نوامبرین 25 ای آذر آیی نین دوردونجو گونو "قادین لارا قارشی خشونت یا زوراکیلیغا سون وئرمک" گونودور

1370 اینجی ایلدن بری؛  آذر آیینین دورد یا بئشینجی گونو

 بیرلشمیش؛ میللتلر تشکیلاتی طرفیندن ؛دونیادا قادینلارا قارشی زوراکیلیغا سون  وئرمک ؛گونو آدلاندیریلدی بو آدلاندیرمانین سببی نه ایدی؟

1339 جی ایلده "دومینیکن " دیکتاتورلوغونا قارشی سیاسی موباریزه ائدن "میرابال باجیلاری"آدیندا؛ اوچ باجی دومینیکن دیکتاتورلوغو طرفیندن فجیع شکیلده اولدورولدو.دومینیکن جمهوریتینین او زامانکی دیکتاتورلوغو بو اوچ سیاسی موباریز باجینین؛  قارشیسینی آلماق اوچون اونلاری شکنجه ائدرک قتل ائتدی.

 بو آجی  اولای  ؛دونیادا سسلندیکدن سونرا؛ بو فاجیعه نین ایل دونومو؛ دونیادا "قادین لارا قارشی زوراکیلیغا سون وئرمک گونو" اولاراق تانیندی. بیرلشمیش میلتلر تشکیلاتینین تانیمینا  گوره: "قادینلارا قارشی زوراکیلیق"قادینلارا فیزیکی جینسی و روحی ضررلره سبب اولان هر جوره  داورانیشلارا شامیل اولور.

بو مسئله  دین؛دیل؛وکولتور دن آسیلی اولمایاراق؛ دونیانین هر بیر نوقطه سینده یاشایان قادینلار اوچون قئید اولونوبدور و  بین الخالق اینسانلیق مسئله سیدیر.

قادینلارا قارشی زوراکیلیق یا خشونت فقط قادینلاری اولدورمک و دویمک له محدود اولمور؛بلکه چوخ بویوتلو و گئنیش بیر مسئله دیر.مثال اوچون قادینی اجتماع دا یا ائوده تهدید ائتمک

 ؛آزادلیغینی  قیسیتلاماق

قیز اوشاقلارینی کیچیک یاشدا ائولنمه گه مجبور ائلمک

اجباری گئییم یا حیجاب

 و بئله نچی تبعیضلر هامیسی زوراکیلیق ساییلیر. /

.

 عینی حالدا، قادین‌لارین بعضی ساحه‌لرده ایشلمک‌لرینی یاساقلاماق، یاشاییش یئرینی سئچمکده سربست اولماماق‌لاری و حتی مجبوری شکیلده سفر اوچون آتا یا ائش لریندن ایزین مجبوریتی ده زوراکی‌لیغین اویقولانماسیدیر.

 او توپلوم‌لاردا کی؛ ائولی کیشی‌لره نئچه ائشلی‌لیک یا چند همسری ویا موقت ایزدیواج بیر حاق کیمی قبول ائدیلیر، ار بیر طرف‌لی اولا‌راق بوشاما حاقینا صاحیبدیر و اوشاق‌لارین قییوم‌لوغو تکجه آتایا وئریلیر، قادین‌ دایمی اولا‌راق ایسترئس و روحی چتین‌لیک‌لرله باش-باشا اولور.   قادینین بدنی ویا شعورونو آشاغیلاما ایچریک لی دئیم لر، زوراکیلیغین دیگر میصداقی‌دیر. بو نؤع زوراکی‌لیق‌لار موختلیف ایجتیماعی موحیط‌لرده، عائله اورتامی، ایش یئری، اوخوللاردا ...  اوزونو گؤستریر.

ایران ؛ بیرلشمیش میللتلر تشکیلاتیندا تصویب اولان قادینا قارشی زوراکیلیغا سون وئرمک "بیلدیرگه سینی؛ ایمضالاسادا؛ نه یازیق کی ایرانین رسمی قانونلاریندا قادینلارا زوراکیلیق و خشونت مشروع لاشدیریلیب .عئینی حالدا قادینلارا جیسمی و روحی اولاراق ضرر وئرن بیر چوخ غیر انسانی قانون یئرلشدیریلیب و اویقولانیر/

قادینلاری ارککلره گوره ایکینجی درجه اینسان سایان بو قانونلاردا؛ قادین فقط" قادین "اولدوغو اوچون یعنی جینسیتی اوچون حاقلاریندان محروم قالیر یا دا تبعیضه دایالی بیر سیستمین ایچریسینده ازیلیر.

تبعیضه دایالی بو "قانونی لشمیش" خشونتلری ایران قانون و مقرراتیندا گورمک چوخ قولای دیر:

 قادینلارا ایجباری حیجاب ؛ایش محدودیتلری ؛بوشانما و حضانت قانونلاریندا قادینلارا اولان حاقسیزلیق لار؛قادینلارین ارککلره گوره یاری ایرثیه حاققی ؛قادین دییه سینین ارکگین یاریسیجا اولماسی ؛قادینین شاهیدلیک اعتیباررینین ارککلرین یاریسیجا اولماسی؛و بیر چوخ بئله نچی قانون؛ قادینلاری اینسان اولاراق دییل ؛بلکه ارککلردن داها آز حاقلارا مالیک اولان ایکینجی جینس ساییر.

ایران قانونلارینا گوره  بیرینجی درجه اینسان حاقلارینا صاحاب اولماغا حاققی اولمایان قادینلار دونیایا گلدیکلری لحظه دن خشونته وتبعیضه حاضیرلانمالیدیرلار/ایران ایداره سیستمینین؛آنتی آذربایجان-آنتی تورک سیاستی نتیجه سینده گونئی آذربایجان قادینلاری فارس قادینلارا گوره ده؛ داها آز حاقلارا مالیکدیرلرگونئی آذربایجان قادینلاری؛.اقتصادی سیاسی و اجتماعی تبعیضلره محکوم اولان ؛بیر خالقا عایید اولدوقلاری اوچون بوتون بو تبعیضلر آذربایجان قادینلارینین اجتماعی حایاتیندا تاثیرین قویور چونکو هم هویتلریندن دولایی هم جینسیتلریندن دولایی زوراکیلیق و خشونتین آماجیندا اولان بیر شراییط ده دونیایا گلیرلر.

اقتصادی و اجتماعی موشکوللر ان چوخ قادینلار و اوشاقلارین حایاتیندا اوز منفی تاثیرلرین گورسدر و ائله بو مسئله آذربایجان قادینلارینین داها چوخ و آغیر زوراکیلیق شرایطده یاشاماسینا سبب اولور.

گونئی آذربایجان تاریخینده ؛ بویوک قادینلار یئتیشیب آدلاری و ایزلری تاریخده قالیجی اولوبدور.

زئینب پاشالار؛ مشروطه قادینلاری؛ موجاهید قادینلار؛ یازار ؛موباریز صنعت چی بویوک قادینلار بو جامیعه ده یئتیشیب ؛بوتون جامیعه نین فخر سببی اولوبلار.

اونوتمایاق کی  تبریز ده قورولان بیر ایللیک آذربایجان  میللی  حکومتی سیراسیندا ایران دا؛ ایلک دفعه قادینلارا سئچیم حاققی وئریلیب دیر.آما نه یازیق کی  بئله بیر زنگین تاریخه صاحاب اولان گونئی آذربایجاندا ؛هله ده جامیعه ؛ایچینده قادینلارا قارشی حقارت و خشونت داشییان بعضی مسئله لره شاهیدیک .ایران گئریچی (عقب مانده)و قادینا قارشی تبعیضچی سیاستی قادینا قارشی اولان یازیلمامیش آما اویقولانان تبعیض و خشونتی ده درینلشدیریب دیر.

دئییم و دانیشیقلاردا هله ده راییج اولان بعضی جنسیت چی فیکیرلر عادت حالینا گلدیگی اوچون دیققته آلینماسادا قادینا قارشی زوراکیلیق کولتورونون کوکلرینی گوجلندیره بیلر.  مثلن "قیزینی دویمه ین دیزینی دویر"یا "قیز اوزگه مالیدیر"کیمی دئییم لر یا خئیر دووالاردا: "آللاه اوغلونو ساخلاسین""آللاه اوغول تویو قیسمت ائلسین " کیمی دوعالار و قیز اوشاغی اوستوندن بو دووالارین اولماماسی بیر جوره جینسیت چی لیک  و ارکگی قادیندان اوستون توتوب حتی قادینی احتماعی بیر بیرئی(فرد)کیمی یوخ سایان بعضی  عادتلرین  ایزلریدیر.هله ده آغیز عادتی اوزوندن ده اولسا بیر قادینی تعریف له ینده" کیشی کیمین خانیم دیر "دئمک یا جسارتلی خانیملار اوچون " کیشی صفت قادین" دئییمینی چوخ ائشیدیریک. یا حتی هردن داها دا ایلری گئدیب  ارککلری آشاغیلاماق اوچون  "  آرواد کیمی" دئییم لر ایشلدیلیر.بو دئییم لر نه قدر راییج اولسادا قادینلاری حقیر گورن بیر فیکیردن قایناقلانان دئییملردیر. قادینین جیتسیتینه آشاغی باخماق اونون جیسمی اوستوندن تحقیره یول آچماق اینسانلیق و قابلیتلر یئرینه جینسیتی یئرلشدیرمکدیر حال بو کی ساغلام بیر توپلومدا اینسانین گوجو جینسیتینده دییل عاغلی ووجدانی و استعدادلاریندادیر.  

 هم قانونلاردا هم ده عادت لرده ؛قادینلارا قادین اولدوقلارینا گوره حقیر و ایکینجی درجه اینسان کیمی یاناشماق ؛جامیعه ده قابلیتلر واستعداد  یئرینه ؛ جینسیت؛ زوربالیق و زوراکیلیق؛ خشونت و هرجوره تبعیضه یئر حاضیرلانار.

خشونتین عادی اولدوغو جامیعه ده ؛  اونجه قادینلار و سونرادا عائیله لرو یئنی نسیللر و نهایت ده بوتون جامیعه  امنیت سیزلیک؛ استرس؛ زوربالیق  تهدیدی ایله ایچ ایچه  یاشارلار..قادینلارا اویقولانان حاقسیزلیقلار اونلاردا استرس گوجسوزلوک و آسیلیلیغا سبب اولار. دوشونجه و دانیشما و حرکت اوزگورلوگوندن محروم اولان قادینلارین اولدوغو جامیعه ؛ زوراکیلیغا دایانان قانونلار و عادتلریله اوزلشیب موشکوللری حل ائتملی دیر. گئت گئده ؛ محدودیت و خشونتلری چوخالان بیر جامیعه دئموکراسی و برابرلیگه دوغرو تک آددیم بئله آتا بیلمز.

ایرانین جینسیت چی؛ عینی حالدا آنتی آذربایجان- آنتی تورک سیاستی ده؛ ان بویوک ضربه نی قادینلارین اجتماعی اقتصادی حایاتینا وورور و بو مسئله گئت گئده قادینلارا قارشی زوراکیلیغین چوخالماسینا سبب اولور.قادینلاری روحی و جیسمی ضرر لردن قوروماق اوچون هر جوره زوراکیلیغا قارشی چیخمالیییق.آذربایجانین زنگین کولتورونده" آسلانین دیشی سی ارکگی اولماز "دیین بیر خالقین روحو حاکیم دیر.بو کولتوره صاحاب اولان بیر خالقا یاراشان دا  قادین ارکک آییرمادان  اینسانلارین قابلیت و استعدادلارینا دیر وئرمک نوقطه سینه یئتیشمک دیر.آیریجا جینسیتچی قانونلارا قارشی ساواشماق دا بوتون جامیعه نین موجادیله سی و احتیاجی دیر.بیزده بوتون دونیا ایلا بیرلیکده  قادینلارا قارشی هرجوره زوراکیلیغا سون وئریلمه گه ایناناراق  زوراکیلیغا سون قویولماسینا دوغرو جیدی  آددیم لار آتمالییق.