- نوصرت! باخ بئله گئتسه، من سونوندا دلی اولاجام.

آذربایجان دئموکرات فیرقه سینین دارماداغین اولماسیندان اوچ آی گئچمیشدی. تبریزده قورولان یئنی دؤولت تمامی ایله محو اولموشدو. دؤولته باغلی اولان آداملارین چوخو، تهراندان گلن قوشونون طرفیندن توتولموشدولار. توتوقلولار دارا آسیلیب، یا دا زیندانا آتیلمیشدیلار. جانینی قورتارانلار، قاچیب ایت بات اولموشدولار. احمد معللیمین تبریزدن قاچیب، کندده کی عمیسی اوغلونون ائوینده گیزلنمه سی، اوچونجو آیا گلیب چاتمیشدی. اوچ آی بویونجو قورخوسوندان آددیمینی بئله ائودن ائشیگه آتمامیشدی.

- عمی اوغلو احمد! بیلیرم بئله گیزلی یاشاماق، سنه زیندان کیمی اولوب. آمما اؤنجه ده دئدیغیم کیمی، چاره یولوموز یوخدو. وضعیت یاخشی دئییل. کندده ناطارازین بیریسی، سنی گؤرسه خبرینی گئدیب شهرده کی شاهین مامورلارینا چاتدیرابیلر.

- آمما بوش بوشونا بو ائوده قالماق دا راحات دئییل کی نوصرت. سن گون بویونجا چؤله گئدیرسن. ائوده بیر من قالیرام، بیرده سوناپری. بو یازیق قیز جیغازدا کی نه دینیر نه ده دانیشیر.

دئییرم گل منه بیر یاخشیلیق ائله. صاباح گئت شهره، بیزیم ائودن منیم سازیمی گتیر. ان آزی اونونلا اؤزمو ائوده مشقول ائدرم.

- منیم ایکی گؤزوم اوستده عمی اوغلو. گوندوز کی اولماز. گئجه یاریسی ائویزه گئدرم، آخی کیمسه نین گؤزونه گوروشمه مه لی یم.

- ساغ اول سنی نوصرت. آل بودا ائوین آچارلاری. گئدرسن دیبده کی اوطاغا. ساندیخانایا گیررسن، یورقان دوشه یین دالیندا بیر صاندیق وار. سازیمی صاندیغین ایچینه قویموشام.

اوطاغین قاپیسی آچیلدی. سوناپری الینده بیر مئژمه یی ایله ایچری گیردی. مئژمه ییده کی ایکی چایین، بیرینی عمیسی اوغلو احمدین و اوبیریسینه ده قارداشی نوصرتین قاباغینا قویدو و سونرا دا شلته سینی ییغیشتیریب، اوطاقدان ائشی یه چیخدی. نوصرت اوجا بویلو، چاتما قاشلی باجیسینی گؤزدن گئچیردی. درین بیر آه چکدی. پاپیریز قوتوسوندان، قاباخجادان حاضیر ائتمیش پاپیریزلاردان، بیرینی چیخاردیب، آلیشتیردی.

احمد، ایللر بویو کندده کی اوشاقلیق گونلرینی نوصرت له برابر گئچیرمیشدی و اونونلا بیرلیکده چولده دووشان قووالاییب، چایدا بالیق توتموشدو. درس اوخوماق اوچون آناسی ایله بیرلیکده کنددن آیریلیب، شهره کؤچسه بئله ، هله ده اونو ایچدن نوصرته باغلایان ایپلر قوپمامیشدی. هر بیر حرکتینده نوصرتین قوصصه لرینی و شادلیقلارینی حیسس ائده بیلیردی.

اونون بو طرزی ده آه چکیب، پاپیریز یاندیرماسینین آرخاسیندا گیزلی بیر کدرین وار اولدوغونون فرقینده ایدی.

- نوصرت! دردینی تازالاماق ایستمیرم آمما، باجین سوناپری آخی نئیه بوگونه توشدو؟

نوصرت پاپیریزیندان درین بیر نفس آلدی. قالانینی دا اؤنونده کی کول تاباغی یئرینه قوللاندیغی نلبکیده سؤندوردو. باجیسی اونون سسینی ائشیتمه یه جک قدر، آلچاق بیر سسله احمده دئدی:

- عمی اوغلو! گئدک طؤوله یه، هم حایونلارا یئم وئرک هم ده بیرآز دردله شک.

آیاغا قالخدیلار. اوطاقدان چیخارکن نوصرت سسلندی:

- باجی بیز حایونلارا بیر باش چه کک. یه مه گه گؤره، ال قولون آغریماسین، سوفرانی دا ییغیشدیرابیلرسن.

سحر گونشی چیخماقدایدی. باخچاداکی ایده آغاجلارینین تازا چیچکلریندن گلن قوخو هر یئری دولدورموشدو. یئرده کی یونجالارین ساری گوللری و یارپاقلارینین اوزرینده کی گئجه دن قونان شبنملر، اینسانین آغلینی باشیندان اوچورودو.

نوصرت تویوقلاری نینلریندن ائشی یه چیخارتدی. احمد طؤوله ده کی سامان تایلاریندان بیرینی آچدی و اینکلرین قاباغینا تؤکدو. سونرا ایکی عمی اوغلو، یئرلری حایوانلارین نجیسلریندن تمیزله دیلر.

ایش قورتولاندان سونرا، طؤوله نین ائشی یینده کی داشلارین اوستونده اوتوردولار. نوصرت جیبیندن دستمالینی چیخاریب، آلنینین ترینی سیلدی و سونرا بیر پاپیریز یاندیردی.

نوصرتین سؤزلرینه قولاق آسماق اوچون اوزونو حاضیرلادی احمد. نوصرت احمدین کومه یینه گؤره اونا   "ساغول، اللین آغریماسین" دئدی و دانیشیغینا بئله باشلادی:

- تام اون بئش ایل بوندان اؤنحه ایدی. باهار گلدیگینده یام یاشیل داغین اته یینده یئرآلان کندین، قیزلی اوغلانلی بوتؤو اوشاقلاری و گئنجلرینه تازا بیر روح باغیشلار. تمیز هاوادا نفس آلان و داغین دوشونده کی رنگ به رنگ گول چیچه یی گؤرن گئنجلر، نئشه دن قودورموش حایوان کیمی جوشوب داشارلار. میشه لردن گلن سرین یئللر، نئشه دولو کند قیز اوشاقلارینین اوز گؤزلرینه دئیینجه، او سولو صوراتلاری  قیب - قیرمیزی ائدر. 

هله ده او گون یادیمدان چیخمیر. هر یئری آختارمیشدیق، سوناپریدن هئچ بیر ایز تاپابیلمه میشدیک. باهار گونلری ایدی. اؤزوندن بئش آلتی یاش بؤیوک قونشوموزون قیزی ایله مسجیدده قورآن درسی آلماغا گئتمیشدی.

قونشوموز کربلایی قاسیمین قیزی گول چؤهره دن، ازل گوندن ده منیم گؤزمه آلابولا گلردی. آمما کنددین بوش بئکار جاونلاری منیم کی کیمی فیکیر ائتمزدیلر. باشا دوشورسن دا نه دئدیغیمی؟ باهار گلنده قیز یئرینده دورابیلمزدی.

- هه آنلادیم. دئمک باهار یئلی قیزی آزدیریرمیش.

- هه، ائله لاب دئدیغین کیمی ایدی.

سوناپرینین هئچ یئرده تاپا بیلمه دیگیمیز اوچون، گئدیب گؤل چؤهره نی سیخما بوغمایا سالدیم. آز قالسین قیزا آلیمی قالدیراجاقدیم کی، کند مسجیدینین طؤوله سیندن سؤز آچدی ایتین قیزی.

- مسجیدین طؤوله سی می؟

- هه

نوصرت پاپیریزینین دیبینی یئره آتدی و آیاغینین آلتی ایله اونو سؤندوردو.

- سونرا تئز مسجیده ساری قاچدیم. طؤوله نین قاپیسینی آچدیم. ایچری گیریب سسله دیم: 

- سوناپری، سوناپری!

چاغریما هئچ بیر جاواب گلمدی.

طؤوله نین ساغ طرفته کی حئصارین آرخاسیندا، تکجه بیر اینک واریدی. طؤوله نین اوبیری قاپیسی دا آچیغیدی. آغلیم یالنیز سوناپرینین یانیندایدی، بونا گؤره ده او بیری قاپینین آچیق اولدوغونو هئچ ده اؤنمسه مه دیم. گرچی بو اؤزو اؤنملی مسئله ایدی. چونکو هئچ بیر حایوان ساخلایان کندلی، بئله بیر ائهمال کارلیق ائتمزدی. حایوانلارین اولدوغو یئرین قاب باجالارینا دیققت ائدردی. چیخیب گئتمه سیندن و ایچرییه قوردون، جاناوارین گیرمه سیندن قورخاردی. 

- سوناپری، سوناپری!

هله ده یادیمدان چیخمیر سوناپرینین او قورخو ایچینده منه دوغرو باخان باخیشلاری. سانکی بیر آز اونجه بیر ییرتیجی میشه جاناوارینین الیندن قورتولان بیریسی کیمی باخیردی منه.

ائله بیل هئچ منیم سسیمی ائشیتمیردی. ایکی الینی ده برکدن باسمیشدی ساغ قولاغینین اوستونه. قیز جیغازین، نه سسی چیخیردی، نه ده کی هئچ اولماسا بیر بالاجانا دا اولسون، حرکت ائدیردی دوردوغو یئردن. یئرینده ائله سینه قورویوب قالمیشدی.

یوز ده یوز باشینا بیر شئی گلمیشدی. بوندان امینیدیم. آمما او آن، نه باش وئردیغینا گؤره، آغلیما هئچ بیرفیکیر گلمیردی. بلکی ده اینه یه یاخینلاشیب، نئسه اولموش کی قیزا تپیک آتمیش. یقین کی بو اوزدن قورخوب، بو حالا توشموشدو.

چاره سیزلیکدن چومبلتمه اوتوردوم. یئریندن ترپنه بیلمه ین سوناپرینی بئلیمه آلدیم و ائوه ساری یولا توشدوم.

او آخشام کندده جار توشدو: 

" مشدی زئینالین قیزینی، مسجیدین طؤوله سینده کی اینک تپیکله ییب. یازیق قیز قورخودان لال اولوب، قولاغینین دا بیری توتولوب"

ایشین دوغروسو بو ایدی کی، مسجیدین طؤوله سینده او گون نه لر اولدوغونون اصلینی، هئچ کیمسه آنلامادی، آمما بیر شئیدن قورخوب و دیلی توتولماسی تمامن بللییدی. سوناپری او گوندن سونرا سوسدو آرتیق، دا دانیشابیلمه دی. ائله سوناپرینین قوصصه سیندن آنام دا تئز قوجالدی. بیر ایل سونراسی دا دونیاسینی دئییشتیردی.

نوصرت تازادان بیر پاپیریز چیخارتدی، پاپیریزلارین دمیر قوتوسوندان. کیبریتی ایله پاپیریزینی یاندیریرکن سؤزونو سوردوردو:

بئش ایل بئله گئچدی. تا کی او گونه قدر، بیر آشیق گلدی کندیمیزه. گئنج آشیق کندده گلندن سونرا، چوخ شئیلر اوز وئردی. قیش گئجه لرینده چالدیغی هاوالار قفه خانانی قیزدیراردی.  میللت هر جومه آخشامی اونون یولونو گؤزلردی. قفه خانادا بوش یئر تاپابیلمزدین او گئجه. باهار گلینجه ده، هامینین نئشه سینی ایکی قات ائدردی آشیق ارسلانین سازینین سسی.

آشیق ارسلان جومه آخشاملاری کنددین یولوندان گئچن آت آراباسیندان انیب، پیادا یولا توشردی کندده ساری. یولدا چایین قیراغیندا اوتوروب دینجه لردی و سازینی دا سسلندیرردی.  چایدا پالتار یویان کند قیزلاری دا اوزاقدان قولاق آساردیلار، گئنج آشیغین سازینا.

او کنددیمیزه گلندن سونرا سوناپری دئییشیلدی. او سولموش سونا پرینین یاناقلاری تازادان جانلاندی. جومه آخشامیلاری سحر یوخودان قالخاردی و یئرینده دورابیلمزدی. چایدا گئدیب پالتار یوماق اوچون جان آتاردی.

گونلرین بیر گونونده قیزلار چایدان قیشقیر باغیرلا بیزه گلدیلر. اوجادان قیشقیریردیلار:

- زینال عمی موشتولوغوموزو وئر. زینال عمی موشتولوغوموزو وئر.

رحمتلیک آتام سوروشدو " نه اولوب منیم قیزلاریم"

- زینال عمی! سوناپرینین دیلی آچیلدی. سونا پری دانیشدی.

باجیم آشیغی ائله سئومیشدی کی، اونون سسی، سازینین هاوالاری قیزدا مؤجیزه یارادمیشدی. قیزلارین تعریفینه گؤره، آشیق ارسلان چایین یاخینلیغیندا اوتوروب سازینی چالیرمیش. اونون سسینه حئیران قالان سوناپری، سونوندا تاب گتیرمه ییب، گئدیب یاخینلاشیب قارشیسندا اوتورموش. آشیق سازینی یئره قویاندان سونرا، سوناپری اونا دئمیش:

" آشیق نه قدر ده گؤزل چالیرسان سن"

آشیق ارسلان اوتانقاج بیریسی ایدی. اوتاندیغیندان سازینی توپلاییب، اوردان کندده قدر قاچمیشدی. اونون دالسیجادا قیزلار دا بیزیم ائوه قاچیب گلمیشدیلر. کند ایچینده بو اولای بیر مؤجیزه اولاراق سس سالدی. آشیق ارسلانینن عیززتی، حورمتی داها دا آرتدی.

او گوندن سونرا، آشیق ارسلان بیر داها چای قیراغیندا اوتوروب ساز چالمادی. قیزلار سوناپرینی آشیغین چاغریلدیغی تویلارا، ائو مجلیسلرینه آپاریردیلار. آرتیق او مجلیسلرین سایه سینده سوناپریله ارسلان داها دا چوخ بیر- بیرلرینی گؤردولر.

- عمی اوغلو نوصرت. منده خاطیرلاییرام سوناپرینین او گونلرینده کی گؤزللیگینی. ایندی دوشونورم، سنین تعریف ائتدیگین آشیق، سوناپری یه عاشیق اولماقدان باشقا چاره سی یوخوموش.

- منجه ده ائله ایمیش، عمی اوغلو احمد.

گونلرین بیرینده قاپیمیز دؤوولدو. قاپینی آچدیغیمدا آشیق ارسلان قارشیمدایدی، یاشلی بیر قادینلا برابر. رحمتلیک آتامی سسلدیم.

- آلله رحمت ائله سین

- آمین، سیزینکیلرله بئله. آتام اونلارا دئدی" بویورون ایچری. خوش گلمیسیز" ائوه گئچدیلر. سونا پری چای گتیردی، آشیغا و آناسی یاشلی قادینا. هه عمی اوغلو! آشیغین گتیردیگی حلقه نی، تاخدی بارماغینا بیزیم سوناپری. او گون نیشانلاندی ارسلانا.

 آشیق ارسلانین سازی هر هفته کند اهالیسینی بیر یئره توپلایاردی. قفه خانادا چالاردی. ائولره چاغریلاردی. چؤلده چوبانلارا چالاردی. اؤزو ده چوخ ادبلی و دوشونجه لی بیر گئنج ایدی. کیمسه نین ناموسونا کج باخمازدی. هامی دا اونون هاواسینی ساخلاردی. کند اهلی کیسه سینی بوش قویمازدیلار. هر هفته کنددن الی دولو یولا سالاردیلار.

آمما بو اولایلار هئچ ده خوشونا گئتمیردی کندیمیزین موللاسی میرررر

- نوصرت، نئیه چکینیرسن کی؟ ائله بیل کی منیم ده چوخ خوشوم گلیر میرزاعلی دن؟

- عمی اوغلو، ایسته مه دیم سنین حالینی پوزام، هر نه اولسا دا آخی میرزاعلی سنین قایناتاندی.

- منیم قایناتام اولسادا، او بیر ساتقین، شرفسیزین بیریدی.

آشیق گلندن سونرا، کند ائولریندن مرثیه، تعزیه فیلان آزالدی.

- هه ده دا، هر شئی آشکاردی. یانی میرزاعلی نین، چؤرک آغاجی کسیلدی.

- ائله ایدی عمی اوغلو. دورومو بئله گؤرن میرزاعلی، قیدیقلانماغا باشلادی.....

نوصرت سوسدو. دا دانیشابیلمه دی. احمد اونا ساری اییلدی. نوصرتین گؤزلری سولانمیشدی.

- سونرا نه اولدو عمی اوغلو نوصرت؟

آمما هله ده دانیشا بیلمیردی نوصرت. آیاغا قالخدی. طؤوله یه باش چکمه یی باهانا ائدیب، گیردی طؤوله یه. قاییداندا، بللی ایدی اوز گؤزونون یاشینی سیلمه سی. سونرا اوزگون بیر سسله دئدی:

بیر جومه سحرچاغی، چایدا بالیق توتماغا گئدن کندلیلر، آشیق ارسلانین سودا بوغولموش جنازه سینی گتیردیلر کنددین مئیدانینا.

آیاق یالین کند مئیدانینا ساری قاچیب، آشیق ارسلانین جنازه سی اوستده باش گؤزونو یولوب تؤکن سونا پرینین یاحوسئین سسی ایدی، اوندان بو گونه قدر سون ائشیدیلن سس. ارسلان نئجه کی گلدیگینده سوناپرینین دیلینی آچمیشدی، گئتدیگینده ده اونو تازادان سوسدوردو.

***

کند اهلی  میرزاعلینی، آشیق ارسلانین اؤلدوردوغونه شوبهه لنمیشدیلر.

- آمما عمی اوغلو نوصرت، ایندینین ایندیسی بئله میرزاعلی یه باخسان، اونون اون بئش ایل بوندان اؤنجه کی حالینی دا آنلارسان. منه گلیرکی او سیسقا آدام ائله گئنج یاشلاریندا دا آیاغی اوستونده دورابیلمه میزیمیش . یقین کی آشیق ارسلان اونو پوفله سئیدی، ییخیلاردی.

- سن دوز دئییرسن. او آدام اؤزو تک جانینا، صاحات بدنلی آشیق ارسلان کیمی بیریله باش ائده بیلمزیدی.

 مسجیدین "قودرت" آدیندا بیر میجؤوداری( خیدمتچی) واریدی. اوغلو "مال قولام" ایله بیرلیکده، مسجیدین حیطینده کی ائوده یاشایاردی. ارسلانین جنازه سی سودا تاپیلان گونون بیر اؤنجه کی آخشامی، چؤلدن قاییدان چوبانلارین بیریسی اوزاقدان او ایکی ده ده بالانی، داشقالارینی چایین یانیندا ساخلاییب، سویا آغیر بیر شئی آتدیقلارینی گؤرموشدو. چوبان اونلاری بو ایشلریندن جاشمیشدی. آمما ائرته سی گون ارسلانین اؤلو جنازه سی سودان تاپیلاندان سونرا، هر شئی آچیغا چیخمیشدی.

بیر نئچه گون سونرا کندلیلردن بعضیلری، داشقالاری دولو گیردکان تایلاری ایله، کنددن چیخارکن گؤرموشدولر اونلاری و او گوندن بری، بیر داها گؤزه گؤروشمه دیلر.

هامی دئییردی کی،  میرزاعلی نین اونلارا وئردیغی مسجیدین گیردکان باغینین او ایل کی حاصیلینین قارشیسیندا، آشیق ارسلانی اؤلدورموشدولر.

شوبهه لر گئت گئده آرتیردی. آرتیق میرزاعلی ده، بونون فرقینده ایدی. بیر نئچه آی سونرا کند اهالیسی طرفیندن، جانینی تهلیکه ده گؤرن موللا میرزاعلی، آروادی و کیچک قیزی ایله برابر ایت بات اولدو. تا کی نئچه ایلدن سونرا، سس صداسی شهردن گلدی. اؤزونه گؤره بتر بیر آدام اولموشدو. شهرین بؤیوک عالیملریندن بیری اولموشدو. شهرده کی میرزاعلینی سن مندن داها دا یاخشی تانیییرسان.

- نوصرت! اونون کیمی خایینلری ده، من بو سون اولایلاردا تانیمیشام. تهران ایله ال بیر اولماقلارینی دا، شاها یازدیقلاری مکتوبلاردان اؤیرندیک بیزلر. او قاتیللر، شاهین قوشونویلا بیرلیکده شهرده ناحاق یئره آخان قانلارین سببکارلاریدیلار.

ایکی عمی اوغلو آیاغا قالخدیلار. نوصرت بوغدا زمیسینه ساری یولا توشدو. احمد تازادان ائوه دؤندو.

***

گئجه نین یاریسی نوصرت شهردن قاییداندا، احمد ده یاتمیشدی، باجیسی سوناپری ده. یاواشجا احمدین ائویندن گتیردیغی سازینی و ائوینین آچارلارینی، باشینین اوستونه قویوب،  یاتماق اوچون گیردی اؤز یورقان دوشه یینین ایچینه.

ائرته سی گوندن سونرا، آزجیق دا اولسا، آرتیق احمد اؤزونو او ائوده محبوس کیمی حیسس ائتمیردی. گون بویو یئنی یولداشی، سازیلا مشقولدو. او گوندن سونرا اؤزونو داهادا موتلو حیسس ائدیردی او حبسخانا کیمی ائوده.

بیر موددت گئچدی. آمما بیر نئچه گون سونرا قریب بیر شئیین فرقینده اولدو. دیلقم هاواسینی چالدیغیندا سانکی بیرذادلار اولوردو. ایلک باشدا بونون بلکیده بیر تصادوف اولدوغونو دوشوندو. آمما سونوندا امین اولدو. هر زامان کی دیلقم هاواسینی چالیردی، یان اوطاقداکی عمی قیزیسی سونا پرینین آغلاماق سسینی ائشیدیردی. نه لر اولدوغونو آنلامیردی. آمما قراره گلدی کی بیر داها دیلقم چالماسین.

بیر گون، همشه کی کیمی گئنه  بیرلیکده سحر یئمکلرینی یئدیلر. نوصرت چؤله چیخدی. سوناپری ائو ایشلرینه باخماغا باشلادی. احمد سازینی الینه آلدی. بیر موددت چالماقلا مشقول اولدو. سوناپری گیردی اونون اوتوردوغو اوطاغا و سس سیز صداسیز اونا قولاق آسماغا باشلادی. احمد چالدیغی پارچانی بیتیردی و سوناپرییه باخدی.

بیر آن سوناپری آغزینی آچدی و دانیشدیِ:

- عمی اوغلو منیم آغلاماغیما باخما. نه اولار گئنه دیلقم چال منه.

احمدین دیل دوداغی توتولدو. نه ائده جه یینه قالمیشدی. عمی قیزیسینین دانیشماسینا اینانابیلمیردی. مات قالمیشدی، آمما سونوندا دئدی:

- تامام عمی قیزی، سن نه ایسترسن اونو چالارام. سنه منیم جانیم قوربان اولسون.

احمد دیلقم چالدی. سوناپرینین گؤزیاشلاری ایکی یاناغیندان دا آخمایا باشلادی. احمد داها دؤزه بیلمه دی.

- عمی قیزی! بیلمیرسن کی سنین سسینی ائشیتمک نئجه ده سئوینج وئریجی بیر شئیدی. آمما آخی گؤزیاشلارینا من دایانا بیلمیرم. سنی آند وئریرم زینال عمینین روحونا، نه اولار دا آغلاییب منیم اوره گیمی یاخیب یاندیرما.

سوناپری ایکی کوینه یینین قوللاریلا گؤزیاشلارینی سیلدی. آیاغا قالخیب، مطبخه گئتدی. بیرآز سونرا مئژمه ییده ایکی ایستکان چایلا اوطاغا قاییتدی. یئره اوتوروب دانیشدی:

- ارسلانین ان سئودیغی هاوایدی، دیلقم. بیزده قالدیغی گئجه لر منه چالاردی. سانکی دیلقم چالاندا، بوتون قملر، بو دونیادان سیلینیب گئدردی. آمما عمی اوغلو! ارسلان گئتدی، دیلقم ده گئتدی. یئرینی قمی قوصصه لر دولدوردو.

سوناپرینین گئنه گؤزلری دولدو.

- نوصرت منه هر شئیی آنلاتدی. ارسلانین اؤلومونو ده وسنین تازادان دلینین توتولماسینی دا.

- هه اونو اؤلدوردولر عمی اوغلو. آمما منیم دیلیم توتولمادی کی.

- بودا نه دئمک عمی قیزی؟

- ارسلانین سسی، سازی و او تمیز باخیشلاری گئدندن سونرا، ائله بیل داغ کیمی آغیر بیر کدر یوکونو، منیم اوره گیمه قویدولار. اونو توپراق آلتیندا قویلادیلار. من ده اونون منه تازادان باغیشلادیغی سسیمی، ایچیمده قویلادیم. عهد باغلادیم دا بیرده دانیشمایاجام. آمما سنین سازیندان گلن دیلقم، گئنه هر شئیی یادیما سالدی. کاش هئچ گتیرمه سئیدی سازینی بو ائوه.

- باخ عمی قیزی! عؤمرونون سونونا قدر یاس توتماقلا، ارسلانی قایتارابیلمیه سن، اؤز گئنجلیگینی ده محو ائدرسن. سن سوسوب دانیشماسان، هئچ بیر شئی دئییشیلمز. سن و من یئریمیزده سس سیز اوتورساق، دیلیمیز ده آرادان گئدر، آشیق هاوالاریمیزدا. ارسلانلاریمز اؤلدورولر. میرزاعلی کیمی دوشونمزلر، خالقیمیزین بؤیوک عالیمی اولار.

احمد دانیشدیقجا، سوناپری راحاتلاشیردی. سانکی بیریسی اونون اوستونده کی آغیر آغیر یوک تایلارینی بیر- بیر گؤتوروب یئره قویوردو.

- عمی اوغلو احمد! ارسلان اؤلندن سونرا اؤزومله عهد باغلادیم، کیمسه ایله دانیشمایاجام.

- اولسون سن هله ده کیمسه ایله دانیشما. آمما گل سنین بو یاسینا بیر گون سون وئرک. گل بو ایش ائله ایندیدن باشلایاق. من سنه ساز چالمایی اؤیردیم. آشیق هاوالارینی سن اؤزون اؤیرنیب چالگینان. آمما سن ده منه سؤز وئر، دیلقم چالمایی باجارا بیلدیگینده، آرتیق یاسینا سون وئره جکسن. من امینم کی ارسلانین روحو دا سندن بونو ایستیر.

سوناپرینین دوداقلارینا کیچیک بیر گولومسه مه قوندو. یاواشجا، یئرده کی سازی الینه آلدی و اونون تئللرینه ال ووردو.

- عمی اوغلو! یانی منده بیر گون دیلقم چالابیله جه یم می؟

- هه عمی قیزی سنه سؤز وئریرم، سنه دیلقم اؤیرتمه یه نه قدر بو ائوده گئتمه یه جم.

سوناپری باخدی الینده کی سازا. گولومسه دی. ساغ الی ایله تیللرینی دوزلتدی. سازی یئره قویدو و گئتدی مصبخدن تازادان ایکی چای گتیردی.

- عمی اوغلو! سن ده اؤزوندن تعریف ائت. بیلدیگیم قدر میرزاعلی نین قیزی معصومه ایله ائولنمیسن.

احمد میرزاعلی نین آدینی ائشیدرکن، باشینی آشاغی ساللادی.

- عمی اوغلو! سن نئیه گرک اوتاناسان کی؟ میرزاعلی نین ائله دیغی ایشلره گؤره سن اؤزونو گوناهکار حیسس ائتمه. معصومه نی تانیردیم. کندده اولاندا بئش آلتی یاشدایدی. چوخ سئویملی قیزیدی.

احد باشینی قالدیردی. سوناپرینین اوزونه باخدی و دئدی:

- عمی قیزی! سندن بیر شئی سوروشا بیلرم می؟

- سوروش عمی اوغلو

- او گون مسجیدین طؤوله سینده، سنین باشینا نه لر گلدی؟ نئیه دیلین توتولدو؟

سوناپری ایستکانینی یئردن گؤتوردو، بیر ایکی قورتوم چاییندان ایچدی و دئدی:

- او گون قورآن درسی قورتولدو. میرزاعلی، اوشاقلارین هامیسینی مسجیددن ائشی یه اؤتوردو. هامی گئتدی. مسجیدین حیطینده بیر من قالدیم، بیرده قونشوموزون قیزی گول چؤهره. گول چؤهره منه دئدی کی " بیر آز بوردا گؤزله، ایندی گلرم" آمما، ها گؤزله دیم گلمه دی. اویانا باش چکدیم، بویانا باش چکدیم، آمما اوندان هئچ بیر خبر یوخودو. سونرا گئتدیم مسجیدین حیطینده کی طؤوله یه ساری. بویوم قیسایدی اونا گؤره ده قاپیسینی آچابیلمه دیم. طؤوله نین اطرافیندا دولاندیم. آرخادا بیر قاپیسی داها واریدی. او قاپی کیپلنمه میشدی. بیر آز آچیغیدی. ایچری گیردیم. اونلاری گؤردوم سامانلیغین اوستونده.

- کیمی گؤردون عمی قیزی؟

- لوت کیشینی گؤردوم. اوستونده هئچ بیر پالتاری یوخودو. سامانلیقدا لون به لن لوت چیلپاق، اوزو قویلو چابالیردی. اوجادان نفس وئریب آلیردی. یامان قورخموشدوم. قورخومدان آغلامایا باشلادیم. منیم سسیمی ائشیتدی او لوت کیشی. آیاغا قالخینجا، آلتینداکی او بیری لوت آدامی تانیدیم. گول چؤره نین ده اوستونده هئچ پالتاری یوخودو. اؤنجه ایکیسی ده هوروت هوروت منه باخدیلار. بیردن گول چؤهره یئرده کی پالتارلارینی گؤتوروب طؤوله دن ائشی یه قاچدی. لوت کیشی منه ساری گلدی.

سون یادیما گلن شئی، اوزومه اونون آغیر الیندن گلن شاپالاغیدی. طؤله ده هوشسوز، نئچه ساعات ییخیلیب قالدیغیمی خاطیرلامیرام، تاکی نوصرت گلدی منی اوردا تاپدی.

- عمی قیزی! کیمیدی گؤردوغون او لوت کیشی؟

آمما سوناپریدن سس چیخمادی.

*** 

سونا پرینین ساز اؤیرنمه سی، اینانیلماز درجه ده گؤزل قاباغا گئدیردی. احمد بو ایشه حئیران قالمیشدی. عمی قیزیسینین بو قدر باجاریقلی اولدوغونا اینانا بیلمیردی. سؤز وئردیگی کیمی سوناپری یه سون درسی اولاراق، دیلقم هاواسینی اؤیرتمه یه باشلامیشدی کنددن آیریلمادان اؤنجه.

***

او گئجه گلیب چاتدی. کنددن گئتمک زامانی یئتیشدی. قرارسیزیدی احمد. پنجره نین آرخاسیندان هئی ائشی یه باخیردی. نوصرتین شهردن قاییتماسینی گؤزلوردو. او گئجه معصومه نی و یئنی دونیایا گلن اوشاقلارینی، نوصرت شهردن قاچیردیب گتیره جکدی.

سونوندا نوصرتین داشقاسی گیردی باخچایا.

معصومه نی گؤرجک باغرینا باسدی. کؤرپه اوشاقلاری هله ده یاتمیشدی. یاریم ساعات سونرا، احمد و معصومه قوجاغیندا کؤرپه سی ایله، کنددی ترک ائتمک اوچون اوتورموشدولار نوصرتین داشقاسی دالیندا. آتین بئلینه نوصرت قامچیسینی اندیرمه دن اؤنجه، احمد بیردن سسلندی:

- دور!

و سونرا اوزونو چئویردی ائوین پنجره سینه ساری. جامین آرخاسیندان اونلارا باخان سوناپرینی گؤردو.  تئز ال آتدی داشقانین اوستونده کی سازینی گؤتوردو و تازادان ائوه قاییتدی.

- عمی قیزی، آل بو ساز مندن سنه یادیگار قالسین. قوی بو گون ده سنین یاسینین سون گونو اولسون.

سوناپری سازی آلدی. گؤزلری گولوردو. دئدی:

- عمی اوغلو، سیزه یاخشی یول آرزولاییرام. اؤزوزه یاخشی باخین.

- تازادان گؤروشمه میزی آرزو ائدیرم. اما عمی قیزی! گئتمه دن اؤنجه گئنه سندن سوروشا بیلرم می، او گونکو گؤردوگون لوت کیشی کیم ایدی؟

آمما سوناپریدن سس چیخمادی.

ائودن چیخار چیخماز سوناپری اونا ساری دؤنوب دئدی:

- عمی اوغلو! او کیشی میرزاعلی ایدی.

***

گئجه قارانلیغیدی. بیر داشقا، اوزوم دیل کنددینی ترک ائدیردی.  کند ائولرینین بیریندن ساز سسی گلیردی. بیریسی دیلقم هاواسی چالیردی. سازینین سسی چوخ یانیقلیدی.

محمد احمدی زاده