بؤلگه‌ده کی دئییشیک‌لیک‌لر و اولای‌لار لا باغلی گوناسکامین آیلیق یازیسی
یاخلاشیق 3 آیدیر بؤلگه‌ده جیدی دئییشیک‌لیک‌لر و اولای‌لار باش وئرمکده‌دیر. تونیس و مصر ایله باشلایان اولای‌لار بؤلگه‌نین باشقا اؤلکه‌لرینه سیچرایا‌راق بؤلگه نی یئنی بیر دؤنمه گؤتورمکده‌دیر.
بو اولای‌لار و دئییشیم‌لر ایران’ی دا ایچینه آلا‌راق، ایران’داکی سسسیزلشن موخالیفتی یئنی‌دن حرکته کئچیرمیش‌دیر. شوبهه یوخ‌دور کی بؤلگه‌دکی اولای‌لار و دئییشیک‌لیک‌لر ایستر ایستمز ایران’ی و گونئی آذربایجان’ی دا اؤز تأثیری آلتینا آلا‌جاق‌دیر. گوناسکام’ین بو آیلیق یازی‌سیندا، بؤلگه‌دکی اولای‌لاردان آلاجاغیمز تجروبه و اولای‌لارین قیسسا آنالیزی وئریله‌جک‌دیر.
بیلدیگینیز کیمی بؤلگه‌دکی دئییشیک‌لیک‌لر نتیجه‌سینده دیکتاتؤرلرین تخت‌لری گئت گئده دئورویلمکده‌دیر. آرتیق بؤلگه‌نین اینسان‌لاری اؤز مقددراتینی اللرینه آلماق اوچون آیاقلانیب عصیان بایراغینی چکیرلر. گونئی آذربایجان میللی حرکتی و توپلومو اولا‌راق بو اولای‌لاردان آلاجاغیمیز و تجروبه ائدجییمیز نکته‌لری آشاغیداکی شکیلده خلاصه ائدبیلریک:
۱ -بؤلگه اینسان‌لاری اؤز مقددراتینی تعیین ائتمک اوچون حرکته کئچمیش‌لردیر. آرتیق بؤلگه یئنی بیر دؤنمه باشلاماقدا‌دیر. بو اولای‌لار و دئییشم‌لر بونو گؤرستدی کی، اگر بیر توپلوم ایسته‌سه اؤلکه‌سینده دئییشیکلیک ائله‌سین بونو باشارابیلر. موجاده‌له یولارینی دوغرو بیر شکیلده ایزلدیگی زامان البته کی نتیجه آلا‌جاق‌دیر.
۲- دئوریم‌لرین (اینقیلاب‌لارین) زامانی توکنیب‌دیر دئین‌لر، بؤلگه‌ده نئجه بیر دئوریم‌لر گرچکلشدیگینی شاهیدی اولدولار. بوگونه قدر بیزیم حرکتی تکجه ائوریمسل(تکامولی) اولا‌راق گؤرن‌لره بو بؤیوک بیر درس اولا‌راق گؤروله بیلر. البته کی آذربایجان میللی حرکتی سورجینی ائوریم اولا‌راق یاشاماقدا‌دیر. آما بو ائوریمی تکجه دئوریم ایله نتیجه‌لن‌دیرمک مومکون‌دور. بیز بیرچوخ شئیی دئییش‌دیرمک ایستیریک. آوروپا 16 اینجی یوز ایلده آیدینلانمایا باشلامیش و 18 اینجی یوز ایلده فرانسا دئوریمی ایله ائوریمینی نتیجلندیرمیش‌دیر.
۳- توپلوم‌لار نه ایسته‌سه او اولا‌جاق‌دیر. بؤلگه‌نین اولوسلاراراسی شرایطین اولماماسی تکجه بیر انگل اولا‌راق توپلوم‌لارین حرکت ائتمه مه‌سینی ایستمکده‌دیرلر. “بوگون بیزیم ایستیقلالیمیزی بؤلگه و دونیا اؤلکه‌لری ایستمز اونون اوچون بیز باشاریلی اولابیلمریک” سؤزو، گونوموزدکی گرچک‌لشن اولای‌لار ایله گئچرلی‌لیگینی ایتیرمیش‌دیر. مصر اولای‌لاریندا ایلک باشدا باتی و آمریکا موبا‌رک-ه دستک وئرسه ده، داها سونرا توپلومون موجاده‌له‌سینی و ایسته یینی گؤردوک‌دن سونرا گئری آدیم آتتیب و آیاق‌لانان‌لاری دستکلمیشدی‌لر. بیز اؤزوموزو دونایایا نئجه ایفاده ائتسک، دونیا او شکیلده بیزی قبول ائده‌جک‌دیر.
۴- گونوموزدکی تئکنولوژینین گلیشیمی نتیجه‌سینده آرتیق موجاده‌له شکیل‌لری ده دئییشمکده‌دیر. کلاسیک موجاده‌له یولو اولان، رهبریت مسئله‌سی کی آذربایجان میللی حرکتینده ده بیر موشکول اولا‌راق گؤرونمکده‌دیر، آرتیق اعتبارینی الدن وئریر. آرتیق رهبر و لیدئرلر، تئکنولوژینی بیلن، اونو موجاده‌له یولوندا ایشلدبیلن گنج‌لردیرلر. اونون اوچون بوگون بیز ده میللی حرکت سورجیمیزده بیزی موشکول ائدن و قاباغا گئتمه‌میزین قارشی‌سیندا بیر انگل اولان مسئله‌لری آشمامیز گرکیر.
۵- بؤلگه‌ده گئدن سیاسی و توپلومسال دئییشیک‌لیک‌لر ایستر ایستمز ایران’ی دا اؤز تأثیری آلتینا آلا‌جاق‌دیر. آذربایجان میللی حرکتی اولا‌راق بو دئییشیم‌دکی یئریمیزی ایندی‌دن بلیرلمه‌میز لازیم‌دیر. بو تأثیرین بیزیم حرکته اولا‌جاق تأثیرلرینی اینجه‌لمه‌میز گرکیر. اؤنم‌لی اولان دا ایندی‌دن حاضرلیق‌لی اولمالیییق.
گله‌جک گوناسکام آیلیق یازی‌سیندا گونئی آذربایجان میللی حرکتی و ایران’دا دوام ائدن یئشیل حرکت آراسینداکی ایلیشکی و بیزیم نه شکیلده حرکت ائدجییمیز حاقیندا فیکیرلریمی اورتایا قویاجاییق.
