“بیتکین ایسنان” تانری و اینسان آدینا نیفرت یاغدیران اینسان‌لار دئییل، ماندئلادیر- ایواز طاها
ماندئلا غریبه بیر شخصیت ایدی. بعضی اوتوپیک اوخو‌للارین “بیکتین اینسان” آدلاندیردیقلاری وارلیغین سوموت، پارلاق و جانلی اؤرنه‌یی ایدی: نیفرت آلووو و قودرت توتقوسوندان کئچمه‌سن گئرچک اینسانلیغا قوووشا بیلمزسن! 28 ایل اؤز آماج‌لاری اوغروندا آپارتاید رژیمی‌نین دوستاغی اولموش پاپولیار بیر اؤنده‌رین، اؤز موخالیف‌لرینه قارشی أن سرت، أن قانلی دیوان توتماسی گؤزله‌نیلمز اولمازدی. بونا اونون هم حاققی چاتیردی، هم یئترینجه مشروعیتی واردی. آغ‌لارین آردیجیل وحشیلیک‌لرینه معروض قالمیش قارا دریلی کوتله بونو ایسته‌ییردی، آپارتاید رئژیمی‌نین اولوسلار آراسی روسوایلیغی دا بونا برائت قازاندیریردی. آمما ماندئلا باریش، سئوگی و باغیش یولونا گئتدی. ماندئلا یئر-گؤی آدینا دانیشان بیر چوخ اؤنده‌رلره باخمایاراق بوتون نیفرت‌لریندن واز کئچدی، اونا اؤلوم جزاسی کسیلمه‌سینی ایسته‌میش پروکرورلا [دادستان‌لا] اوتوروب یئمک ده یئدی. سونرا دا گوج کورسوسونو بوراخدی.
بونا خیرداجا، های‌کولو، مقام‌سئوه‌ر اینسان‌لارین گوجو یئتمز؛ بودا‌ـ‌واری چکینگنلیک سیمگه‌سی اولان ژان پول ایستر کی، واتیکان عظمتینی آرخادا قویسون، بیر ده ماندلا، بوتون دوشمن‌لره نیفرت یوخ باغیش یاغدیرسین؛ آغ‌لی قارالی بوتون ایسنان‌لار رحمت یاغیشیندا ایسلانسین. عین القضاتی آنیرام: اؤتن گئجه سئوگی یاغمیشدی، یئر ایسلانمیشدی.
بونلاری قولایجا سؤیله‌مک اولار، آمما نیفرتدن یاخا قورتارماق و گوج کورسوسوندن کؤنوللوجه چکینمک بعضن اؤلومه بویون قویماق قده‌ر چتین گؤرونور. ماندئلا اؤنمی، ماندئلا بؤیوکلویو بوندایدی. بونلارسیز اؤزگورلویون گور سسی، باریش سیمگه‌سی اولا بیلمه‌یه‌جکدی ماندئلا.
سارسینتی و حوزن‌له ماندئلانین آدی اؤنونده باش أییرم
