بیر نئچه شعرـ آلپار سولدوزلو
دیدرگین دالغا
بو پوزغون دونیادا اوزگون پریشانم نه دن؟ بیلمه م
دیدرگین دالغایام سالقاش طوفانم نه دن؟ بیلمه م
دولاشقان ساچلارین سؤیله مجاز دیر یا حقیقت دیر؟
شعربو آرقیش زولفده محکوک زیندانم نه دن؟ بیلمه م
بوتون عؤمروم گئچیب گئتدی قارینجیق لال باخیشین لا
بو سون چاغدا یئنه آماج پیکانم نه دن؟ بیلمه م
آخان گؤز یاشی تک دوشدوم گؤزوندن دوشگون آدلاندیم
اؤز اؤلکه م ده بوگون بیگانه مهمانم نه دن؟بیلمه م
گؤزتچی اولموشام اولدوزلارا اسکیل مه سین گؤی دن
من اولدوز بسله یه ن مین گؤزله گریانم نه دن؟ بیلمه م
بلا چکمیش جانیمدان سؤیله جانان ایسته کین سؤیله
جان ایسته رسه مطیع امر جانانم نه دن؟ بیلمه م
عؤمور سوردوم بونو من بیلمه دیم آخیر نه دیر سئوگی؟
دوشونسه م سئوگینی رسوای دؤورانم نه دن ؟ بیلمه م
اپریمیش حسرت- آلپار سولدوزلو
درین باخیشلارین
گؤزله ریمی قاماشدیریر
نور ساچیر
قارانلیق باغریما
باغریمین گؤزله ری
باخیشلاریندان
ایسلانیر
آستا – آستا
داملالار سیرالاشیر لار
گؤزومون ائوینده
قایناییب ، جوشوب ، داشیر لار
گؤزومون اته گینده کی حسرت توزون سیلیر له ر
شیدیرقی یاغمورلار
اوتانیرلار
گؤزله ریمین دالغالاریندان
خاطیره له ریمیزی آغلایان چاغدا
وارلیغیمیزین گوزگوسو
سایدام گؤسته ریر
گؤزله ریمده اپریمیش حسرتی
یاشام سس له ییر، چاغیریر بیزی
ایسته ر – ایسته مه ز جوت ال داملالاری گؤزله ریمدن بیر بیر دریرله ر
بیر اوزگون گولومسه دوداقلاریمدا
چیچه ک له نیر
اویموش اوره گیم
چیرپینیر
او حالدا
قارانلیق باغریندان
آیدین سحر دوغولور
دؤردلوک له ر- آلپار سولدوزلو
نئیه «من – من» دئییریک «من» یئرینه «بیز» دئیه غین
سون وئریب آیریلیغا بیرلیکی بیز ایزلی یه غین
کؤنلوموزده ن چیخاریب اؤفکه له رین گور آلووون
سئوگی نین هم باریشین بیر گئجه قاپیسین دؤیه غین
***
«قانی قانلا یوماییب لار» نه گؤزه ل سؤزدو بو سؤز
ظالیمین جهلینی عفو ائیله اونودما سوچونو
قانا قان ائتمه بو گون فایداسی یوخدور بو ایشین
سوچلونون یوخ، ظولمون باغلاگینان قول- قیچینی
***
کؤنلومو ویران ائدیب سه ن آی آدین معمار قویان
مین نفرمعمار ییغیشسا چوخ چتین دیر تعمیری
بیر یارا ووردون بو اوزگون کؤنلومه یاردین درین
مین نفر ملحم قویان اولسا چتین دیر تدبیری
***
وارلیغیم دار اوسته کیملیییم سورگون
یوردوموز تاپدانیر خالقیمیز اوزگون
دیلیمیز یاساقدیر ،اؤلکه میز پوزغون
یول بودور اویانماق- دایانماق دوزگون
***
نه گؤزه ل خاطیره دیر کؤنلومه قویموشدون آیاق
سورگون ائتدیم یوخونو تاکی قالا گؤزله ر اویاق
چیرپینان کؤنلومه اوزگون دیله ک اولموشدو دایاق
نه کؤنول بیلدی نه گؤزله ر نه زامان کؤچدو قوناق
***
آغارمیش تئل له ر ده ن سؤز آچماق یاساق
دال اولموش بئل له رده ن دانیشماق یاساق
دار گونده بیر – بیره قووشماق یاساق
سارالمیش گول له ر ده ن یاد اولماق یاساق
***
آیدین فیکیر له شیب آیدین چالیشماق
یاساقدیر یاساقدیر ایل له ر دیر یاساق
مین ایللیک اویخو دان اویانماق- دورماق
اوزگون له سورونمه ک یاساق دیر یاساق
***
بیزله ری توپراقدان ،توپراقی بیزده ن
آیریلیق سئوه ن له ر سورگون سالیب لار
بولبولو چیچه ک ده ن گولو بولبول ده ن
ایل له ر دیر قهر ایله اوزاقلادیبلار
سئوگینی کؤنول ده ن ،کؤنلو سئوگی د ه ن
آییریب آیریلیق حؤکمون یازیب لار
آنایوردوم سولدوز- آلپار سولدوزلو
آغاریر ساچلاری آنا یوردومون
قوجالیر سولدوزوم قوجامان لاشیر
اود یوردو گووه نجیم اؤنملی توپراق
اوجالیر گون به گون اوجامان لاشیر