گونئی آذربایجان قورتولوش پارتیاسینین گونئیین میللی حاکمیتینین ۶۷-جی ایل دؤنومو ایله باغلی بیلدیریشی!
ایستکلی میللتیمیز!
وطنیمیزین گونئی بؤلومونده قورولان میللی دؤولتین ۶۷-جی ایل دؤنومو ارفسیندییک. تورک اولوسونا سورکلی دوشمن بیچیلن روسیه، اینگیلتره بیر داها اوموز-اوموزا وئرهرک آزادلیق یانقیسی میللتیمیزی فلاکت و اسارت چمبرینه سوردولر. بو ایکی سؤمورگچی دؤولتین یانیندا یئرلشن آبد ایسه، اؤز چیخارلاری اوغروندا پانفارسیست رئژیمین علینی اولمازین جینایتلر تؤرتمک اوچون آچیق قویدو. ۲-جی دونیا ساواشینین قالیب دؤولتلرین یئنی رقابت آشاماسینین ایلک قوربانلیغی محض آذربایجان اولدو. ۳۰-دان ۵۰ میندک تخمین ائدیلن تورک اینسان، چئشیدلی جینایت یوللاری ایله اؤلدو. یوز مینلرجه قوزئیه، اورتا آسیایا، سیبیره و ایران آدلانان اؤلکهنین تام گونئی بؤلگهلرینه قاچدی و یا سورگون دوشدو. کاپیتالیزمیله سوسیالیزمین ساواشدان سونراکی ایلک ایشبیرلیک آنلاشماسی ایمضاسی وطنیمیزین قارا تالئی اوزرینه آتیلدی. بیر میللتین آلینیازیسی، یاشام آرزوسو و آزاد اینسان توپلوسو چابالاری سؤمورگچی گوجلرین ایدئولوژیک و گؤوده گؤسترمه یاریشینین کوس-باریش مئیدانیندا بلیرلندی. اوزده کاپیتالیزمیدن فرقیلی گؤرونن، ۲۰-جی یوزیللیگین ایلک ایللریندن امک، اینسان، برابرلیک، میللی حاق و بو کیمی شعارلارلا اینسانلارین اینامینی اوزرینه چکن سووئت کوممونیزمینین کیرلی، یالانچی و آلدادیجی اوزو آذربایجانین گونئیینده اؤزونو گؤسترمیش اولدو. بیر آنلاملا، ۲۱ آذر آدی ایله باشلانمیش بیر ایللیک گونئی آیاقلانماسی لیدئرلیگیندن تام آشاغیسینا قدر بولشوویزمین و سووئتیزمین ایدئولوژیک اویونونا گلدی!
ایلدیریم خیزی ایله، آذربایجانین میللی-سیاسی آلانینا اؤز دامغاسینی ووران “آذربایجان دئموکرات فیرقهسی”، ائله همن سرعتله ده “آذربایجان میللی حاکیمیتی” قوردو! م. ج. پیشه ورینین اؤندرلیگینده یارانان ۲۱-آذر حرکاتی آز بیر زامان ایچینده اولوسوموزون اومود قایناغینا چئوریلدی. سیاسال و سوسیال قالخیشما گئچه-گوندوز کند و شهرلرده حیاتا کئچدی. اینسان آزادلیغی و اینسان حاقلاری تمهلی آتیلماغا باشلادی. میللی حاکمیتین وئردیگی هر هانسی بیر شعار میلیونلار تورکون طرفیندن منیمسندی. فارسچی رئژیمین ۱۹۲۵-جی ایلده ایشباشینا گلمهسیله، اولمازین میللی تحقیرلره قاتلانان اولوسوموزون یاریمجیق اولسا بئله اؤز میللی گوجو اوزرینده دورماق حسابلاری گوندمه گلدی. آنجاق نه یازیق کی، سووئتیزمین قورشونلو هاواسی آلتیندا اینلهین قوزئیلی لیدئرلریله بیرلیکده روس دوشونجه سیستئمی زئهنیتی چمبرینده دونیاسینی دارالدان گونئیلی باشچیلارین گرچک گوجو کرملینین دئولرینین علینده سیخیشیب قالدی!
آذربایجانین قوزئیینین زنگین یاتاقلارینا، ایستراتئژیک دورومونا چوخ اؤنجهدن (۱۸۲۸) ال قویموش روس ایمپئریالیزمی، بو دفعه گونئیین قیزیل مؤوقئیینه، توکنمز وارینا گؤز دیکمیشدیر. روس ایستراتئژیسینه گؤره، بوسفور بوغازی و کنگر کورفزینین ایدارهسینی اله کئچیرمک اوچون سووئتچی سولچولوغون یاییلماسی گرکیر. چونکی، ۲۰-جی یوزیللیگین یئنی شرطلرینه گؤره، ایدئولوژیک قالیبیت اولمادان اوبیئکتیو مالیکیتین آنلامی قالمامیشدیر. آتاتورک اؤندرلیگیندکی یئنی تورکیهنین روسیه و آوروپا اوزرینده بؤیوک قورتولوش ظفری و آردیجا ایکینجی دونیا ساواشینداکی طرفسیز دورومو روسلارین پلانینی یوخ ائتمیشدیر. بو اوزدن، روسیه لیدئرلری اوچون، تورکیه لیدئرلیگی کاپیتالیزمه باغلی، سوسیالیزم دوشمنی کیمی رئکلام اولور و تانیملانیردیر. روسلار اوچون بوسفور بوغازینین التاپمازیلیغی کنگر کورفزینین گرکلیگینی قات-قات آرتیرمیشدیر. ایکینجی دونیا ساواشی، سووئت رئژیمی اوچون بیر فورصت اولسا دا، اینگیلتره و آمئریکانین ایران آدلانان دؤولت اراضیسینی ایشغال ائتمهسی خوشا گلمز بیر باش بلاسی اولموشدور.
گونئیده فارسچی فاشیزمین بویوندوروغوندان قورتولوش آیاقلانماسینین گوندن گونه درینلشمهسی، گونئیله قوزئیین آراسیندا اولان باغلارین مؤهکملشمهسی آمئریکا و اینگیلتره کیمی روسیه کوممونیستلرینی ده تدیرگین ائتمیشدیر. چونکی، مسکو اوچون بیرلشیک و یا سوبیئکتیو و اوبیئکتیو بنزری ایکی آذربایجانین تهلوکه آلانا چئوریلمهسی هئچ ده اوکرایندان آز گؤرونموردو. بوندان علاوه، روسلارینی هر ایکی آذربایجانلا تورکیه آراسیندا اولان ائتنیکسل، تاریخسل، کولتورل و دیل باغلاری راحتسیز ائدیردی. ۱۹۳۷-۴۱ ایللرینده قوزئی آذربایجاندا باشوئرن قانلی آنتیتورکچولوک ائتنوسیست سیاستلری سونوجوندا ۱۰ مینلرجه آذربایجان تورکچو آیدین، دوشونور هلاک اولور و تورک آنلاییشی آذربایجان حیاتیندان قالخیر. تورکیه مدئلی آیفبا لغو اولونور. بوتون درسلیکلرده اولان تورک سؤزلوکلری دئییشیر. یئنی سووئت آذربایجان خالقی تئوریسی یئنی میللی کیملیک اولاراق میللت اوزرینه آشیلانیر. اؤلکهنین ایدارهسی بوتونلوکله آنتی تورکچولوک ائییتیمی آلمیش شخصلرین الینه وئریلیر. روسیه دؤولتی، اؤزونون میللی اریتمه سیاستیله آذربایجانلا تورکیه آراسیندا اولان دوغال باغلارین یوخ اولماسینا چالیشیر. حتی بو سیاست گونئیده ده بوتون خیزلا ایرهلی گئدیردی. روسلارین ائتگیسی آلتیندا قالان گونئیلی لیدئرلر هر آددیم باشی آنکارانی گونئیین بیرینجی و حتی بیر چوخ حاللاردا تئهران شووینیزمیندن بئله، تهلوکهلی دوشمنی کیمی رئکلام ائدیردیلر. حال بو کی، او گونکو آنکارا سیاستینده گونئیله باغلی سادهجه اولاسی خبرلر در اولونوردو. روسلار اوچون تورکیه بیر تورک اؤلکهسی اولدوغو اوچون دوشمن ساییلیردی. لاکین، گونئی و قوزئی لیدئرلرینه گؤره، تورکیهنین دوشمن و یا دوست گؤرونمهسی اوچون مسکونین ایزنی گرکیردی. کرملینین اوچون، بونون کئچری بیر باسقی اولماسی و آذربایجان تورکلرینین بیر آیارا گلمهسیله زییفلنمهسی قاچیریلماز ایدی. بو اوزدن، گونئی آذربایجانین باغیمسیز دؤولت اولماسی ایله روسلارین ایللرجه ایستراتئژیسی یاواش-یاواش آرادان قالخابیلر. قوزئی قونشو بو حسابلاری ائدرکن آمئریکا و اینگیلترهنین ده اؤز سؤمورگچی سیاستلری وار ایدی.
بئله بیر دونیا گوجلری قارماشاسیندا گونئی اؤز قوتسال تالئینی آختاریردی. اورتادا اولان اؤزگور و باغیمسیز میللی دوشونجه بوشلوغو، سووئتیزم سولچولوغونا درین باغلیلیق، یؤنتیمده گؤز قاماشدیران ائییتیم چاتیشمامازلیغی، روسلارین گیزلی اویونو و آرخادا گیزلیین زهرلی خنجر سیاستی، سلاحسیز-پاراسیز میللی حاکمیت، آمئریکا و اینگیلترهنین تام ساوونماسیندا اولان مرکزی شووینیست فارسچی دؤولت وب. انگللر آراسیندا قالان بیر میللتین آلینیازیسی! بونلار، ۱۹۴۵-۴۶ ایللرینده آذربایجان میللی حکومتینین گرچکلری ایدی. او گون، آددا و شوعاردا میللی حرکات کیمی اورتایا قویولان سووئت آزربایجانچیلیق گرچکلری قوزئیده سوررکن گونئیین قان دنیزینده بوغولاراق قوندارما، آنتیتورک و اؤزگهلیک اولدوغونو گؤسترمیش اولدو. بیر الیالین اولوس، سووئتیزمین آنتیتورک سیاستی بالتالاری آلتیندا یئردن قالخامادی. میللی حرکات فیکیر قارماشاسی ایچینده اؤز دوغما تورکلوگونو بولماقدان آجیز قالدی. فیرقهنین آلتی آی ایچینده سورکلی موقع دییشمهسی، آردی-آردینا سیاسی مانوورلارا ال وورماسی، ائله بو چاشباشلیقدان ایرهلی گلیردی. بیر ایل بویونجا آنکارانی قانلی دوشمن اعلان ائدن فیرقه باشچیلاری، روسلارین آیی دوستلوغونو گؤرونجه، دونیایا آچیلماق اوچون امنیت شوراسینین و آنکارانین قاپیسینی دؤیمهیه جسارت تاپدی. آنجاق، داها اویون بیتمیشدی. اینگیلتره، آبد و روسیه دؤولتلرینین ایشبیرلیگی ایله “آتوم بومباسی، شومال نفتی و بو کیمی” ایشغال سسئناریولاری یازیلمیشدیر.
گونئی آذربایجان قورتولوش پارتیاسی، هر زامان اولدوغو کیمی میللتچی گنجلیگیمیزین “گلهجک بیزیمدیر!” قوتسال میللی آرزولارینین دوزگون یؤنلمهسی اوچون آچیق سؤزلو، دوغرویا دوغرو، یالنیشا-یالنیش اولدوغونو چکینمهدن اورتایا قویموش و بوندان سونرا دا، دوشوندوگو دوغرو یولدان ساپمایاجاقدیر. گاقپ اؤزونون ۲۰-ایللیک فعالیت دؤنمینده یوزلرجه بلگه و ندنه دایاناراق “آذربایجان دئموکرات فیرقهسی”نین میللی باغیملی (تورکچو) اولماق یئرینه سوسیالیزم باغیملی اولدوغونو دوشونجه فلاکتی کیمی دیرلندیرمیشدیر. و دوشونجه فلاکتیندن تؤرهدیلهجک اوبیئکتیو چؤکوشون قاچیریلمازلیغینین آلتینی چیزهرک “آذربایجان میللی حرکاتی”نین میلیونلارجا تورکچو میللتچیلرینی اویارمیش و اویارماقدادیر.
گاقپ-نا گؤره، آذربایجان میللی حرکاتینین بئیین و اومورقاسینی تورکچولوک اؤزولو اولوشدورور. هر هانسی باهانا و سیاسال گؤروشلریله بو اولوشوما قارشی چیخماق کسینلیکله “آذربایجان تورک میللتی”له دوشمنچیلییه قالخماق دئمکدیر.
۲۱ آذر-ده آخان ۱۰ مینلرجه شهید قانی یئرده قالمایاجاق!
یاشاسین آذربایجان تورکلوگو!
محو اولسون فاشیست فارسچی رئژیم!
گونئی آذربایجان قورتولوش پارتیاسی
یؤنتیم قورولو