اؤزتچه: گوئنی آذربایجان ۲۲ مای اومومی اعتراضلارینین ۵-اینجی ایلدؤنومو
سای: ۵۳۹/ ۲۰۱۱
ایلایگون: ۱۹ می ۲۰۱۱
ب.م.ت، اینسان حاقلاری عذره آلی کومیسسارلیق، جنوره؛ لطفاً بو قئیدیاتی آشاغیداکی قروپلارا چاتدیرین:
* اؤز-خوشونا توتوقلانما عذره چالیشان قروپ
* بیان و فیکیر سربستلیگینین ایرلیلییشی و قورونماسی عذره اؤزل راپورتئر
* چاغداش ایرقچیلیک، ایرقی آیری-سچکیلیک و یادد-ائللیلره قارشی قاتلاشمازلیق عذره اؤزل راپورتر
* میللی آزلیقلار عذره موستقیل متخصص
* قاضیلارین و وکیللرین باغیمسیزلیغی عذره اؤزل راپورتر
اوزو دایک بی، و خانیم هاریسون، آمنئستی اینتئرناشنال، لوندون
هابئله بان کی موون ، ب.م.ت گئنئل سئکرئتئری و اینسان حاقلارینی گؤزتن و اینسان حاقلارینا قوللوقچو
سایین جنابلار
اؤزتچه: گوئنی آذربایجان ۲۲ مای اومومی اعتراضلارینین ۵-اینجی ایلدؤنومو.
۲۰۱۰-دا اؤز-خوشونا توتوقلامالار ۳۶ ساعتدا بیر نفر-ایدیسه ۲۰۱۱-ده هر ۲۴ ساعتدا بیر نفردیر!
مای ۲۰۰۶ اومومی اعتراضلارینین ۵-اینجی ایلدؤنومو اؤنجهسی رئگیمین باسقیلاری بو اؤزتچهنین دقت مرکزیندهدیر کی، بو اعتراضلار گونئی آذربایجانلیلار طرفیندن ایران یئتکیلیلرینین ایرقچی توتوملارینا قارشی یؤندیلمیشدی. ایندی گونئی آذربایجاندا بو ایلدؤنوم اوچون بؤیوک حاضرلیق گئدیر و ایران یئتکیلیلری بیر باشقا اؤز-خوشونا قددارلیق گؤسترهرک قارشیسینی آلماغا چالیشیرلار.
بو اؤزتچه قایغیلی دقتنیزه چاتدیریر کی، ایران یئتکیلیلری ایرقچی توتوملاری ایله گونئی آذربایجانی موستملکچیلییه چئویریب و اهالینی تحقیره معروض ائدیرلر. ایران آدلانان اؤلکهده آزربایجانین گونئی بؤلمهسی ایله باغلی معلوماتلار، چئشیتلی موناسیبتلره گؤره دفعهلرله هوزورلاریزا تقدیم ائدیلمیشدیر. قاباقکی ایلتیشمهلرین قاپسامیندا گئدن بیلگی ایجمالی بونلارا شامیلدیر. ایراندا یاشایان ۳۰ میلیون آذربایجانلینین آنا دیلینده بیر صینیف مکبینین اولماماسی و آنا دیلینده مکتب طلبی ایله دئموکراتیک موباریزه آپاران گنجلریمیزین باشینا گلنلری بوگونه قدر گئنیش شکیلده تقدیم ائتمیشیک. میللی وارلیغیمیزین تالانماسی، اقتصادی آیری سئچکیلیک و چئشیتلی آسیمیلاسیون سیاستلریندن وئردیگیمیز معلوماتلارین قوولوقلاریزدا اولماسی آیدیندیر. ایش اورایا چاتیب کی، گونئی آذربایجانینین چئوره و یاشیللیغینا ائدیلن تجاووزو اؤنلمک طلبینده اولان گنجلریمیزی توتوب زیندانلارا سالیرلار (باخ:سایی ۵۳۸/۲۰۱۱، تاریخ ۳۰ آپریل ۲۰۱۱ و سایی ۵۲۶، تاریخ ۱۵.۰۵.۲۰۱۰ مکتوبلارینا). اوندان داها دا آجیناجاقلیسی، حتی ایسپور و ایدمان ساحهسینده ده، تئهران هاکیمیتینین فارس ایرقچی و راسیست دوشونجهسینین تضییق واسطهلرینین بویوتلاری گئتدیکجه آرتیر و اؤز چیرکین اوزونو داها آچیق گؤسترمهیه باشلامیشدیر ( باخ: اومومی ایلتیشمه ۵ ، سایی ۵۱۶/۲۰۰۹، تاریخ ۳.۰۶.۲۰۰۹).
راسیزمین بوتون بو باسقیلارینین قارشیسیندا جانا گلمیش میللتیمیز، بو گئدیشاتا یوخ دئمک اوچون گونئی آزربایجانین باش کندی ساییلان تبریز شهریندن باشلییاراق، بیر هفته ایچینده بوتون اؤلکهمیزی بوروین دئموکراتیک تزاهورات باشلاتدی و میلیونلار اینسان اونا قوشولدو( باخ: سایی ۳۲۵/ ۲۰۰۶، تاریخ ۲۶.۰۵.۰۶ مراجعتینه). خالقیمیز، آپاردیغی دئموکراتک موباریزهده، بئینالخالق حقوق و اینسان حاقلاری چرچیوهسینده باریشجیل اصوللارا دایاناراق اؤز میللی هقلارینی طلب ائتمکدهدیر. بونولا بئله، او دیرچلیشده ۱۵ نفرین شهید اولدوغونو، ۲۰۰ نفرین یارالاندیغینی، ۲۰۰۰ نفره یاخین توتوقلانیب زیندانا سالیندیغینی و ۱۰.۰۰۰ نفره ساختا دوسیلارارین دوزلدیگینی فاکتلارلا یازیب سیزه چاتدیرمیشدیق. اونون اوچودور کی، هر ایل، مکتبلر آچیلان گون، آنا دیلی گونو، چؤل گونو کیمی گونلرده و حاقسیزیلیقلا اوزلشدیکلری فوتبول موسابیقهلرینده خالقیمیز، اومومی اعتراض آکسیالاری گئچیرمک یولونو سئچمیشدیر. آنجاق فاشیست تفککورلو تئهران هاکیمیتی، داخیلیندکی فارسچی شووینیست قوهلره قوشولاراق ، آدی چکیلن تزاهورات گونلرینه آز قالمیش، اؤز هوجوملارینی باشلادیر و خالقیمیزی قورخودماق اوچون آسدی-کسدی سیایستینی گوجلندیریر. بوتون بو میللی مقاومتین ان یوکسک نوقتهسینده دایانان ۲۲ مای قیامینین بئشینجی ایل دؤنومونون گونئی آذربایجاندا قئید ائدیلمهسی اوچون خالقیمیز قوللارینی چیرمالامیش و اؤز اعتراض سسینی یوکسلتمهیه هازیلانماقدادیر. آنجاق، تئهرانین پولیس قوهلری، گونلر و حتی آیلار قالا، گنجلریمیزی توتوقلاماغا، محکمهیه چکمهیه و زیندانلارا سالماغا باشلامیشدیر.
بیز، ۲۲ مایی اؤنلمک اوچون سون گونلر توتولانلاردان بعضی نومونهلری آشاغیدا هوزورلاریزا تقدیم ائدیریک. سیزدن و دونیاداکی بوتون دئموکرات اینسان و قوروملاردان، اینسان حیاتینا اؤنم وئرن بوتون بئینالخالق تشکیلاتلاردان ایسرارلا خاهیچ ائدیریک کی، بو ظلمون قارشیسینی آلماق اوچون الیزدن گلکنی اسیرگمییهسیز. جدول ۱-ده بعضی توتولانلارین آدلارینی وئرهرک بیلدیرمک ایستییریک کی، گئچن ایل سیزه گؤندردیگیمیز ایستایستیکه اساساً هر ۳۶ ساعتدا بیر زیندانیمیز اولدوغو حالدا، بو ایلین باشلانگیجیندان بری بو سایی هر ۲۴ ساعتدا بیر کلفچلنمهیه دؤنوشموشدور.
بو ۵-اینجی ایلدؤنومون ارفهسینده سیزه مراجعت ائدهرک، کامپانیا آپارمانیزی خاهیش ائدیریک. گونئی آذربایجانلیلارین میللی و اینسان حاقلارینی ساوونماق اوچون دئموکراتیک تزاهوراتلاری دستکلیسینیز، یوخسا ایران یئتکیلیلری بو سوکوتدان جسارت قازانا بیلر. ایران دؤولتینه باسقیلاریزی آرتیرماقلا یاناشی، طرفسیز نمایندهلری گونئی آذربایجانا گؤندرهرک، بو قئیری اینسانی داورانیشی اؤنلهییب، گنجلریمیزین قوللارینداکی زنجیرلرین آچیلماسینا یاردیمچی اولاسیز. بیزجه بو ان ائتگین تدبیردیر کی، اؤلکهده ائتنیک میللتلره قارشی یورودولن ایرقچیلیگی تنبئه ائده بیلر. بیزجه بو کیمی میسسیا اولماسا، ایرانداکی ایرقچیلیک داهادا کؤروکلنهجکدیر. بونون قارشیسینی آلماق اوچون سیزلرین موداخیلهسی ان بؤیوک خیدمت اولاجاقدی.
قایغینیز اوچون میننتداریق.
حؤرمتله
بویوک رسولوغلو
دونیا آذربایجانلیلارینین حاقلارینی مدافعه کومیتهسینین صدری