( بیرلیک )اگر چؤزوم دالیسیجاییق سا بو داغینلیقی ییغیشدیرمالی و انسجام یاراتماغا چالیشمالییق
« بیرلیک »
آدینین قوتساللیغی قده ر ، آغیر و اله چاتماز بیر کلمه یه بنزیر.
پوزیتیویست و مثبت گرا بیری سی اولماغیما باخمایاراق بو کلمه یه ال چاتماغی بئله شرایط ده و بئله شرایطله ایمکانسیز بیلیرم .
بونو نظرده توتمالییق کی میللی حرکته هئچ کیم مانیفست یازا بیلمه یه جک ؛ ایمکانسیز گؤرونور . مسئله نین حلی انسجام دان و اصول قاعده دن کئچیر اما یئنه ده هئچ کیمه خاص و جامع بیر اصول قاعده تعیین ائتمک اولماز مختلف الیت لر و مختلف دوشونجه لرین اولدوغونا گؤره ! چارچوب ، مرام نامه و اصول قاعده نی یالنیز آدلی سانلی و منسجم توپلوم لارا تعیین ائتمک اولار!
حرکتیمیزده چالیشقانلاریمیز و دوشونجه صاحبلرینین ساییسیلا برابر دوشونجه و فیکیر وار و مسئله بودور کی بو سایینین چوخلوقو سبب اولور بیرلیک یاراتماق محال گؤرونسون و بولاری بیر یئره ییغماق امکانسیز ، مگر توپلوم لار طریقیله .
توپلوم دئدیک ده تشکیلات ، جمعیت لر ، درنک لر ، اتحادیه لر ، شعر و موسیقی انجمن لری ، اؤیرنجی سل اجتماع لار ، کانون لار و هر بیر توپلوم آنلامی داشییان منسجم و هدف لی ییغینتی و اولدوقجا قانونی یوللارلا نظرده دیر !
اگر چؤزوم دالیسیجاییق سا بو داغینلیقی ییغیشدیرمالی و انسجام یاراتماغا چالیشمالییق ؛ انسجام دئدیک ده هامی نی بیر فیکرین ، ایدئولوژونون و بیر اینانجین چترینین آلتینا گتیرمک دئییل ، بلکه مختلف دوشونجه صاحب لری فیکیرداشلاریلا بیر یئره ییغیشیب و مرام لارین و یوللارین مشخص ائتمه لری دیر کی سولار دورولسون و شفافیت یارانسین ؛ سونرا مسئله لره چؤزوم یولو راحاتلاشسین ؛ بو توپلوملاردا گره ک سلسله مراتب حفظ اولوب و هر کس اؤز یئرین تانییا (بیرینجی سی اؤزوم اولاراق) . یولداشلار دئمیشکن میللی حرکت بیر تعریف یوخ بلکه تعریف لره مالک اولمالی دیر اما تعریف لر بیرسیرا اؤنملی اورتاق مسئله لرده کی بیری و ان اؤنملی سی آزربایجانین میللی منافعیدیر اورتایا قویولمالیدیر .guc_birlikdedir...
بونون لاب اصوللو یولو همان سازماندهی آدلانیر ! بو آدی چوخ فعال لار داشیماقا حاضر دئییل لر یا داشییماغا حاضر اولان لاردا نظرلرینده اویغون امکان لار تاپا بیلمیرلر و بیر علتی ده قاییدیر چوخلو فعال لارین انفرادی چالیشماق روحیه لرینه و گروهی چالیشما روحیه سینین اولماماسینا .حدالامکان هزینه سیز یوللارلا ، مختلف الیت لر اعم از شعر توپلوم لاری ، موسیقی توپلوم لاری ، سیاسی توپلوم لار ، ان جی او لار ، انجمن لر و بونا تای لار یارانمالی دیرلار کی بو داغینلیقا سون قویولسون و یا لاب آزلیقا چارتدیریلسین . (بیزیم حرکت ماهیتینه و تملینه گؤره لاب آز هزینه ایله بو امکانا صاحب اولا بیله ر )
دوشونجه لر یازی یا چئوریلیب کاغاذ اوستونه گله جک و هامی نین مرامی، ایدئولوژوسو و چارچوبلاری اؤز الیله مشخص اولاجاق .
- مختلف جریان لارین میللی حرکته قوشولماق ایمکانی یاراناجاق و میللی حرکت تمل ده آزربایجان روحونو داشیماقلا بیر گئنیش حیطه یی اوزونه شامل ائده بیله جک .
- بئله اولدوق دا شفافیت یاراناجاق .
- انسان لار نقد اولمایاجاق لار بلکه دوشونجه لر نقد اولاجاقلار .
- اورتاق نقطه لر ، مسئله لر و موضع لر بلله نه جک دیر و زامانی گلدیک ده بو اورتاق قونولار اوستونده ایش بیرلیک داها راحات اولاجاق !
- هر بیر توپلومون نماینده لری رسمی یا غیر رسمی اولاراق ، تانیدیلان دان سونرا هامی نین بیر یئره توپلانماسی گره ک لی اولمایاجاق بلکه توپلوم لارین نماینده لرینین بیر یئره ییغیشماسی ایله مسئله لره چؤزوم یولو آختاریلاجاق و بونون اؤزونه گؤره مختلف خئیرلری وار .
- اورتاق تصمیم لره چاتدیق دان سونرا مشارکت حداکثری اولا بیلمک ایمکانی یاراناجاق .
- توپلوم لاریمیزدا مختلف دوشونجه طرفدارلاری اخلاقلی تربیت تاپیب و متداوم و مسئولیتلی چالیشماقلاری اوچون ایمکان یاراناجاق .
- بؤیوک خیردا ، ساوادلی و ساوادسیز ، اینانجلی و اینانج سیز ، چالیشان و چالیشمایان و … ، هره سی اؤز یئرین ده و اؤز ده یَرینه مالک اولاجاق و کیمسه یه سایقی سیزلیق اولمایاجاق. سؤزون اصل معناسیندا شایسته سالاری حاکم اولاجاق .
- بیر کیچیک پلورال جامعه نی یاشاماق ایمکانی تاپیب و چوخلوقو قبول ائتمه یی تجربه ائتمیش اولاجاییق .
- و داها داها چوخلو حسن لر …
بیز بو داغینلیقین ضربه سین یئییریک .
یولداشلار بونو نظرده آلمالی دیلار کی شاید حرکته مانیفست یازماق اولمایا اما توپلوم لار مانیفست لرین گیزلین یا آچیقجاسینا یازیب و باشقا یولداشلارا آچیقلایا بیله رلر!
ا.ی : بو قونو گئنیش قونودور و بیر استاتوس دا یئرلشمز…
و بوکی مومکون دور اما چتین ! و چؤزوم لرین بیری بئله اولا بیله ر !
بو آددیمی دوشونورلریمیز و مسئله یه چؤزوم آختاران لار آتمالی دیرلار و نئجه امکان تاپماسین اولار تعیین ائتمه لی دیرلر !
طبیعی دیر کی هر بیر مثبت آددیمین منفی یؤن لری ده وار !
اوچاقی جورله ین لر اوندان دوشمک قورخوسونا گؤره اوچاقا مین مه یی قدغن ائتمه دیلر بلکه بو احتمالا قارشی «چتر نجات» جورله دیلر . بونولا بئله توپلوملاشمایین و انسجامین دا اؤزونه گؤره احتمالی ضررلری اولا بیله ر اما بو دلیل اولماز بیز بو ایش دن قاچاق ! بیز او احتمالی ضررلری بئله تاپیب و اولارا چؤزوم یولو تاپیب منفی یؤن لرین حداقله چاتدیرمالییق .
م . ع
