آذربایجان اوُره گ آغریسی ایله خوجالی سوُی قیریمینین 21 ینجی ایل دوُنومونو قئید ائدیر.

آذربایجان تورک میللتی ، سوُن 200 ایلده یعنی وطنیمیزین مستمعلکه چی روسیه دوُولتی نین ایشغالینا معروض قالیب پارچالانماسیندان سوُنرا ، بوُبوک تاریخی فاجعه لر، دهشتلی جینایت لر و وحشی سوُی قیریم لارین شاهیدی اوُلموشدور.

1991 ـ ینجی ایلین فئورالین (فوریه) 25 دن 26 ـ سینا کئچئن گئجه ، آذربایجانین سیویل ودینج اهالی سینه قارشی 20 ـ ینجی یوز ایلده ، همده دوُنیا ایجتماعییتی قارشی سیندا اوُز اوُ خصوصی قددارلیغی وآغیلا سیغمییان جینایت لرله ائرمنی لرطرفیندن توُره دیلن "خوجالی سوُی قیریمینی" ،باشیمیزا گئتیریلن وهئچ زامان قان یادداشتیمیزدان سیلینمه ین بودهشتلی جینایت لرین أن فاجعه لی سیندن بیری اوُلموشدور.

بوفاجعه لرین قایناغی و اوُنون باشلیجا سببی ، ارمنی لرین روسیه دوُولتی طرفیندن ایشغال اوُلموش توُرپاق لاریمیزا کوُچورولوب یئرلئشدیریلمه سی اوُلموشدور.                   خوجالی شهری 7000 نفره یاخین نفوذو ایله قاراباغ ویلایتی نین مرکزی اوُلان خان کئندی ایله عسکران آراسیندا آذربایجان تورکلری نین یاشادیقی کیچیک بیر شئهر اوُلموشدور. آنجاق ، خوجالی اوُز اوُنئملی استراتژیک موقعینه گوُره ، ائله جه ده قارا باغین تکجه هاوا آلانی نین بو شئهرده یئرلئشدیی سببی ایله چوُخ بوُیوک اهمییته مالیک اوُلموشدور. بو نئدنله ائرمنی لرطرفیندن آلینماسی واوُز توُرک اهالیسیندن تامامیله تمیزلئنیب یوُخ ائدیلمه سی واجیب و حئیاتی مسئله یه چئوریلمیشدیر.

" خوجالی سوُی قیریمی " بیرباشا سوُویت حکومتی نین گوُستریشی و اوُنون قوُنارما ائرمنستان دوُولتی و قاراباغدا اوُلان ائرمنی سیلاحلی دسته لری ایله ایش بیرلیی، داها دوُغروسو اوُرتاق حربی عملییات لاری نتیجه سینده حئیاتا کئچیریلمیشدیر.

چوُنکی ، اگرروسلارین خان کئندی یاخینلیغیندا یئرلئشئن وآغیرسیلاح ، حربی تخنیکایا مالیک اوُلان 366 ـ ینجی آلایی نین بو قانلی هجومدا ، ائرمنی سیلاحلی دسته لری نین اوُنونده ویانیندا اوُلماسئیدی ، اوُنلارهئچ زامان بئله بیر هجومون باشلاماسینا جورعت و بئله بیر بوُیوک سوُی قیریمین حئیاتا کئچیرمه سینه قادیراوُلا بیلمزدیلر. بوگوُن بشرییت تاریخینین قانلی صحیفه لریندن بیرینی تشکیل ائدن خوجالی سوُی قیریمیندان 21 ایل کئچسه ده ، هئله ده دوُنیا ایجتیماعییتی ، ائله جه ده BMT ، آوروپا شوراسی ، آروپا پارلامنتی و بیر چوُخ قوروملارطرفیندن اوُزونه لایق اوُلان حقوقی دئیئری آلا بیلمه میشدیر، باخمییاراق کی ، سوُن ایللرده بو مسئله بیرچوُخ اوُلکه لرین پارلامنت لری طرفیندن بشرییته قارشی بوُیوک بیرجینایت و سوُی قیریم کیمی تانینمیشدیر.

گوُنئی آذربایجان سوسیال دمکرات پارتیسی ، بو عدالت سیزلییه سوُن وئرمئگ اوُچون دینیندن ، دیلیندن ، رنگیندن ، سیاسی دوُشونجه وعقیده سیندن آسیلی اوُلمییاراق بوُتون ویجدانلی اینسانلارا اوُز توتاراق ، اوُنلاری قاتیل و جانیلرین یانیندا یوُخ ، بئلکه حاق و عدالتین یانیندا اوُلمالارینا چاغیریر. بیز قوزئی آذربایجان حکومتی نیندن بو مسئله اوُلدوقجا جیددی و بو سوُی قیریمین دوُنیا سویه سینده رسمییته تانینماسیندا داها دا فعال اوُلماسینی ایسته یریک . ائله جه ده ، بیز خاریجده یاشییان بوُتون آذربایجانلیلاری و گوُنئی آذربایجانین سیاسی پارتی و قوروملارینی هئرساحه ده اوُلدوقو کیمی ، بو حاق دادا جیددی اوُلماقا واوُرتاق ایش بیرلیینه چاغیریریق .

گوُنئی آذربایجان سوسیال دموکرات پارتیسی ، ائرمنی لرین تجاوزو ایشغالچیلیق سیاستی نتیجه سینده 30000 دن آرتیق گوُناهسیز اینسانلاریمیزین قاراباغدا ، اوُزللیکله خوجالی سوُی قیریمیندا جانلارینی قوربان وئرن سوُی داشلاریمیزین قارشیسیندا باش أیئرئک عزیزخاطیره لرینی سایغی ایله یاد ائدیر، و شهید عائله لری باشدا اوُلماقلا بوُتون توُرک میللتیمیزه باش ساغلیغی دئیر.

عشق اوُلسون قاراباغ ساواشیندا دئیئرلی جانلارین فدا ائدن بوُتون قهرمانلاریمیزا !

ایشغالچی ائرمنستان دوُولتی ، آذربایجان توُرپاقلاری نین ایشغالینا سوُن وئرمه لی دیر!

25 / 2 / 2013