بو ناغیل 1997 ایلینده استکهولم دا چیخان "دورنا" درگیسینده یاییلمیشدی

******

خانيم “وولف” دان ايكي گون مرخصليك ايسته ديگيمده، گولومسه يه رك اوزومه باخيب سوروشدو:

 “اوغلونوز مو اولسون ايسترسينيز، يوخسا قيزينيز مي؟"

 آخ، خانيم “وولف” اوشاق اوشاقدير دا، ايستر قيز اولسون، ايستر اوغلان، يئتركي انسان اولسون” دئـديم.

"سيز شرقليلر اوغلان اوشاغيني...“

 سؤزونو ياريدا كسديم،

 “ يوخ، خانيم “وولف” من سيزين بيلديگينيز شرقليلردن دگيلم.”

 دئـديگيمه اينانمازجاسينا ماوي گوزلريني اوزومه تيكه رك، اگيليب ميزينين سول يانينداكي چكمه جه دن (كشودان) مرخصليک فورمو آخداراركن باشيني توولادي. اينانمازجاسينا باخيشينين و باشيني توولاديغينين آنلاميني بيليرديم. ايكي ايل اؤنجه آراميزدا بير دئييشمه كـچميشدي. گون اورتا تعطيلينده، کانتین ده یئمک باشیندا  ايش يولداشلارينين ائوليليك اؤته سي جنسي مناسبتلر حقينده كي صحبتينه، سؤزه قاريشماق ايسته مدن، قولاق آساركن، خانيم “وولف” اوزونو منه چئويريب سوروشموشدو،

“ سيزين اؤلكه نيزده ‏بئله بير ايش اولسا، انسانى داشلاياراق اؤلدوررلر، يوخ؟”

 بو سورو دريميى، اتيمي سؤكوب، سوموگومون ايچينه ايشله ين بير اوخ كيمي بننيمين اورتاسيندا يئرله شميشدي. قابيرقالاريمين آلتيندان باشيما ساري ياييلان بير ايستي آلنيمدا سويوق تره دونوشموشدو. سؤزه قاريشماماق ايستگيمده چوخ قارارلى اولدوغوما قارشين جوابسيز قالمايب،

 “ ائوليليگينين اؤته سينده جنسي مناسبتلري اولان بير انساني داشلاياراق اولدورمك دوغرو دگيلسه ده، من بو جوره مناسبتلري او ائوليليگين اكسيكليگينين، دويوروجو اولماديغينين و عاطفي باغلارينين قوپوقلوغونون سونوجو و سون باخيشدا دا اجتماعي بير خسته ليك اولاراق گؤروره م. آنجاق انسانلارين، اوشاقليقلاريندان باشلاياراق، بئيينلري هرگون مين بير جوره سكس درگيسي و سكس قزته سي، سكسي، هوموسكسوئلليگي و جنايتي موضوع ائـدن و يوزده ن چوخ تلويزيون كاناليندان ياييلان فيلملرله دولدورولان بير جامعه ده، عاطفي باغلارين ياديرقانماسي، جنسي دويومسوزلوق و هوموسكسوئلليك ده طبيعى بير سوروندور. سيزين توپلومونوزداكي اون ياشيندا بير اوشاق، اوشاقلار اوچون يازيلميش ناغيل و يا آيري اؤيره ديجي كتابلاردان داها چوخ سكس درگيسي تانيير، آتا- آنا سئوگيسيندن داها چوخ جنايت فيلمي گوروبدور...”

 دئيركن خانيم “بريگيت” سوزومون اورتاسينا گيره رك آلچاقلاييجي بير گولوش ايله،

 “ سيزين توپلومونوزدا دا بونلار وار، آنجاق يالنيز كيشيلر اوچون، آروادلار دا كيشيلرينين سكس قوللاريديرلار.” دئميشدي.

خانيم “وولف” مرخصليك كاغاذيني ميزين اوستونه قويوب، “بويورون، دولدوروب رئيسه گول چكديرديكدن(امضالاتديرديقدان) سونرا منه وئرين. دوغروسونو ايسترسه نيز، بو ايكي گونو سيزه هديه ائتمك گركير، ايلك سفر آتا اولورسونوز.” دئـدي.

خانيم “وولف”ون دفتريندن چيخديم. جام قاپيدان كئچيب، اوزون كوريدورو اولچوب، اؤز دفتريمده ميزيمين باشينا اوتوروب، مرخصليك كاغازينداكي تاريخ اوچون بوش بيراخيلان يئرلري دولدورماغا چاليشاركن اؤزومده بير قارارسيزليق ايله قارشيلاشديم. دوقتورون دئديگينه گؤره، دوغوم آيين ايگيرمي ايكيسينده، يادا ايگيرمي اوچونده اولاجاق ايدي. “دوغوم گئجيكسه نه اولاجاق؟” آيين ايگيرمي دوردونده اولسا نه اولاجاق؟” دئيه فيكيرله شمه گه باشلاديم. بونون اؤته سينده، ايچيمده بويوك بير سئوينج، بويوك بير هيجان وار ايدي. بوندان سونرا، آرتيق باشي بوش بير جوان دگيل، بير آتا اولاجاق ايديم، بير عايله نين سوروملوسو. آخشام لاري ايشدن چيخديقدان سونرا، تار چالماق اوچون موزيك ائوينه دگيل، اوشاغيمي قوجاقلاييب، اؤپمك اوچون، اونون اقيانوس كيمي گئنيش، گؤي كيمي صاف و سونسوز باخيشلاريندا گله جگيمي و تؤره مى ياشاداجا غيمي گؤرمك اوچون، اونون قيغيلتيلاريندان اولوشدوردوغو ايلك كلمه يه بنزر سسلردن “آتا”، “آنا” كلمه لريني تؤرتديگيني دينله مك اوچون، اونونلا بيرليكده معصوم بير اوشاغا دؤنوشوب، اونونلا بيرله شمك اوچون ائوه تله سجك ايديم. “بوندان سونرا، نازلى ايله ارتباطيميز دا دوزه له ر، ياخجيلاشار، او دا آرتيق باشي بوش بير قيز دگيل، بير آنا اولماقدادير. كئچن بير ايل ياريم ايچينده ده اوروپا دا گؤره جكلريني گؤرموش، دويموش، بوندان سونرا ائوه، عايله يه بير آز داها ياخينلاشار، من ده اونو دوغرودان دا نه قدر چوخ سئوديگيمي، ائوه، اوشاغا، ائو ايشينه گؤسترديگيم علاقه ايله قانيتلارام.” دئيه فيكيرلشيرديم.

تلفونون سسي ايله اؤزومه گلديم؛ بتينا- سكرتر قيز- “

 “شوارتزكوپف” بيگ تلفندا سيزينله دانيشماق ايسته يير،كئچن آيدا Umsatzsteuer  قاتما دگر وئرگيسينين نه ده ن بو قدر چوخ اولدوغونو سوروشور”

 دئدي.

“شوارتز كوپف” بيگي چوخدان تانيرديم. آيري بير شئـي سوروشماياجاغيني دا بيليرديم. هر آي حساب كاغاذلاريني پستچي دان آلديغيندا، پاكاتي آچمادان، نييه بو قدر پول خسته ليك سيقورتاسينا(مريضليك بيمه سينه)، نييه بو قدر پول وئرگي اداره سينه، نييه بو قدر پول تجارت و صنايع اوتاقينا، نييه بو قدر پول، نييه بو قدر پول، نييه بو قدر پول... وئره جگم؟” دئيه تلفن ائدر. بئش يوز دليلي بئش يوز يول تكرارلاسام داهي، سونوندا دا “يوخ، كسين كي بير يانليشينيز واردير، كئچن آي دا بئله اولموشدو” ديير. آنجاق بو يول “ شوارتز كوپف” بيگين نه دئديگيني هئچ آنلاميرديم. نازلينين گؤبگينده تپيك دؤگوب، توپراق دنيايا آياق قويماغا تله سن كؤرپه نين قيغييلتيلاريني ائشيديرديم سانكي. بو شيرين قيغييديلاري كسمه مك اوچون هئچ بير شئـي دئمك ايستميرديم، بو قيغيلتيلاردا كيچيك دالغالارين ساحيله ياييليشينيني، سحر يئلينين يارپاقلاري اوخشاييشيني، قوزونون آناسينا تله سه رك مه له يشيني و بؤيوك بير سنفونيده كمانلارين هارمونيك اينله ييشيني، دنيادا وار اولان بوتون جان اوخشاييجي سسلرين هاميسينين بيرلشمه سيني ائشيديرديم سانكى. “ دور كؤرپه م، دور، تله سمه، ايكي گون داها اوتور اولدوغون يئرده، آيريليغا تله سمه” دئيه ديل- دوداغيم آراسيندا ميريلدايينجا، “شوارتز كوپف” بيگ، “لطفا آلمانجادانيشين” دئدي. “ باغيشلايين، سيزين حسابينيزا بير داها باخيم، ياريم ساعاتدان سونرا سيزه تلفون ائدرم” دئيه دانيشماميزي كسديم.

“شوارتز كوپف”ون دوسيه سيني تاپيب، گئتيريب قاباغيما آچديم. كامپيوتر ده حساب نومره سيني تاپيب، چاغيرديم. كئچن آيين باشيندان باشلاياراق دوسيه ده كي فاكتورلار ايله كامپيوتره وئرديگيم ساييلاري قارشيلاشديرماغا باشلاديم. كامپيوترين ماوي زمينه سي اوستونده آشاغيدان يوخارييا آخان سايي سطيرلري استانبولدان يالووايا ساري ده نيزي ياران گمينين داليندان چيخيب، ياييلا ياييلا قاشدا ( افق دا) گؤزدن ايتن دالغالاري آنيمساتيردي. نازلى ايله بيرگه گمينين عرشه سينده دورب ده نيزه باخيرديق. ايكيميزين ده اوره گي بير دنيا سؤز ايله دولو ايكن آنجاق قيريق- قوپوق و قيسسا جمله لر ايله دانيشيرديق.سانكي سؤزلر بوغازيميزدا دوگونلنيردي. اون آلتي ايلدن سونرا بيربيريميزی تكرار گؤره لى داها اون آلتي ساعات اولماميشدي. نه من، اون آلتي ايل اؤنجه كي من ايديم، نه ده، نازلى او زامان گؤردوگوم نازلى ايدي. سون گؤردوگومده اون اوچ-اون دورد ياشيندا بير قيز ايدي. حيدر دائـي اوغلونون اوچونجو و سون قيزي. حيدر دائـي اوغلو منيم دائـي اوغلوم دگيل،آتامين دائـي اوغلوسو ايدي. آنجاق بيزلرده حيدر دائـي اوغلو ديه رديك. سانكي، باشدان بري نازليا وورغون ايديم. گؤزلرينين ايچينه باخينجا، سونسوزلوغا باخار كيمي، بو باخيشلارين ايچينده ارييب يوخ اولماق ايستگي كيمي بير دويغويا قاپينارديم. گله جگيم اوچون قوردوغوم اوشاقليق خياللاريمدا يالنيز اونون ايله ائوله نرديم. بير يول، مندن آلتي ايل بويوك اولان عصمت باجيمين دا، دوشاب پيشيرمك اوچون بيزه گلديگي گون، “ سنه حيدر دائـي اوغلونون قيزي نازلى ني آلاجاغام” دئديگني، ايندي ده خاطيرلاييرام. آنجاق، من آلمانا گلديكدن سونرا هر شئيي اونودموشدوم. نازلينين نه زامان بؤيويوب، مدرسه ني قورتاريب، تهران اونيورسيته سينده حقوق اوخوماغاباشلاديغيندان خبريم ‏بئله يوخ ايدي. سون اوچ-دورد ايل ايچينده عصمت باجي ايله جعفر داداشين آروادي شهينين يازيدقلاري هر مكتوبدا اولدوغو كيمي، هر تلفون دانيشيغيميزدا دا، “ ائوله نيبسن يا يوخ؟ نييه ائوله نميرسن، هاچان ائوله نه جكسن؟ ” كيمي سورولارنيدان ‏بئزميشديم. سونوندا بير جواب اولسون دئيه “ آي باجي، باشيوا دولانيم، اوروپادا ائو آروادي تايماق چوق چتيندير” دئديگيمده، عصمت تلفونو شهينين الينده ن قاپيب “ ايسته ييرسن حيدر دائـي اوغلونون قيزي نازليني گؤنده رك گلسين آلمانا” دئميشدي. نازلى نين آديني ائشيدينجه بوتون دويغولاريم دگيشميشدي. بير آن ديليم توتولموش ايدي. بير شئـي دئـمه يه جرئت ائتمه ميشديم. عصمت ده منيم سوسقونلوغومو گؤرونجه “ هه، ايندي گوردون؟ دئمك كي بو قدر زاماندير نازلى ني گؤزله ييردين. جعفر داداشين آدينا بير وكالتنامه گؤندر، ايشين قالانيني منه بيراخ” دئميشدي.

نازلى ايله بيرليكده گمينين عرشه سينده گون اورتادان سونرانين ايستي گونشي آلتيندا دوروب، ده نيزه باخيرديق. جعفر داداش، شهين، حيدر دائـي اوغلو و نازلينين آناسي بيله رك بيزي باش- باشا بيراخماق اوچون گمينين آشاغي قاتينا گئتميشديلر. گوزلريمه اينانابيلميرديم. اؤز اؤزومدن“ نازلى ايله اون آلتي ايلدن سونرا تكرار مي گؤروشوروك؟ ايندي نازلى منيم رسمي آرواديم مي؟ يوخسا گينه خيال مي قورورام؟ دئيه سوروشوردوم. ديليم آغزيمدا قوروموشدو. قوللاريم بدنيمه آغيرليك ائديردي، اورگيم سينه مدن چيخماق ايسترجه سينه چيرپينيردي. ديزلريمين تيتره ديگيني آپ-آيدين دويوردوم. دئمك ايسته ديگيم هر كلمه بوغازيمدا دوگونله نيب قاليردي. گمينين عرشه سينين اورتاسينداكي بوشلوقدا اوتوران بير دسته جوان قيز ايله اوغلاندان بير نئچه سي ورق اويناييرديلار. بير نئچه سي ده بير-بيرينه دايانيب، قوجاقلاشيب، گونشله نيرديلر. دانيشديقلاريني ائشيده بيلميرديم. آنجاق، ساري ساچلاري، ماوي گؤزلري و گييملري اوروپالى توريست اولدوقلاريني گؤسته ريردي. نازلينين اونلارا باخانماديغيني، اونلاري گؤرمكدن اوتانديغينيي حس ائديرديم. اون دقيقه سوسقونلوقدان سونرا، بير سؤز دئمك اوچون بير بهانه تايميش كيمي، “ سن كي حقوق اوخويوبسان، ده گؤره ك او گنجلرين نئچه شاللاق جرمي اولار؟” دئيه سوروشدوم. اوتانجيندان ياناقلاري قيزاردي، آلچاقلاييجي باخيشني اوزومه چئويريب، تيتريه ين بير سس تونو ايله “ آيري بير سؤز تاپابيلمه دين؟” دئدي. اوتانديم، باشيمي آشاغي سالديم. آنجاق، بئينيمين درينلرينده “ رسماً و شرعاً ائولييك، اوتاناجاق نه وار كي بيزيم آراميزدا؟” دئيه فيكيرله شيرديم. اون-اون بئش دقيقه داها آراميزداكي سوسقونلوق سوردو. بوتون بدنيم آغير بيريوك آلتيندا ازيليرميش جه سينه، بير آغيرليق، دايانيلماز بير يورقونلوق حس ائديرديم. اوتورماق اوچون بير يئر آخداريرديم. آنجاق، عرشه ده اوتورماق اوچون بير يئر يوخ ايدي. “ گل، گئدك ايچرى” دئيه نازلينين اليندن توتماغا چاليشديم. اليني گئري چكيب، اوزونو مندن چئويرركن ديل- دوداغي آراسيندا “دئيه سن بو اوغلان چوخ تله سير” دئدي. مندن بير آدديم قاباغدا گئدركن باش اؤرتوسونون قيراغيندان چيخيب، آلنينا تؤكولن ساچلاريني باش اؤرتوسونون آلتيندا گيزلديب، چه نه سينين آلتينداكي دوگونونو سيخدي. ايچيمه بير قورخو دولدو“ آي آللاه، بو نه ايش ايدي من گؤردوم. ايندي بو قيز حيدر دائـي اوغلويا دئيه جك “ يوخ، من ايسته ميرم. قاييديب- گئدك” ”

“هالو، هالو” دئيه بير سس دقتيمي كامپيوترين صفحه سينده گؤردوگوم نازلى ايله ايلك گؤروشدوگوم گونون آنيسيندان (خاطره سيندن) آييردي. داليمدا دوران “بتينا” گولومسه يه رك

“ اون دقيقه دير تلفونو چالديريرام، ائشيتميرسن؟”

 دئدي.

 آلنيمي اوغوشدوروب

“ ساعات نئچه دير؟ رئيس گليبدير؟”

دئيه سوروشدوم.

“ساعات اونو ايگيرمي دقيقه كئچير، ائله رئيسدن سنه خبر گتيريرم، مرخصليك كاغاذيني گئتيرسين قول چكيم، ايشي چوخ دگيلسه بوگون گئتسين دئيير”

 دئدي.

“شوارتز كوپف” بگين حسابينين قالانينا تر-تله سيك بير گؤز گزديريب، مرخصليك كاغاذيمي گؤتوروب، آياغا قالخديم.

رئيسين قاپيسينا ايكي سفر ووروب، آچديم. آديني بيلمه ديگيم بير مشتري ايله دانيشيردي. سؤزونو كسمه دن، ال ترپتمه سي ايله منه “ يوخ، گلمه” اشاره سي وئرينجه، دالى- دالى گئري چيخيب قاپيني اؤرتدوم.“ مني سرييبدير” دئيه فيكريمدن كئچدي “ مرخصليك كاغاذينا قول چكمك بير ساعات چكمزكي!” بيلميرم منده نه پخمه ليك وار كي، هامي مني سريير. كيمسه مني اؤنمسه مير (اهميت وئرمير)، دئديگيم سؤزون هئچ گوجو يوخدور سانكي. نازلى دا مني سرييردي. اوچ آي يالوارارديم “ نازليم، گولوم، باخ، آلماندا سن هئچ باش اؤرتولو آرواد گؤرورسن؟ بو باش اؤرتونو آچ، قوي يئره، سن اوخوموش- يازميش بير انسانسان، اونيورسيته قورتاريبسان، سنه باش اؤرتوسو ياراشمير”. “يوخ” دئيردي، “من اولدوغوم كيمي قالماق ايسته ييرم. آلمانا گلميشم ده، نه اولوبدور كي؟ آلمانا گلميشم دئيه خياواندا چيلپاق مي گزييم، بورا دموكراتيك بير اؤلكه دير، دئيرسن، هر كسين جاني ايسته ديگيي كيمي ياشاماغا حقي وار، دئيرسن، منيم ده جانيم بئله گيينمك ايسته يير” آنجاق، آلمانجا كلاسينا باشلاييب، ايلك هفته سينده وحيده و نرگس ايله تانيشينجا بيزيم نازلى دا بير دگيشيكليك اولدو. اوزون مانتونو چيخارديب، قيسسا بير اتك گئيدي. ساچلارينين دا ياريسيندان ئوغو باش اورتوسوندن ائشيگه داشماغا باشلاديلار. ايلك باشدا بو ايش منيم اوچون ده سئويندريجي ايدي. اونونلا بيرليكده خياواندا گزمكدن قاباقكيلار كيمي اوتانميرديم. آخشام ايشدن گلديكدن سونرا اليني توتوب، “راين” قيراغيندا بيرليكده گزمكدن، “كازابلانكا” كافه سينين قاباغيندا اوتوروب، دوندورما  يئمكدن يا دا هفته سونوندا مجيد گيل ايله بيرليكده كباب چكمه گه گئتمكدن لذت آپاريرديم. آنجاق، بو شيرين بيرليك چوخ چكمدي. بير- ايكي آي سونرا، نازلى- نرگس - وحيده يولداشليق گروهونا بيرده، لهستانلى “ياتسك” ايله آفريقالى “جيمى” قاتيلينجا هر شئـي دگيشدي. بو يولداشليق گروهوندا اؤزومو ياديرقانميش و خوش گؤرولمه ين بيري اولاراق حس ائتمگه باشلاديم. بير آخشام نازلى “صاباح آخشام “جيمي”نين دوغوم گونو وار” دئديگينده، “دوغوم گونو هديه سي اولاراق ياخشي بير آلمانجا گرامر كتابي آلارام” دئميشديم. آنجاق، “ سن نييه گليرسن؟ سني اونلار تانيميرلار، اورادا داريخارسان” دئيه جواب آلميشديم. ائرته سي آخشام ائوه گلديگيمده، دايانيلماز بير يالنيزليق دويغوسو ايچیمي دولدورموشدو. بیر اؤنجه کی گئجه دن قالان يئمگي قيزديريب، يئديكدن سونرا آرتيق ائوده دورانماميشديم. چيخيب، “وايدماركت” داكي كيوسكدان بير شيشه شراب آليب، كوچه لرده، خياوانلاردا دولانا- دولانا ايچميشديم. تانيش بيريسي مني بو حالده گؤره ر دئيه اوتانميرديم. گؤزومده هرشئي، يولداشلاريم‏‏، تانيديقلاريم، ايشيم، نازلى، اوزوم بئله بير هئچ قدر آنلامسيز و دگرسيز ايدي. شرابي ايئينجه يالنيزليق دويغوم داها دا آرتميشدي. “اشتات قارتن ”ين اورتاسينداكي درياچه نين قيراغيندا اوتوروب، شرابيمين سون قورتومونو ايچميشديم. يومورتادان تازا چيخميش جوجه لريني داليلاريجا اوزدورن بير جوت قو يا باخا باخا قالیب، اوزومو نازلينين گؤزونده بير هئچ كيمي حس ائتميشديم . گون باتاندان سونرانين ياريم قارانليغيندا درياچه نين قيراغيندا اورگیم بوشالينجا آغلاديقدان سونرا يوخلاميشديم. يوخودان اويانيب ائوه گلديگيمده ساعات بير ايدي. آنجاق، نازلى هله گلمه ميشدي.

خانيم “وولف” چيگنيمه ووردو؛

 “ نييه دروبسوز بوردا؟ ايشينيز يوخ مو؟”

 اوتاناراق

“ رئيسي گؤزله ييرم. مرخصليك كاغاذيما قول چكمه سي اوچون گؤزله ييرم.”

 دئديم.

 الى ايله رئيسين قاپيسيني گؤستره رك

“ايچريده كي چوخ اؤنملي بير مشتري دير، دانيشمالاري چوخ چكر”

 دئدي.

باشيمي آشاغي ساليب، اؤز دفتريمه گئديب، ميزيمين داليندا اوتوردوم. ايشله مك اوچون هئچ ايستگيم يوخ ايدي. نازلى ايله كئچيرتديگيم بير ايل ياريمليق آنيلار ياخامي بيراخماق ايسته ميرديلر سانكي. توتون پاكاتيمي چكمه جه دن چيخارديب، بير سيگار ساريديم. بيردن-بيره قاققا باسيب گولونجه، قارشيمداكي ميزده اوتوران “پتر” تعجب ايله منه باخيب، سوروشدو،

“دلى اولوبسان؟ اؤز اؤزونه نيه گولورسن؟ يوخسا منده گوله جك بير شئـي وار؟”

 “ يوخ، سنه گولمورم، بير شئـي ياديما دوشدو، اونا گولورم”

 دئديم

. کئچن ايل، فوريه آينين اورتالارينا ياخين، بير آخشام ائوه گلديگيمده، تبريز كوفته سينين عطريني اوتوردوغوموز ائوین بيرينجي قاتيندان حس ائتميشديم. نازليني چوخ ايستي قانلي و محبتلي گؤرموشدوم. قاپيدان گيرديگيمده بوينومو قوجاقلاييب، دوداغيمدان اؤپموشدو. من سفره ني آچيب، چؤركلري دوغراركن، مطباخدان سسلنميشدي

“ دئييرم، گل، بيز ده ائشك اولاق”

 نه دئمك ايسته ديگيني آنلاماييب، شوخلوق اوچون

“آدامليقدان نه گؤردوك كي، ائشك اولاق!؟”

 دئميشديم.

 باشيني ميطباغين قاپيسيندان چيخارديب

“ دوغرودان يوخ كي، كارناوالدا ائشك اولاق، باخ، هامي اؤزونو ميمون ائله يير، فيل ائله يير، بوينوز قويوب اؤكوز ائله يير، گل بيزده اؤزوموزو ائشك ائله يك”

 دئميشدي

. قيزين دئديگينده جدي اولدوغونو و بو ايشين ايچينده ده نرگس ين بارماغي اولدوغونو حس ائدينجه آغزيم قوروموشدو، بوتون اشتهام قاچميشدي. گؤزومون قاباغينداكي تبريز كوفته سي زهرمارا دؤنموشدو.

“خير، گرگي يوخدور، ائشك اولما”

 دئميشديم.

 آنجاق، نازلى ائشك اولماق ايسته گينده چوخ قارارلى گؤرونوردو. گؤتونو بورجودا- بورجودا پالتار دولابيندان تازا آلديغي ائشكليك پالتارلاريني چيخارداركن

“ Wir haben schon eingekauft ” (پالتارلاري بئله آلديق)

 دئميشدي.

 ايكي اليم ايله صوراتيمي قوجاقلاييب، ديشيمي قيسيب، غضبيمي اوتماغا چاليشميشديم. قالخيب ووروب، قيزين قول-قيچيني سينديرارام، قورخوسوندان باشيمي آشاغي تيكيب، هئچ ‏بير شئـي دئمه ميشديم. آنجاق، نازلى منيم سوسقونلوغومو آنلاماييب، الينده كي ائشكليك پالتارلاري ايله قوجاغيما گيريب،

 “نرگس ايله من ائشك اولاجاغيق، گل سن ده اول”

 دئيه، مني اؤپمك ايسته ديگينده، اؤزومو توتانماييب، اليمين ترسه سي ايله صوراتينين اورتاسيندان وار گوجوم ايله ووراركن

 “چكيل قيراغا ايتين قيزي، سيچيم دده وین لحد داشينا، من ائله باشدان بري ائشگم، آنام دوغاركن مني ايشك دوغماسا ايدي، سنن ایله ائوله نمز ايديم”

 دئيه باشينا چيغيرميشديم.

 ائرته سي گون ايشده ن ائوه گلديگيمده نازلى ائوده دگیل ايدي. مطباخدا، ميزين اوستونده، بير پارچا كاغاذدا “ ‏Was bildest du dir ein, du Idiot, ich bin nicht deine Sklave.... Ich habe     schon mit einem Rechtsanwalt darüber gesprochen” ( آخماق، نه خيال ائله ييرسن، من سنين قولون (برده ن) دگييلم، بو باره ده بير وكيل ايله دانيشديم.) يازديغيني گؤرونجه، ميزين اوستونه ائله بير يوموروق وورموشدوم كي اليمين ائتي ازيلميشدي. نرگس ين ائوينه تلفن ائتديگيمده، اومدوغوم كيمي، نازلى تلفونا چيخيب سلامسیز du wirst es bereuen, mich telefonisch zu belässtigen. du    تلفن ايله مزاحم اولدوغون، سنين اوچون خوش اولماياجاق”

 دئيه تهديد ائتميشدي.

 ووردوغوم يوموروقدان قيزين گؤزونون آلتي قارالديغي اوچون، ايش وكيله، محكمه يه، فلانا چكرسه منيم اوچون دوغرودان دا خوش اولماياجاغيني بيلديگيمدن، اليم هر ياندان اوزولموشودو. مجيد ه تلفون ائديب اونون آروادي ايله دانيشميشديم، “باشيوا دولانيم رقيه، گل گئت بو قيزي شيطان ائشگينده ن ائندير ” دئيه يالوارميشديم.

“پتر” دئديكريمي آنلاميرجاسينا گؤزومون ايچينه باخيردي. منيم درديمي آنلاماديغيني آپ-آيدين حس ائديرديم. سؤزوم قورتولدوقدان سونرا دا، دوداغيني بوزه رك،

“ نه اولار، سلقه يه باغليدير، سن ائشك اولماق ايسته ميردينسه، آيري بير حيوان اولسايدين باري، نه بيليم مثلا ميمون اولابيلردين...”

 دئيركن

 اوزومو كامپيوتره چئـويريب، ايش گؤرورم بهانه سي ايله دانيشماميزي كسدیم،

“ منه باخ، ائشگين قولاغينا ياسين اوخويورام”

دئيه فيكيرله شيركن، گينه تلفن چالدي. تلفونو گؤتورونجه نركس ين سسيني ائشيتديگيمده ن شاشيرديم.

“اليزابت خسته خاناسيندان تلفن ائديرم”

 دئدي

اليم آياغيم تيتره مه گه باشلادي.

“ نه اولوب؟ اولمايا نازلى اوشاغي ساليبدير؟”

 گوله رك، “ يوخ، قورخما، بير شئي اولماييب، نازلى دا ساغدير، اوشاقدا، چوخ گؤزل بير قيزين اولوبدور. ايكي گون اركن اولدوغونا قارشين، اوچ كيلو نون اوستونده دير”

 دئدي.

 اليزابت خسته خاناسينين آدرسيني آليب، قاپيدان چيخاركن “پتر” ه ديديم، سوروشسالار اوشاغيم اولدوغونو و اليزابت خسته خاناسينا گئتديگيمي دئسين.

نازلى خسته خانانين ياتاغيندا، ائوده اولدوغوندان بير از دگيشيك گؤرونوردو. رنگي بير آز سولموشدو. ياناقلاري چؤكموشدو. ساچلاري داغينيق بير بيئيمده ياسديغين اوستونه تؤكولموشدو. ساكنجه نفس آليردي. آنجاق گؤزلرينده بير پارلاقليق، بير آيدينليق، سونسوز بير سئوينچ وارايدي. معصوم باخيشلاري ايله، كلمه لره سيغماياجاق بير ديلده،

“ من ايندي بير آنايام،

بير انسان ياراتديم،

بير تانرييام”

دئيردي.

ياتاغينين يانيندا ديز چؤكوب اليني توتدوم،

اگيليب ياناغيندان اؤپدوم،

و گينه باخيشلارينين سونسوزلوغوندا ارييب يوخ اولماق ايستگي بوتون وارليغيمي قاپسادي.

گؤز ياشلاريم اوزونه داملايينجا،

اليمي سيخيدي،

“بيليرم، منى آنلاييرسان”

دئدي.

آنجاق بو بيرليگيميز،

بير چوخ زامان اولدوغو كيمي،

چوخ چكمدي.

اولقون پرستار قاپيني آچيب، قوجاغيندا

منيم قيزيم ايله

ايچري گيردي.

قيزيمي آليب، باغريما باسديم.

اوزونو آچديم،

رنگي قارا ايدي،

دوداقالاري قالين،

ساچلاري قیویرجیق،

بورنو ياسدي،

آمان آللاه!

يوخسا آقريقادان ...!؟

...

ياناغيني اؤپوب ياناغيما داياديم.

قارا، اينجه دريسينين ايستيليگيني

آغ، قالين دريمده

دويوردوم.

“من” كيمي ايدي.

“‎اوشاق اوشاقدير دا،

ايستر قيز اولسون، ايستر اوغلان،

ايستر آغ اولسون، ايستر قارا،

يئتر كي انسان اولسون”

دئيه فيكريمده ن كئـچركن،

“سنين آدين “تانرى” اولسون،

گلجگين تانريلاريندان بيريسن،

انسانليغين تؤره سيني ياشاداجاقسان”

دئديم

کؤلن