سی بو اولکه لرین ان بویوک ایتیردیی سرمایادیر.

تونئس دن سونرا خصوصیله میصریده موسلمان قارداشلاری نین « اخوان المسلمین»حاکمیتی اله آلماسی بو منفی گلیشمه نین گوسترگه سیدیر. تاسوفله توپلومدا چوخلوغون دینی اینانجا آشیری باغلیلیغی ، اولکه ده ایقتیصادی تعادولون اولماماسی دینی فاناتیزمی اوزو ایله گتیرمکده دیر. محمد مورسی جنابلاری نین اولکه نین پرئزیدئنتی سئچیلمه سی ، سوزده اوزونو دئموکرات کیمی گوسترمه یه چالیشماسی ، ایران آدلانان یئرده خمئینی رئژیمی نین حاکمییته گتیریلمه سینی خاطیرلادیر. سون هفته لرده بو یئنی حاکمییتین ایرانلا موناسیبتلرینی ده رینلشدیره جه یینی ووقولاماسی ، اونا یاخین چئوره لرین میصرین گله جک پایتختی نین« قودس» اولاجاغینی حاقدا اولان سوز ـ صحبتلر اوره ک آچیجی دئییلدیر. چونکی خمئینی رئژیمیده قودوسون یولو کربلادان کئچ ه ر دئمکله ۸ ایللیک بیر ساواشی ایران آدلانان یئرده یاشاماق زوروندا اولان میللتلره تحمیل ائده ره ک یاریم میلیون اینسانین اولومو ، و بیر او قده رده اینساین ساقات اولماسینا گتیریب چیخارتدی. بو جینایتکار رئژیم ساواشی باهانا ائده ره ک بوتون موخالیفلرینی یوخ ائتمه یه چالیشدی. اومید ائدیریک بو فاجیعه میصریده تیکرارلانماسین . میصریده ایندیکی حالدا هله لیک اوردو باشچیلاری ایپلرین اوجونو اوز الینده توتماقدادیر. آمما مورسی حاکمیتی اوز یئرین برکیدیب ، جیدی بیر دوروم اورتایا چیخدیقدا دینه باغلی سیراوی وطنداشلارین اوشاقلاری اولان عسگرلرین اوردو باشچیلاری نین بویوروقلارینی قئید ـ شرطسیز ایجرا ائدیب ، ائتمیه جکلری اوستونده دورولاجاق نوقطه لرده ن بیری ساییلیر. هر حالدا منطقه ده ایران آدلانان یئرده ن سونرا میصریده ده اونا اوخشار بیر رئژیمین ایش باشینا گلمه سی اوره ک آچیجی دئییلدیر. تاسوفله منطقه ده ایره لیجی ، دئموکرات اوصوللارینا آرخالانان ، ۷۰ ایللیک سئکولئر و لاییک حوکومتی اولان تورکییه ده ده فوقول ـ کیراواتلی دینچی لرحاکمییتی اله کئچیرمیشدیر. بو حاکمییت اوزونده ن بو قونشو اولکه ده دینی فاناتیزمه تمایوللر آرتماقدادیر. میصریده اولان بو گلیشمه لرده تئز ـ گئج اوز حقیقی اوزونو گوستره جکدیر. آمما اومید ائدیریک کی، غربین تمطراقلا تبلیغاتینی ائتدییی « عرب باهاری » عر ب میللتلری نین فاجیعه سی اولماسین .

واحید مستقیل آذربایجان جبهه سی

جارچی نومره