8 مارت 1857-جي ايل اولايلاريندان 150 ايلدن آرتيق اؤتسه ده، بير چوخ آوروپا اؤلکه لرينده، نيسبي اولاراق اينسان حاقلارينا سايغي و حؤرمتله ياناشيرلار. اينسان حاقلاري نين تملي اولان قادين حاقلارينا، داها دوغروسو آنا حاقلارينا دير وئريب، قادينلارين موباريزه لري نين باشلانغيج گونو کيمي 8 مارتي کوتلاييرلار.

آوروپادا حاکيم اولان نيسبي اينسان حاقلارينا باخماياراق، قادينلارا اولان حاقسيزليغين شاهيدي اولوروق. بو گون اينسان حاقلاري اوزره هر گون، هر آي توپلانتيلار، سئمينارلار کئچيريليرسه ده، قادينلار يئنه ده آوروپانين گؤبگينده آيري سئچکيلييه و ظولمه معروض قاليرلار. آوروپادا دوروم بئله آجيناجاقليديرسا، ايران کيمي گئري قالميش اؤلکه لرده قادي نين يئري هارادادير؟

اينسان حاقلاريني قورويان اورقانلار هله ده قادينلارا قارشي حاقسيزليغين مؤوجود اولدوغونو و آوروپادا قادينا آيري سئچکيليگين هر چئشيدي نين حاکيم اولدوغونو اعتيراف ائتمکده ديرلر.

گئري قالميش ايراندا قادين حاقلاري آنلامي يوخدور! ايرانين گئري قافالي کئچميش شاهي بير موصاحيبه سينده حيات يولداشي فرح ديبانين يانيندا قادينلارين عاغيلسيز اولدوغونو ديله گتيرير. هر کسه معلومدور کي، ايرانين بو گونکو، حاکيملري نين کئچميش شاهدان هئچ بير فرقي يوخدور! شاهي دا، شئيخي ده عئيني دوشلري داشيماقداديرلار!

ايران آدلانان اؤلکه ده يازيقلار اولسون تورک قاديني دا عئيني حاقسيزليقلارا معروض قالير، باخماياراق کي، تورک قاديني تورک تاريخينده ائرککلره ائشيت شکليده بوتون حاقلارا يييلنميشدي. 1918-جي ايلده آذربايجاندا قادينلارا سس وئرمه، هابئله سئچيب-سئچيلمه حوقوقو وئريلميشدير. حالبوکي، ايسوئچ کيمي اؤلکه آذربايجاندان ايللر سونرا بئله بير قرارا ايمضا آتير!

فارسلارين چوخ اؤيوندوکلري فيردوسي بوتون دونيادا شؤهرت قازانميش، ان مشهور اثري اولان شاهنامه پوئماسيندا ايتي بئله قاديندان اوستون توتور.

آنجاق تورک مدنيتينده، تاريخينده بئله بير يازييا راست گلمک ايمکانسيزدير. عکسينه تورک خالقلاري نين يازيلي آبيده سي اولان « دده قورقود» داستانلاريندا قادينلارين قيلينج چالماسي، آت چاپماسي، ياي چکيب اوخ آتماسي، اوو اوولاماسي، ائولنديگي ارله گولش و دؤيوشو... تورک مدنيتينده قادي نين يوکسک مؤوقئعييني و ايجتيماعي-سياسي حقوقونو نوماييش ائتديرير.

آذربايجانين تاريخ بويو اوزلشديگي اولايلاردا، ايجتيماعي-سياسي و کولتورل ديرلرينده قادينلار کيشيلردن هئچ ده گئري قالماياراق ياخيندان ايشتيراک ائتميشلر. اؤرنک اوچون کور اوغلو داستانيندا کور اوغلونون خانيمي اولان خودکار پاشانين قيزي نيگار خانيم دار و چتين گونلرينده کور اوغلو ايله چيگين- چيگينه ووروشموش، هابئله قاچاق نبي داستانيندا نبي نين حيات يولداشي هجر خانيم ايگيدليک، قوچاقليق، سئوگي، وفا و صداقت سيمگه سي کيمي گؤستريلير و ائل ديلينده، هابئله شاعيرلر و يازارلار طرفيندن آلقيشلانميشدي.