ایران اطلاعاتی نین ان چوخ فایدالاندیغی ایستیراتژی لریدن بیری گونئی آزربایجان میلی حرکتی ایچینه نفوذ ائدرک میلی شخصیت لر و میلی گروه لاری شانتاژ ائتمکدیر.

اؤزللیکله سون ایللرده میلی حرکتیمیزین موفقیتلری آرتدیقجا بو شانتاژلار داها دا گئنیشله ییبدیر. ایللر بویدور کی ایران اطلاعاتی بو ترفند ایله میلی حرکت فعاللاری و میلی گروه لاری بیر بیرینین قارشیسینا قویوب بو حرکتی ایچدن پارچالاماغا چالیشیبدیر.

ایرانین امنیت سرویسلری وار اولان اختیلافلاردان ایستیفاده ائدرک بیر چوخ معلومات توپلاییب داها سونرا بو بیلگیلری میلی حرکت علیه ینده ایشلدیبدیر. بونو توتوقلانان بیر چوخ میلی حرکت فعالی بازجویی زامانلاریندا تجربه ائدیب لر.

بوآرادا تاسفله بیر سیرا میلی فعال بیلرک یا بیلمه یرک ایران اطلاعاتی نین بو اویونونا آلت اولوب اطلاعاتین بو شانتاژ پروژه سینه یاردیم ائدیرلر. اؤزلرینی میلی حرکتین محوری و قییمی گؤرن بو اینسانلار ایشلری ایله ایران استخباراتینین دگیرمانینا سو تؤکورلر. بو یازیدا بیزیم مقصودوموز بو شخصلر دیر. اونلار کی اؤزلرینی میلی حرکت منسوبی بیلیرلر اما باشقا میلی فعاللار و تشکوللری شانتاژ ائتمکده شونیستلردن و امنیت سرویسلریندن داها ایرلی گئدیرلر، سانکی بونلارین دوشمانلاری فارس شوونیزمی یوخ بلکه دیگر میلی فعال و تشکیلاتلاردیر. بو سؤزده دوستلار ایشلری ایله اطلاعاتین یولونو صافالتماقدادیرلار.

آزربایجان میلی دیرنیش تشکیلاتی اولاراق ایلک دفعه اولاراق و ایسته مه دن بیر سیرا مسله لری آچماق مجبورییتیندییک. تاسف له ایللردیر صبیرلی داورانمامیز و بیر چوخ مسله نی خوش گؤرو ایله قارشیلامامیز فایدا ائتمه ییب و شانتاژلار آرتاراق دوام ائدیبدیر. اونون اوچون دن مجبوراً اورک سؤزوموزو اؤرتولو ده اولسا ملتیمیزله پایلاشمالی اولموشوق.

ایللردیر تشکیلاتیمیز بیر سیرا تخریباتلارلا قارشی قارشیادیر کی گویا؛

- دیرنیش اطلاعاتین قوردوغو بیر تشکیلات دیر!

- دیرنیشی اطلاعات فیلان تشکیلاتا قارشی قوروبدور!

- فیلان شخص و یا فیلان جریانا اولان بوتون تخریباتلار دیرنیش تشکیلاتی نین اویونودور!

- دیرنیش ندن اؤز مرکزی شوراسی نین آدلارینی اعلان ائتمیر؟

- ندن دیرنیش میلی شهیدلر و تاریخی میلی شخصیت لریمیزی مصادره ائدیر؟

- ندن دیرنیش ملتین اؤز مقدراتینی تعیین ائتمک حاقینی مدافعه ائدیر؟

- ندن دیرنیش قارا آی اولدوزلو میلی سیمگه نی مدافعه ائدیر؟

- دیرنیشین قیرمیزی رنگی ساوونماغا حاقی یوخدور!

- دیرنیش باتی آزربایجاندا تروریزم مسئله سیندن سوء ایستیفاده ائدیر!

- دیرنیش چالیشیر گونئی آزربایجان اؤیرنجی حرکاتی نی مصادره ائتسین!

- دیرنیشین مجموعه سینده چالیشان اینترنت سایتلاری انحصارچیلیق ائدیرلر!

- دیرنیش گونئیده کئچیریلن آکسییالاری مصادره ائدیر!

- ندن دیرنیش عضو لری خییابانی اعتراضلاردا شیرکت ائتمیرلر؟

- ندن دیرنیش اینترنت سایتلاریندا بیر سیرا میلی فعاللارین آدینی بایکوت ائتمگه چالیشیر؟

- دیرنیش تورکیه استخباراتینین یاراتدیغی بیر تشکیلاتدیر!

- ندن دیرنیش تورکجه یازدیغی زامان لاتین الفبادان ایستفاده ائدیر؟

- ندن دیرنیشین بیلدیریلری فارسجادیر؟

- …

سون زامانلاردا ایسه بیر سیرا دایاز دوشونن شخص لر داها دا ایرلی گئدیب خیاللارینجا دیرنیش تشکیلاتینا منسوب اینسانلارین آدلارینی آچیقلاییب دیرنیشه خیالی چارتلار چکیب داغیدیرلار. بو ایشلرینی ایسه بئله آچیقلاییرلار کی گویا “دیرنیش میلی حرکتی اینحیرافا چکیر، بو اوزدن بو تشکیلاتین عضولرینی ایفشا ائتمک میلی وظیفه دیر!!!” بو جاهیل اینسالار ان آجیماسیز و ان اخلاقسیز یول ایله گویا دیرنیش منسوبلارینی منفعل ائتمک ایسته ییر لر! بیر حالدا کی آدینی یایاراق سرنوشتی ایله اوینادیقلاری شخصلرین بیر چوخونون اصلینده دیرنیش ایله هئچ بیر باغی یوخدور.

بیز آزربایجان میلتی نین محضرینده بو اینسانلاردان سوروشماق ایسته ییریک؛ دیرنیش تشکیلاتین هانسی عملی میلی حرکتی اینحیرافا چکیر؟ اینحراف نه دیر و دوغرو سادجه سیزین دوشوندوگونوز مو؟ منحرفلری! ایفشا ائتمکله ویجدانینیز راحات می؟ ظن ائتمه ییرسینیز کی بیر زامان مجبور اولارسینیز ملت و تاریخ قارشیسیندا جواب وئره سینیز؟ دیرنیش یوخ اولارسا سیز نه قازاناجاقسینیز؟

بیز بیلمه ییریک کی آزربایجانین و میلی حرکتین هانسی پارچاسی بو اینسانلارین شخصی مولکودور، آما بونو یاخشی بیلیرک کی اگر بیر گون دیرنیش عضولری فارس شوونیزمینین الی ایله ازیلرسه بیر سونراکی قوربانلار ائله بو شخصلر اولاجاقلار.

گرچکدن اگر دیرنیش او قدر تشکیلاتلی و گوجلودور کی گونئی آزربایجانین بوتون اولایلارینا تاثیر قویور بس ندن سئوینمه ییرسینیز کی ایللر سونرا آزربایجاندا بو پتانسیلده بیر تشکیلات یارانیب دیر کی بو قدر ایش گؤره بیلمک قابلیتینه صاحیبدیر؟

بو شانتاژچی لار دیرنیش تشکیلاتی نین هر سی دی سی یا نشریه سی یایینلاندیقدان سونرا و یا هانسی سا بیر ائتکینلیکدن سونرا اورتایا چیخیب وامصیبتا هارایی چکیرلر کی ای وای دیرنیش حرکتی مصادره ائتدی.بو اینسانلار آنلایا بیلمیرلر کی دیرنیش تشکیلاتی میلی حرکتین ایچیندن چیخان و ایچینده اولان ارگانیزه بیر تشکیلاتدیر و بو اوزدن میلی حرکتین آیریلماز پارچاسی دیر. بو اینسانلار ایسته سه لر ده ایسته مه سه لر ده دیرنیش فعالیتلرینی قاباغا آپاراجاقدیر و سونوج اولاراق تاثیرینی قویاجاقدیر. چونکو دیرنیش تشکیلاتی سون نفرینه قدر وطن و میلت یولونون مجاهیدی دیر، عهدی آزربایجان تورک میللتی ایله دیر و بئله یئللر ایله ده یئریندن اوینایان دئگیل دیر.

آزربایجان میلی دیرنیش تشکیلاتی یارانیشیندان بری گیزلی متدلارلا مبارزه ائتمگه باشلامیشدی آنجاق ۲۰۱۱-ینجی ایلده یاری گیزلی مبارزه یه گئچرک خاریج قولونون بیر قیسمینی عموما معرفی ائتدی. یالنیز تشکیلاتیمیز گیزلی اولماغینا باخمایاراق بوتون حادیثه لرده شفاف صورتده اؤز باخیشی نی ایستر بیلدیری واسیطه سی ایله اولسون ایسترسه ده تحلیلی یازیلار واسیطه سی ایله آزربایجان تورک میللتینه سونوبدور. بیز هئچ بیر زامان سهودن ایراق اولدوغوموزو ادعا ائتمیریک اما ان آزیندان هر زامان دیالوگ قاپیسینی آچیق ساخلاماغا چالیشمیشیق.چونکو یانلیشلیقلارین دوزلدیلمه سی اوچون دیالوگون اؤنملی بیر وسیله اولدوغونا اینانیریق. آما تاسفله بو گون میلی حرکتین آدی آلتیندا چالیشان بیر سیرا اینسانلار بو دیالگون یارانماسینا بئله حاضیر اولماییبلار. دیرنیش تشکیلاتی اینانیر کی بو جور مسله لری سس سیز و سکونت ایچینده حل ائتمک ان دوغرو یولدور و بونون اوچون ده چالیشیبدیر کی میلی حرکتین معتمد و آغ ساققاللاری واسیطه سی ایله بو جدللره سون قویسون اما یازیقلار اولسون کی باشاریلی اولماییبدیر و تخریباتچی حرکتلره مانع اولا بیلمه ییبدیر. آزربایجان میلی دیرنیش تشکیلاتی یئترینجه ایمکانلارا صاحیب اولماسینا باخمایاراق هئچ بیر زامان بو اینسانلارلا اؤزلری کیمی داورانمایاجاقدیر او اوزدن کی بو شخص لر کیمی داورانماغی یانلیش حئساب ائدیر و بیلیر کی تاریخ یانلیشلاری عفو ائتمز.

گؤرونن اودور کی کئچمیشده بیر چوخ فعال و تشکیلاتلارا امنیتی سورونلار یارادان بو تخریباتلار هله سورون یاراتماغا دوام ائدجکلر. بو اوزدن آزربایجان میلی دیرنیش تشکیلاتی بو اینسانلارا اویاری وئریرکی دیگر میلی فعاللاری شانتاژ ائدرک میلی حرکته یوخ بلکه بالعکس اطلاعاتا فایدا وئریرسینیز. بیز بو ظننیده ییک کی بو شانتاژچی شخص لرین اخلاقیاتدان اوزاق ایشلری دیرنیش تشکیلاتی نی امنیتی سورونلارلا اوز به اوز ائده جکدیر اونون اوچون بو شخصلری اویاریریق کی میلی حرکتی شخصی تصفیه حئسابلار فضاسینا چئوریمه یین و تاریخین درسلرینی اونوتمایین. بیر زامان توده حیزبی ده حاکیمیته یاخینلاشاراق باشقا رقیب گروه لارین عضولرینی و تیمی ائولرینی ایفشا ائدیردی آنجاق حاکمیت تثبیت اولاندان سونرا و توده حیزبی ایله ایشی بیتندن سونرا هرنه دن اؤنجه توده حیزبی نی تصفیه ائتدی. بو اوزدن باشقا میللتلرین آجیلارینا بنزر آجیلاری بیر داها دا آزربایجان میللتینه چکدیرمه یین و گلین قارداشجاسینا بو قوتلو یولدا بیرلیک ده حرکت ائتمکله آزربایجان میللتینین آزادلیق ائلچی لری اولاق.

بیز بو بیلدیرینی بیر اتمامی حجت اولاراق گؤروب اومود ائدیریک کی بو شخص لر شانتاژلارینا سون وئررک نه اؤزلرینی نه ده بیزی اولدو بیتدی ایله اوز اوزه قویماسینلار چونکو او شرطلرده دوستلار دئگیل دوشمنلر سئوینجکدیر.

آزربایجان میلی دیرنیش تشکیلاتی نین مرکزی شوراسی

گونئی آزربایجان

۱۵٫۱۰٫۱۳۹۱