چیخ گل بو آخشام اوستو

دربندیزین باشینا

گل قول قولا گزیب قوجالاق

بو شهرین یاشلی خیاوانلاریندا

دور گل قابالینی قورتاراندان سونرا

پیچاغینی قوی یئره فرش دزگاهیندا

بیر شیریق سری بارماغینا

ایلمک سالان بارماغینین یاراسینا

گوللو گوللو چادرانی اؤرت باشینا

گل بو آخشام اوستو دربندیزین باشینا

گل پییادا گئدک گئدک تا

یورقون آرقین یئتیشک ائل گولو پارکینا

قورخما

نیگران اولما

گئتمه دن اؤنجه گئدیب باش ووراریق روقییه خالانا

سوروشاریق نه اولدو اونون سینیق قابیرقاسینا

سونرا گئدیب مینه ریک، ائل گولو پارکینین چرخی فله گینه

دویونله ریک باش گیجلمه لریمیزی بیر- بیرینه

ائله سینه گیجه لریک کی گؤزوموز ساتاشماز بئله

روقییه خالانین ارینین تپیکلرینه

گیجه لریک، هئچ ده گؤرمه سین گؤزوموز

گئجه لری ائولریندن یوخ اولان گئنجلری

پارکین گولو ایچینده اوزَن جنازه لری

سونرا گیره ریک قورخو تونئلینه

قولاقلاریمیزا پامبیق کیمی تپریک قورخولاریمیزی

ائشیتمریک درزی خانادا ایشله ین

قونشوموزون قیزی زهرانین باغیرمالارینی

اوستاسی تجاووزا زورلایاندا اونون قیشقیرتیلارینی

نئجه دی سونرا گئدک خلیفه کوچه سینه

گؤز یوماق کوچه نین گئدیب گلنلرینه

گیزلیجه دوداغیمی قویوم دوداغینین اوستونه

نئشه له نک موتلولوغون بیر دقیقه سینه

اونود گئتسین دئیک، دونیانین قمی قوصصه سینه

یورولماسان اگر

یول آلیب گئدریک اوردان دا بارناوا کوچه سینه

آماندی، آماندی

هئچ ده باخما کوچه دن گئچنده موستشار قفه سینه

گؤزون توخونماسین بوجاقدا اوتوران روقییه خالانین ارینه

بوغونو ائشه له ییب قلیانینی چکمه سینه

گولوب ده آغزیندان توستو پوفله مه سینه

بیلیرم، بیلیرم

چوخ یورولاجاقسان

بو قدر گزمکدن سونرا منجه

قاییداریق ائومیزه

قاییداندا یولوموزو سالاریق انگج مسجیدینه

گؤره ریک شام نامازی قیلانلاری

نامازدان سونرا مسجیددن چیخانلاری

گوستره رم اونلارین آراسیندا سنه من

قونشوموزون قیزی زهرانین اوستاسینی