English            Latin   

برای دریافت مطالب جدید به این آدرس www.azoh.net  مراجعه فرمایید

Yeni Adresimiz www.azoh.net

New Address www.azoh.net 

گفتنی است این سایت آرشیو مطالب منتشر شده از اسفند 89 تا دی 92 و همچنین از مهر 94 تا شهریور 95 را شامل می شود
 

ائششکلیک گونلریمدن (3) - درویش اوغلو

آنیتا ایله بیر سونراکی گؤروشمه میزده اؤنجه کیلردن داها راحات ایدیم. اونو یاتاغا آپارماق فیکری یئرینه، اونون مندن نه لر گؤزله دیگینی، منی نه جور سیناماق ایسته دیگینی، گلجگیمیز اوچون نه لر فیکیرلشدیگینی، و من ایله ارتباطدا نه کیمی دویغولاری اولدوغونو آنلاماغا چالیشیردیم. دوغرودان اری اولوب اولمادیغینی سیناماق اوچون:

- اریوین کئفی نئجه دیر؟

دئیه سوروشدوم.

- یاخچی دیر. دونن آخشام سنین باره نده دانیشیردیق.

بو منی سیناماق ایسته ییرسه، دور منده اونو آیری جور سیناییم فیکری ایله، گولومسه یه رک:

- ارین وارسا منی نئیه آوارا ائله ییبسن؟

جیددی و ایناندیریجی بیر سس تونوندا:

- سنی آوارا ائله مه میشم، سن ایله یولداشلیق ائدیریک. بیر آرواد ایله بیر کیشینین یولداشلیغی بیرینین اری، اوبیرینین آروادی اولوب اولمادیغی ایله نه ارتباطی وار؟

- من سنی آنلایابیلمیرم. من ایله تانیشماقدان، سون هدفین من ایله ائولنمک دگیل می؟

- یوخ!

- بس من ایله نئیه یولداشلیق ائتمک ایسته ییرسن؟

- سنین آیری بیر یولداشین یوخدورمو؟

- یوخ.

- بو دونیادا یالنیز یاشاییرسان می؟

- یوخ، یولداشلاریم وار.....

- نئچه یولداشین وار؟

- نه بیلیم، اون – اون بئش

- یولداشلارینین هامیسی ایله ائولنمک می ایسته ییرسن؟

دئمه گه بیر شئی تاپابیلمه دیم.

- بو دا سیزین کولتورونوزون بیر پارچاسی دیر. سیزده کیشی ایله آرواد آراسیندا سو کئچیرتمز بیر دووار چکیلیب. آرالاریندا قارانلیق بیر بوشلوق یارادیلیب. آروادلار کیشینی بیر خورتلان کیمی قورخونج بیر شئی بیلرلر، کیشی لر ده آروادلاری سکس قولو کیمی گؤررلر. آرالاریندا یولداشلیق دئیله بیلجک بیر ارتباط قورولماز. آنجاق آروادلار و کیشیلر انساندیرلار. بیربیرلرینه بو قارانلیق بوشلوغون دالیندان باخمازسالار، بیربیرلرینی داها یاخچی آنلایابیلرلر. بیر انسان باشقا بیر انسان ایله مصاحبتدن لذت آلیرسا، پایلاشاجاق فیکیرلری، ذوقلاری، مشغولیت و یا هوبی لری وارسا، یولداش اولارلار. ایستر ایکی کیشی، ایکی آرواد، یوخسا بیر آرواد – بیر کیشی.

- سن بونلاری هاردان بیلیرسن؟

- ایلک تانیشدیغیمزدا دئدیم سنه، من سوسیال پیسیکولوقام. منیم ایشیم بودور. بیلیرسن، آلمان توپلومو مولتی کولترل (چوخ کولتورلو) بیر توپلومدور. بوردا یئتمیش میللتدن نفوس یاشاییر. بیز بو انسانلاری بیر قیراغا آتابیلمریک. اونلاری آنلاماغیمیز گرکیر و اونلارین کولتورلرینی، دینلرینی، دویغولارینی، سونتلرینی، آدابلارینی اؤگرنمه گیمیز گرکیر. آنجاق  بو یول ایله  اونلارین اؤزلرینی بیزیم توپلوموموزدا راحات حس ائتمکلرینی ساغلایابیلریک.آلماندا "اینتگراتسیون سیاستی" آدیندا بیر سیاست گئدیر. هاردان گلدیکلرینه باخمایاراق، بیزیم توپلوموزدا یاشایان انسانلارا اؤزلرینی بو توپلومدا یئرلی و راحات حس ائده بیلمکلری اوچون امکان ساغلامالییق. بیر انسان اؤزونو اجتماعی محیطینده راحات حس ائتدیگی زامان او محیط ایله دوستولوق و سئوگی باغی قورار، او محیطده یارادیجی ویاردیمجی اولار.  ترسه سینه، بیر انسان اؤزونو اجتماعی محیطده قبول ائدیلمه میش، بیر قیراغا ایته لنمیش و وارلیغینین انکار اولونموش و اؤزونو تهدید آلتیندا کیمی حس ائدرسه، او توپلوما قارشی دوشمانلیق دویغوسو بسلر، یارادیجی یوخ،  ییخیجی و ییرتیجی اولار. من ایشیم اوچون سیزین دیلینیزدن ده بیرآز اؤیگرنمک زوروندا ایدیم.

- یوخ!؟ شوخلوق ائله ییرسین!

- هئچ ده شوخلوق ائله میرم. منیم ایکینجی اونیورسیته تحصیلاتیم تورکولوژی دیر. سیزین دیلینیزین بئش قولو اولدوغونودا بیلیرم.

اؤزومو لووا گئتمیش کیمی حس ائتمه گه باشلادیم. دئملی منیم آنجاق یاتاغا آپارماق ایسته دیگیم آرواد، من ایله تانیشمادان اؤنجه بئله، منیم نه کیمی فیکیرلشه بیله جگیمی بیلیرمیش. دریمی شوشه کیمی ایچی گؤرونور حس ائدیردیم. او گونه قدر آلمان توپلومونون دونیادا باشدا گلن سؤز صاحیبلریندن بیریسی اولدوغونون ندنینی آنجاق گلیشمیش تکنیک و صنعت ده بیلیردیم. صنعت و تکنیکین هانسی توپلومدا نه اؤلچوده گلیشمیش اولدوغوندا ایسه، انسانلارین یارادیجی و یاردیمجی، یوخسا ییخیجی و ییرتیجی اولاراق یئتیشدیریلمیش اولدوقلارینین رولونا فیکیر وئرمه دیگیم کیمی، اونلارین بو، یوخسا اوبیری اؤزللیگه صاحب اولدوقلارینین، ایچینده یاشادیقلاری اجتماعی شرطلرین بیر سونوجو اولدوغونو دا ذهنیمه گتیره بیلمه میشدیم. او زامانا دک یاشام تجربه لریمدن اؤیگرندیگیم بونلارین تام ترسه سی ایدی. وطنداشلاریمین اؤز دیلداشلاری اولاراق، قونشو اؤلکه دن اولان انسانلاری، انسان یوخ، حیوان یئرینه بئله قویمادیقلارینی، اونلارین اوشاقلارینی بئله مکتبه یول یئرمدیکلریندن اؤته، بو اؤلکه ده دونیایا گلدیکرینه قارشین، کیملیک کارتی چیخارتماقدان دا امتناع ائدیلدیگینی گؤرموشدوم. منه، "بو اؤلکه نین وطنداشلیغیندان چیخابیلمزسن" دئیه اسارت زنجیری وورولان توپلومدا، آنامیم اؤیگرتدی دیلیمین بئله یاساقلاندیغینی، "سنینن دیلین یوخدور" دئیه وارلیغیمین هئچه ساییلدیغینی گؤرموشدوم.  آنیتانین آنلاتدیقلارینی ائشیدینجه اختیاریمدا اولمادان آغزیمدان بیر "آها" چیخدی. " دئمک کی بیر توپلومو یارادان او توپلومدا یاشایان انسانلاردیرلار. بو انسانلارین ایسه یارادیجی و یاردیمجی، یوخسا ییخیجی و ییرتیجی اولدوقلاریندا، او توپلومون بونلارا وئردیگی امکانلارا باغلی ایمیش." دیرسکلریمی میزین اوستونه سؤکه ییب، آلینیمی ایکی الیمین ایچینده اوغوشودورماغا باشلادیم. " پاهوو....بو توپلوما ائشیکدن گلن انسانلارین بئله بو توپلوما آیاق اویدورابیلمکلری اوچون امکان یاراتماق، دئملی "اینتگراتسیون سیاستی" یندن سؤز گئدیر. دئمک کی "بو توپلوم امپریالیستی دیر، بوردا قانونسوزلوق ائمک، ایگریلیک، اوغروروق، چاپقینچیلیق، منیم اوچون مشروعدور" فیکری منیم کیمی توپلوما اینتگره اولمامیشلارین، بو توپلومدا اولان امکانلارین اؤزلرینه یارارلی اولمادیغینا اینانان، بو توپلومدا اؤزلرینی یاد و بیگانه حس ائدنلرین باخیشی دیر. وئردیگی وئرگینین اجتماعی امکانلار اولاراق اؤزونه قاییتدیغینا اینانان، خسته لیک بیمه سینه وئردیگی آیلغینین گونون بیرینده اوشاغینین خسته اولدوغوندا، خانیمینین دوغدووندا، اؤزونون یارالاندیغیندا اجتماعی امکان، مجانی دوقتو، داوا –درمان اولاراق اؤزونه قاییتدیغنا اینانان بیر انسان وئرگی وئرمکدن، خسته لیک بیمه سینه آیلیق وئرمکدن قاچماق اوچون سیچان دلیگی آخدارماز کی. "من بیر نفر قاطارا بیلطسیز مینیرم، یاخجی هامی بیلیطسیز مینسه، قاطار ایشلدن شرکت، یوخسا دؤلتین بئله قاطار ایشلدن بؤلومو افلاس ائدر، قاطارلاری ییغیشدیرارلار، من ده قالارام آوارا" دئیه فیکیرلشه بیلن بیر انسان، قاطارا بیلیطسیز مینمز کی.."

آنیتانین دئدیگلرینه اینانماق ایسته میردیم.

 - آخی من آییری شئیلر تجربه ائتمیشم بوردا! بیزه "شایسه آوسلندر" ( کثافت خاریجی) دییرلر.

- اولابیلر، بوردا خاریجی دوشمانی دا وار، فاشیست ده وار، منیم اؤز درس کیلاسیمدا دا بئله انسانلار وار. من بیر سوسیال پسیگولوق اولاراق اونلارین دا توپلومون عمومی دونیا باخیشینی منیمسه مه لری اوچون چالیشمالییام و چالیشیرام.

- اونلار کی ائشیکدن گلمه ییبلر، اونلار نیئه اؤزلرینی توپلومدا بیگانه حس ائدیرلر؟

- هر انسانین دونیا گؤروشو اونون بیرئیسل، اؤزونه اؤزگو تجربه لرینه دایانیر. دئمک کی اونلاری دا توپلومون عمومی دونیاباخیشینی منیمسه مه لرینی اؤنله ین فاکتورلار وار.   

 ایچدن گولومسه یه رک بال رنگلی گؤزلرینی گؤزومون ایچینه تیکدی. "باخیشیمدان ایچیمده کی لری، اونون باره سینده نه کیمی فیکیرلشدیکریمی آنلار" قورخوسوندان گؤزومو گؤزوندن قاچیردیب، ایکی الیم ایله سیخی توتدوغوم بیره بارداغیما تیکدیم. چیگینلریمه بیر آغیرلیق اوتوردو. جانیما بیر یورقونلوق چؤکدو. بئینیم دایاندی. داریخدیریجی بیر وضعیت ایدی. سانکی زامانین آخیشی دورموشدو. باشیمی قاوزاییب آنیتانین اوزونه باخماقدان چکینیردیم. او دا منیم دویغولاریمی آنلامیش کیمی، اوتوراغیندا  گری سؤکنیب، بیر سیگار یاندیردی. من یوخموشام کیمی میخانانین بارینین دالینداکی دوواردا یئرلشدیریلمیش بؤیوک مونیتوردا کئچن فیلمه باخماغا باشلادی.

گونلر، هفته لر آیلار آخیردی. آنیتا ایله ارتباطیم گئت گئده داها یاخینلاشیردی. اونو بیریولداش کیمی، قوهوملاریمدان بیریسی کیمی، بعضاٌ بئله باجیم کیمی حس ائدیردیم. ایلک یول ائولرینه قوناق گئتدیگیم گون، اری ایله تانیشدیغیم آرتیق منیم اوچون گؤزله نیلمز بیر شئی دگیل ایدی. آنجاق بویو منیم ایکی قاتیم اولان جوان اوغلانی "اوغلوم، کریستوف" دئیه تانیشدیردیغی، دوغرودان دا گؤزله مه دیگیم بیر اولای ایدی. سوموکلو، یئکه آداملاری گؤرونجه "آی آلله بو منی بیر یئرده تک توتسا نه ایلرم؟" دئیه قورخاردیم. قوجلو قووتلی بیر جوانین ییرتیجی اولدوغونو بیلردیم. کریستف دان ایسه آنجاق بیر راحاتلیق، بیر ساکینلیک و یاشام هوسی یاییلیردی.

فوریه آیینین باشلاریندا بیر تلفن دانیشمامیزدا:

- کارناوال یاخینلاشیر.

- من کارناوالی سئومرم.

- ایندیه قدر کارناوالا قاتیلمادیغین اوچون.

- یوخ، بیلمیرم. ..... منه گؤره دگیل.

- بیلیرسن، بیزده جوانلی - قوجالی، آروادلی - کیشی لی، ایسته ین هر کس کارناوالا قاتیلابیلر.

- آخی اؤزلرینی حیوان شکلینه سالیرلار!؟

- او آنجاق ظاهر ده دیر. سن بو ایل گل، من ایله کارناوالا قاتیل.

- سن هانسی حیوان اولماق ایسته ییرسن؟

- طاووس

- سن اونسوزدا طاووس قدر گؤزلسن.

- گؤزل گؤزلرین ایله باخیرسان. باخ سنین اوچون ده بیر پلنگ گئیمیم وار. تازا پالتار آلماغا دا گرک یوخدور.

- یوخ، اولماز من پلنگ اولابیلمرم.

- او زامان اوزون سئچ، بیزیم تانیشلاردا هر جور پالتار وار. هانسینی ایسته سن، سنه هدیه وئررلر.

- آخی من بیلمیرم .....

- دؤو اولماق ایسته ییرسن؟

- یوخ

- بوینوزلو اؤکوز اولماق ایسته ییرسن؟

- آها، تاپدیم، ائششک اولماق ایسته ییرم.

- بیلدیگیم قدر ائششکلیک پالتاریمیز یوخدور. او زامان خرجین چیخار، گرک آلاق.

- اولسون، نه اولار، آلارام.

- من دئیردیم سنه بوشونا خرج چیخماسین، بیزده اولانلاردان بیریسینی سئچ.

- خرجی اؤنملی دگیل، ائششک اولماق ایسته ییرم، دوغرو دوزگون ائششک اولماق ایسته ییرم.

- چوخ گؤزل.

کارناوال پنجشنبه سی، کارناوالین ایلک گونو، رسمی اولاراق ایش گونودور. آنجاق ساعات اون بیر- اون ایکی اولونجا بوتون ایش یئرلرینده، کارخانالاردا، اداره لرده، ایش تعطیل اولونور، ایشله ینلر بیر آرایا گلیب، شامپاین ایچمه گه باشلارلار و اوندان سونرا بیر داهاکی سه شنبه یه قدر یالنیز شنلیک، چال - های، ایچمک و خیاوانلاردا قید و بندسیز بیر آزادلیق سورر. آنیتا ایله قارارلاشدیغیمیز کیمی ساعات اون ایکی ده کؤلن اونیورسیته سی نین سوسیال پسیکولوژی بؤلومونون کانتینینده گؤزله ییردیم. آنیتا کانتینه گیردیگینده،  اونو ایلک تانیشدیغیمیز گون گؤردوگوم کیمی تر- تمیز، باهالی خز پالتوونون ایچینده، شاپوسو باشیندا ایدی. بیر آن گئنه "اولمایا یوخو گؤرورم" دئیه اؤزومه شبهه لنمه گه باشلادیم. آنیتا او شکل و شماییلینده دوغرودان دا بیر اونیورسیته معلمه سینه بنزه ییردی. چاره سیز، اؤزومو بونا ایناندیرمالی ایدیم. قاپی دان گیرن کیمی ده منی اوزاقدان ال اشاره سی ایله سلاملاییب، دزگاهین (پیشخوان) دالیندا دوران جوان قیزدان ایکی بؤیوک استکان چای آلیب گتیریب میزین اوستونه قویدوقدان سونرا، قولتوغونون آلتینداکی دوسیه نی میزین اوستونده آچیب ایچینده کی کاغاذلاری یئر- به یئر ائلدرکن.

- باغیشلا، بونلاری بیرآز سلقه سهمانلامالیام. بوگون امتاحان وار ایدی. امتاحان ورقه لرینی سهمانلاییب، دفتریمده کی کومودا قویمالییام. سن تلسمه، اوتور چایینی ایچ من سونرا گلرم.

آنیتا ایشلرینی قورتاردیقدان سونرا، اونون ماشینی ایله اونلارین ائولرینه گئتدیک. اری و اوغلو ایله بیرلیکده گون اورتا یئمگی یئدیکدن سونرا آنیتا ارینه اوز توتاراق:

- تقصیر اؤزونده دیر دا، گلمیرسن، بو ایل کئچن ایلدن ده گؤزل اولاجاق، باخ، هاوا دا سویوق دگیل.

- سیز گئدین، بیلیرسن منیم ایشلریم وار.

اوندان سونرا دا اوغلوندان اجازه آلیب، اوغلونون اوتاغینین قاپیسینی منه گؤستررک:

- گیر او اوتاقدا پالتارلارینی دگیشدیر.

اوتاغیل قاپیسینی باغلاییب، ائششکلیک پالتارلاریمی پلاستیک توربادان چیخارتدیم. سویونوب، ائششکلیک پالتارینا گیرمک ایسترکن بیر ده آینادا گؤزوم لوت بدنیمه دوشونجه، قاباقکیلار کیمی فورم دا اولمادیغیمی گؤردوم. قارنیم قاباغا گلمیشدی. قامتیمی دوز ساخلاماق اوچون اؤزومه زور گتیرمه لی ایدیم. اوزومده کی قیریشلار داها دا درینلشمیشدی. گئنه آیناداکی اؤزومو دانلاماغا باشلادی:

- گئده آلتمیشینا یاخینلاشیرسان! اوتانیب حیا ائله میرسن؟ آلمانلی بیر آروادا اویوب، اؤزوو ائششک ائله ییرسن؟

- بوندان اؤنجه نه ایدیم کی؟ دانیشیلان دیلینی بئله اؤیگرنه بیلمه دیگیم بیر توپلوما دستوالعمل صادر ائدیگیم گونلرده دئملی ائششک دگیل می ایدیم؟

- گئده دوغرودان دا غرب زده اولوبسان ها!

- نه فرق ائله ییر، اؤنجه لری نمنه زده ایدیم؟

- اؤزون بیلرسن، نه پوخ یئییرسن، یئه

- جهنم اول....

دئیه آینایا دالیمی چؤووروب، ائششکلیک پالتارلاریمی گئیدیم. ائششک اولدوغومو گؤزومه سوخماسین دئیه  بیر داها دا آینایا ساری دؤنمه دیم. قاپینی آچیب ائشیگه چیخینجا آنیتا نی طاووس اولاراق گؤردوگومدن کیچیک بیر اوشاق کیمی هوررا چکیب، آتیلیب دوشمه گه باشلادیم. آنیتا ساچلارینی باشینین اوستونده ییغیب کاکول شکلینه سالمیشدی. گؤزلرینین آلتیندا دا ایکی بوینوزا بنزر قارا بویا چکمیشدی. بورنونو قیرمیزی بویامیشدی. چنه سینه ده قیسسا کئچی ساققالی کیمی قیرمیزی بیر شئی باغلامیشدی. یئددی یاخا پولیوردن مه مه لرینین بیرآزی گؤرنوردو. اونون آلتیندا دا قیرمیزی، دار، مئشین بیر جیللیققا دا بئلینین اینجه لیگی گؤزه ووروردو. بئلینه باغلادیغی ائنلی گؤن قورشاقد دوزولموش اولان طاووس قویروغو لئلک لری بیر قویروق شکلینده اطرافینا آچیلمیشدی. اوندان آشاغی دا دا قیسسا بیر اتگی وار ایدی. دیزدن بیر قاریش یوخاریا قدر آچیق ایدی.

بیردن بیره "ای داد و بیداد...." دئیه بیر هارای چیخدی ایچیمدن. بئش - آلتی یاشلاریمدا ایکن سکینه خالا ایله سوره عمه قیزینین اؤزلرینی عمر بایرامی گونونه  حاظیرلیق اوچون بزدیکلرینده سئوینجیمدن آتیلیب دوشردیم. آنیتانین بو حالی ایله چوخ دا فرقلی اولمازدیلار. سئوینج ایله بزنردیلر، اوز – گؤزلرینی بویاردیلار، عجاییب عجاییب پالتارلار گئییردیلر. سونرالاری، بیر آز دیرچلیب، اون ایکی - اون اوچ یاشلاریما چاتدیقدان سونرا، آروادلاری او شکیلده گؤرمگی چوخ ایستردیم. آنجاق بیز یاشداکی اوغلان اوشاقلارینی یاخینا قویمازدیلار. گیزلینجه دامدان - باجادان گئدیب باخاردیق. بیر یولدا مندن اوچ – دؤرد یاش بؤیوک اولان عمی اوغلوم اکبر ایله دام یولوندان کوسا جعفرقولو گیلین حیطلرینده عمر بایرامینا باخدیغیمیزدا، آروادلارین بیر پاراسی نین دؤشو، قیچی آچیق ایدی. بیر ایکی سی قاوال چالیردی. اوبیریلرده اویانییردیلار. آمما او اویناماق تویلاردا فیلاندا اولان اویناماقدان چوخ فرقلی ایدی.  گنج بیر آرواد قاوالین ریتمی ایله بئلینی بورجوداراق، شاپالاق ایله قیچلارینین آراسینا وورا وورا اوخویوردو:

" عمره گتیردیلر هولو،

اونو یئدی سولو سولو.

یئمه سه ده یئسین بونو،

یئمه سه ده یئسین بونو"

توربادان - تلیس دن میتقالدان، جیندادان گوبوت، یئکه بیر قولچاق دوزلتدیب، قوللارینین آلتیندان بیر ایپ ایله توت آغاجیندان آسمیشدیلار. آیاق اوسته دوران بیر اؤلویه بنزه ییردی. اورتادا گؤتونو بورجودان آرواد آرادا بیر گلیب او قولچاغا دالیسینی چوئیریریردی. یاندا دوران بیر آرواد دا قهقهه ایله گولرک قولچاغین باشینی اگیب اوبیرینین گؤتونه یاپیشدیریردی. ایکیسی بیر آرادا آغیزلاری ایله اوستوراق سسی چیخاردیردیلای. آروادلار هامیسی قاققا باسیب گولوردولر.

دام یولوندان گیزلینجه باخیردیق. دریمین اوستونده آیاقلاریندا پامبیق اولان قاریشقالار یئرییر کیمی بیر دویغوم وار ایدی. عؤمرومده ائله خوش بیر دویغو حس ائتمه میشدیم. بیر یول سویوق دیمه می توخداتماق اوچون آنام ایلیق سودا تیریئک اریدیب منه ایچیرتمیشدی.  اوندا بئله بیر خوش دویغویا یاخین بیر شئی حس ائتمیشدیم.

اکبر دیشلرینی قیسیب، آغزینی یاییب، دوداقلارینین آراسیندان نفس چکه چکه قیچلارینین آراسینی اوغوشدروردو. آرادا بیر ده "جان، گئتیر منیم آغزیما قوی" دئیه   پیچیلداییردی.  نئیه ائله ائله دیگینی آنلامیردیم.

قاپیدان چیخارکن آنیتا ارینه بیر داها اوز توتدو:

- باخ، هله گئج اولماییب، ایسته ییرسن گل بیرلیکده گئدک.

- یوخ، بیلیرسن، من بو ایل گئتمه یه جگم، ائوده اوتوروب دالی قالمیش ایشلریمی گؤروم. سمیناریما دا ایکی هفته دن چوخ قالماییب. آرتیق جددی بیر شکیلده حاضیرلانمالیام.

تسولپیشر پلاتس دا ایگنه سالماغا یئر یوخ ایدی. جوانلی - قوجالی، آروادلی - کیشی لی، هامی بیربیرینه قاریشمیشدی. ایت یئیه سینی تانیمیردی. هر یئر بوش بیره شوشه سی، عراق شوشه سی، بیره قوطوسو، ایچجک پلاستیگی ایله دولو ایدی. هرکس اؤزونو بیر حیوانا، هیولایا، پادشاها، عربه، کانگستره، دؤوه بنزتمیشدی. گروه گروه قیزلی - اوغانلی اللرینده ایچگی شوشه لری ایله اوجا سس ایله اوخویاراق اویناییردیلار. کلیسانین قاباغینداکی بوشلوقدا نئچه نفر ایش پالتاریندا بیر جرسقیل ایله آلمانین صدر اعظمی اولان  آنجلا مرکل این مجسمه سینی نصب ائله ییردیلر. آنجلا مرکل این گؤبکدن یوخاریسینی ایکی متیر بویدا بیر مجسمه ائله میشدیلر. اوشاق پالتاریندا ایدی، چهره سی ده اوشاق کیمی ایدی. بوینوندان بیر امزیک آسیلی ایدی. آغلایان بیر اوشاق کیمی آغزینی بوزوب، گؤزلرینی قیسمیشدی. گوز یاشلاری دا قارا آخینتی کیمی آشاغی سوزولوردو. مجسمه نین آشاغیسیندا ایسه بوتون مجسمه نی بیر حلقه کیمی ساران ائنلی بیر پلاکارتدا مجسمه نی  دوزلتدیرن کارناوال انجومنینین آدی، "ائرنفلد کارناوال انجومنی" و تلفن نمره سی، اینترنت آدرسی تکرار تکرار یازیلمیشدی. جماعاتین چوخو مجسمه نین اطرافیندا ییغیشیب، اوخویوب اوینارکن آرادا بیر ده فیشقیراق چالانلار اولوردو. ساغ اول، چوخ ساغ اول، یامان طرح دیر. دئیه باغیرانلار. آنیتا الینده کی بیره شوشه سینی منه وئردی. جیبیندن موبایل تلفونونو چیخاردیب، مجسمه دن بیرنئچه شکیل چکدیکدن سونرا،  چپیک چالاراق هورراا دئیه باغیرماغا باشلادی. اونون آردیندان بوتون جماعات هوررا دئیه باغیراراق چپیک چالدیلار. آنیتا بیره شوشه سینی مندن آلماق ایسترکن بیر ده گؤزومون ایچینه باخاراق:

- گؤرورسن نئجه یاراشیب؟ بو طرحی وئرن کارناوال انجومنینه بئش یوز اویرو باغیش وئرمه لییم"

 دئدی. باشیمین ترپتمه سی ایله سؤزونو دوغرولارکن، "بیزده دیریسینین یوخ، اؤلوسونون بئله آنجاق چاتیق قاشلاری ایله غضب پوسگورن باخیشلاری و تهدید بارماغینی یوخاریدا گؤسترن  شکیللرینی زور ایله اداره لرده، مدرسه لرده نصب ائدیرلر" دئیه فیکریمدن کئچدی.

"دراخن هاوس" میخاناسینین قاباغینا یئتیشدیگیمزده آنیتا، "یاخچی ائله دین گلدین، بوگون سنی بوتون اوستادلاریمیز ایله، پروفسورلاریمیز ایله تانیشدیراجاغام. اونیورسیته نین کارناوال انجومنی بو میخانانی بو آخشام هیئت اساتید اوچون سفارش وئریب" دئدی.

میخانانین قاپیسیندا دوران جوان، پولیس یونیفورمونا بنزر پالتاریندا، اوجا قامتی، شستلی دورشو ایله قورخو پوسگوروردو. آنیتا یاخینلاشینجا باشینی بیر آز اگرک، "خوش گلیبسیز، بویرون دئدی. آنیتا کیفیندن کارتینی چیخاردارکن منه اشاره ائدرک "بو دا منیم قوناغیمدیر" دئدی.

میخانادا اوتوز- قیرخ نفره یاخین آدام وار ایدی. آروادلی -  کیشیلی، بیر چوخونون یاشی اللی دن یوخارینی گؤستریردی. هر بیری اؤزونو بیر شکله سالمیشدی. بیریسی میمون اولموشدو، بیریسی دووشان، بیری سی قدیمی پادشاه، کانگستر، عرب، معدن ایشچی سی، اورکستر رهبری، سوپورگه چی، .......ائششک اولان ایسه بیر تک من ایدیم. باشیندا ساریغی، چیگینینده عباسی اولان دا یوخ ایدی.

آنیتا یاخیندان یولداشلیغی اولانلارین هامیسی ایله منی تانیشدیردی. سونوندا ایسه سالونون دیبینده معلول چرخی اوستونده اوتوران یئتمیش یاشینی گؤرسه دن بیر خانیما یئتیشدیک. اوز- گؤزونو بویامامیشدی. آنجاق هر یاناغیندا کیچیک، قیرمیزی بیر اورک شکلی چکمیشدی. بیر میطباق اؤنلوگو گئیمیشدی. ساغ چیگینیندن پلاستیک بیر مالاغا، سول چیگینیندن ده بیر کفگیر آسیلی ایدی. دئمک کی بو دا اؤزونو ائو آروادی شکلینده بزه میشدی. آنجاق معلول چرخی اوستونده اوتوردوغو ایله، ائو آروادلارینین اجتماعی فعالیتدن اوزاق توتولاراق معلول شکلینه گتیریلدیکلرینی دیله گتیرمک استه دیگینی،  یوخسا دوغرودان معلول اولدوغونو آنلایابیلمه دیم. آنیتا چوخ سایغی ایله اونا یاناشاراق ال وئردی و اوبیریلرین هامیسینین کیچیک آدلارینی دئدیگینه قارشین، بو خانیم ایله منی تانیشدیرماق ایسته دیگینده چوخ سایغیلی بیر شکیلده "فاکولته میزین رئیسی، خانیم پروفسور نوی بورگ" دئیه تانیشدیردقدان سونرا، "ایندی آرتیق سن آزادسان، یئمه گه - ایچمه گه، هر شئیه قوناقسان. جانین ایسته دیگینی یئه، جانین ایسته دیگینی ایچ، جانین ایسته دیگی ایله دانیش - صحبت ائله" دئدی.

گئجه یاریسیندان سونرا، ساعات ایکی یه یاخین میخانادان چیخدیغیمزدا آنیتا قهقه چکرک "خیاوانا چیخینجا ائششک اولمالیسان" دئییب، ائششکلیک پالتاریمین بؤرکونو باشیما چکمک ایسته دیگینده الینی توتدوم:

- پروفسور نوی بورگ چوخ ساده بیر خانیمدیر. اؤزونو ائو آروادی بزه میشدی.

- چوخ یاخچی خانیمدیر.

- اؤزونو ائو آروادی بزه دیگینی آنلادیم دا، معلول چرخینده اوتوردوغونون آنلامی نه ایدی؟

- او دوغرودان معلول دور. آیاقلارینی گؤرمه دین؟ بئلدن آشاغی سی ایگیرمی سانتیم دیر. مین دوققوزیوز اللی لی ایللرده بویلو قادینلارین اورک بولانماسینا و یوخو راحاتسیلیقلارینا قارشی کونترگن آدلی بیر داوا ایشلنیلیردی. او داوادان ایشلدن بویلو خانیملارین بیر پاراسینین اوشاقلاری بئله ناقیص چیخیب.

" دؤرد – بئش ساعات اوردایدیق. او خانیمین چرخدن قالخدیغینی گؤرمه دیم. بو قدر زامان ایچینده آیاقلارینی دا گؤرمه دیم. دوغرودان دا بیر ائشک ایمیشم من" دئیه فیکیرلشه رک ائششکلیک پالتاریمین بؤرکونو باشیما چکدیم.

 خیاواندان ال - آیاق بیرآز چکیلمیشدی. هر طرف توپوغا قدر زیبیل ایدی. بیره شوشه لری، پلاستیکلر، پیتسا کارتونلاری، پلاستیک یئمک قابلاری هر طرفی توتموشدو. بیرچوخ یئرده یاریم متیره یاخین قطرینده دایره شکلینده آچیق یاشیل، سولاق، قوسوقلار گؤرونوردو. بیریسی دوارلاردان توتا - توتا یئرییردی. بیریسی بیر پیلله کانین اوستونده اوتوروب یوخلامیشدی. جوان اوغلانلار ایله قیزلار بیر- بیرینه توتوناراق خیاوانین همی ائنینی، همی بویونو یئرییردیلر. بیریسی دالیندا آسما چانتا، هر ایکی الینده بؤیوک پلاستیک توربالار ایله زیبیللره قاریشمیش سو پلاستیلکرینی، بیره شوشه لرینی ییغیردی. نئچه نفر ایش پالتاریندا، اللرینده ائنلی پلاستیک سوپورگه لر ایله زیبیللری سوپورورب، جوما - جوما ییغیردیلار. بیر نئچه سی ده دالیدان گلیب زیبیل جومالارینی ماشینا یوکله ییردیلر.

یورقونجا، یاواش یاواش یئریرک تسولپیشر پلاتسا یئتیشدیک. تسولپیشر پلاتس داکی کلیسا نین قاباغینداکی بوشلوقدا آنجلا مرکلین ایکی - اوچ متیر بویدا اوشاقلیق مجسمه سی یالنیز قالمیشدی. یئره - گؤیه آغیز اگیردی. کلیسانین اوبیری گوشه سینده، هوهن اشتاوفن رینگ ده، قوجامان چینار آغاچلارینین آلتینداکی تاکسی دوراغیندا دوروب گؤزله دیک. بیرینجی تاکسی دوراقدا دوردو. شوفر فرمانین دالیسیندان بیر آز اگیله رک الی ایله بیزه "بویورون" اشاره سی وئردی. آنیتا قاباق قاپینی آچدی. اوتورماق ایسته دیگینده طاووس قویروغو ماشینا گیرمه سینه مانع اولدو.

- باغیشلایین، من قویروغومو آچسام، دالی جعبه یه قویابیلرم؟

شوفر آشاغیدان یوخاری آنیتانین قیچلارینا باخاراق، منیم ده یاخچی آنلایابیلدیگیم بیر دیلده، دام یولوندان عمی اوغلوم اکبر ایله بیرلیکده عمر بایرامینداکی آروادلارا باخیدیغیمیز گون اکبرین آغزینی یاییب، دوداقلاری آراسیندان نفس آلدیغی کیمی بیر سس تونوندا، "جان، التداکی لاری دا چیخارتسان لاپ یاخجی اولار" دئیرک آشاغی ائنیب دالی صاندیغین قاپیسینی آچدی. آنیتا بئلینده کی قورشاغا باغلی قویروغونو آچیب، سلقه سهمان ایله دقتتلی بیر شکیلده دالی صاندیغا قویدو. من ایسه ائشکلیک ماسکیمی چیخارتمادان دالی صندلده اوتوروب، ائششکلیک ماسکیمین بوتون اوزومو توتوب توتمادیغینی شوفر آیناسیندا کنترل ائتدیم. دوغرودان دا بوتون بیر ائششک ایدیم. اوزومده آداملیقدان هئچ بیر شئی گؤرنموردو. آنیتا قاباق صندلده اوتوروب آدرس وئردی. یولا دوشدوک. شوفر آیناسیندان شوفرین اوزونو گؤره بیلیردیم. تانیمادیغیم بیریسی ایدی. اوتوز ایل ایچینده کؤلن شهرینده راست گلمه دیگیم بیری ایدی. اوزونون دریسی رحمتلیک سلطان خالانین قیش گونو حیطده یوغوب سردیکیندن سونرا دونان اوشاق اسکیسی کیمی قیریش قیریش ایدی. بیلمیرم، بلکه بو روحونون دا بئله قیریش قیریش اولدوغونون بیر گؤرونتوسو ایدی؟  گؤزلرینده موذی بیر درینلیک وار ایدی. انسانین گؤزونه باخدیغیندا سانکلی بیلمک ایسته دیگی بیر شئیلر وار ایدی. باخیشی ایله سانکی انسانین ایچینی آختاریردی. آنجاق بو آختاریشدا سویوق  فضوللوق کیمی بیر شئی وار ایدی.

 آنیتا ایله دانیشماغا باشلادی.

- قویروق یاراشماق سیزه گوزل.

- تشکر ائدیرم. ساغ اولون.

شوفر قاپینین تاخجاسیندان قارا بیر ماسک چیخارتدی. اوزون سو، آنجاق کیچیک بیر ماسک ایدی. دیمدیگه بنزه ین اوزون سو ماسکی بورنونون اوستونه قویوب، کئشینی باشینین دالینا سالیب،  قیقیلدایا – قیقیلدایا گولرک باشینی آنیتایا ساری چئویردی:

- سیز اولماق طاووس، من ده قارقا، قارا قارقا

بیر آز سوسقونلوقدان سونرا:

- سیز یاشاماق کؤلن؟ اطرافدان گلمک کؤلن؟

- خیر من کؤلن ده یاشاییرام.

- چوخ واقت سیز یاشاماق کؤلن؟

- خانواده اولاراق کؤلن دن ایک.

- ایش گؤرمک هانسی؟

- درزی اولاراق ایشله ییرم.

- توکان اؤزز؟

- خیر، کاوف هوف دا درزی اولاراق ایشله ییرم. سیز نئجه؟ چوخداندیر آلمانیاداسینیز؟

- من گلمک مین دوققوزیوز سکسن آلتی.

- سیزلردن چوخو تحصیلاتلی دیر. بیر نئچه سینی تانییرام.

- من ده قورتارماق اونیورسیته. آمما بوردا سورمک تاکسی. مدرکیم رسمیت تانیماق یوخ.

- بس نئیه گلدیز آلمانیایا؟

- من حق، عدالت ایستتمک. بیزیم مملکت یوخ عدالت. من ساواشماق اوچون عدالت.

- آنلاییرام

- من همیشه عدالت ساواشماق. بوردا دا ساواشماق. من سوسیالیست. سوسیالیست، عدالت، من سوسیالیست.

- آنلاییرام

- من سوسیالیست، عدالت، لنین، بیزیم مملکتده ده سوسیالیست، عدالت، لنین اولماق.

 آنیتا آرتیق جواب وئرمدی.

شوفر داریخماغا باشلادی. بورنونا تاخدیغی قارقا دیمدیگینی چیخاردیب،  فرمانین اوستونده کی کیچیک کلاویه ده بیر نئچه نمره توتدو. نئچه ثانیه سونرا تلفن سسلنمه گه باشلادی. آلمانجا یوخ، آنجاق منیم و آنیتانین دا یاخچی آنلایابیلدیگی بیردیلده،

- سلام، نه وار نه یوخ، هایانداسان؟

- هؤنینگر پلاتس دا.

تلفونون اوبیر طرفیندن گلن سس تونو بیردن بیره ذهنیمده یاراتدیغیم فیروزو خاطرلاتدی

- یاخچی ایشله یه بیلیبسن؟

- یئددی یوزو دولدورموشام؟

- او گئده لر ایله دانیشدین؟

- هن

- نه دئدیلر؟

- اونون دیکته سینده، گرامرینده قلط اولسا باخاریق، دوزلدریک دئدیلر.

- بابا او یازی باشیندان دیبینه معنی سیز بی شئی دی ائی.

- دئیرلر بیزیم معنا سی ایله ایشیمیز یوخدور.

- اوبیری گئده نین شعرینه نه دئدیلر؟

- دییوس اوغلونون؟

- هه!

- آقا، سنین دئدییوی قبول ائله میرلر.

- نیه؟

- دئییرلر او سندن قدیمی دیر.

- یانی نه مه نه؟

- بیلمیرم، قبول ائله تدیره بیلمه دیم.

- گئده نه قدیمی، نه جدیدی. سؤزنو یئریتمه لی سن. اولماز کی، او شعرده جفننگیاتدان  آیری بیر شئی وار؟

- دئییرلر بیزیم پرینسیبیمیز سؤز آزادلیغی دیر.

شوفر بیردن بیره پؤرتوشدو:

- سیچارام اولارین پرینسیپلرینه ده، سؤز آزادلیقلارینا دا، بیز بیر یول بئله قارارا گلدیک، بئله اولمالی دیر. قورتولدو!  به بو قورومساق دئیلدی "بیرانی لمپن خانا قئیریبسوز" دئیه بیزیم توفاغیمیزی داغیتدی. نه وار، بیری گلیب اوردا قاوال چالیر. ایندی بیز بو قورومساغین هر یازدیغی جفنگیاتی اوردا یایمالییق؟  قیرخ ایلدیر من آزادلیق اوچون ساواشیرام. بیزیم صفحه میزده او شعری گؤرن آداما نه دئیر؟

- آقا گل اؤزون دانیش.

- گئده قانمیرسان، منه نه دئیرلر آخی؟ من ساده بیر عضوم. منه دئیرلر سنین  بو ایشلرده فیکیر وئرمه گه حاققین یوخدور. بس سنی نئیه سوخدوق او هیئت مدیره یه ....

- اده، سن باخما اوبیرینه، پیرت ائله دیک چکیلدی قیراغا، او آبیریلی حیالی بیری ایدی. بو گئده  س..ک اوزلونون تکی دیر، قهبه شوونی سالار، بیزی بئی آبیر ائدر.

- اونون شعرینی یایساخ، دئملی بیزده آبیری قالاجاق؟ بیزیم صفحه میزده او شعری اوخویان بیزه نه دئیر؟ اوتوز ایللیک آبریمیز توکولر واللهی. بو گئده نین او ناغیلینی دا قویمایین دئدیم. سؤزومه قولاق آسمادیز. خوب او ناغیل ائله آچیق ساچیق دئیل، هر کس بیلمز بو گئده نه دئمک ایسته ییر.

- من ایندی شهره ساری گلیرم. ابرت پلاتس دا گؤروشک، یاخیندان دانیشاق.

شوفرین حیرسی سویوموش کیمی بیر نفس آلاراق:

- یاخچی، قوی من ساباح بیرده برلین ایله دانیشیم، گؤرک اوردان نه دئییرلر.

شوفرین اوزونون قیریشلاری بیرآز آچیلدی. نارین نارین گؤلمه گه باشلادی.

- مسافیرلرین نه جور ایدی بوگون؟

- آ کیشی، بوگون کارناوال پنجشنبه سی دیر، کئفلی دن مئفلی دن مینیر دا.

- خبیرین یوخدور، من بیر طاووس میندیرمیشم. ائله بیر بهشدن تازا چیخیب

- نئجه یانی طاووس.

- واللهی، دوز طاووسون اؤزو.

- گؤزل دیر؟

- بابا دوز طاووسون اؤزودو با. گؤتونه تاووس قویروروغو باغلامیشدی. ماشینا مینه بیلمه دی. قویروغونو آچیب، دالی صاندیغا قویدو. قویروغونو آچینجا لومبولو لوت اولدو، اوچ بارماقلیق بیر اتک گئییب.......... بئله ده نازلانیر.

- تک دی؟

- یوخ یانیندا بیر ائششک ده وار.

- ائششک قانجیخ دی؟ یه ارکک؟

- بیلمیرم او پالتارین چیخاتمادی. آمما ارکه یه بنزه ییر.

تلفنون او بیری یانینداکی تویوق کیمی قیققیلدیایاراق:

- گئتیر، آپاراق بیر یئره، طاووس منیم ائشک سنین....

- سیزینکیلر قوناق گئدیب؟

- بابا، تعطیله گئدیبلر...

شوفر ایچدن قیققیلدایا قیققیلدایا گولدو:

- طاووس منیم، آمما ائشه گه پوشک آتاجاغوق.

 اؤزومو ائششکلیک ماسکی دالیندا گیزلتمیشدیم، سسیم چیخمیردی. آنجاق آنیتانین دا بو دانیشیقلارین هامیسینی یاخچی آنلادیغینا آرخایین ایدیم. اونون هئچ بیر شئی آنلامامیش کیمی راحات، سویوق قانلیجا اوتوردوغونا حیران ایدیم.

بو آرادا آنیتانین ائوینین قاباغینا یئتیشمیشدیک. ناویگاتسیون "مقصدینیزه چاتدینیز" دئینجه شوفر تورموز ائله ییب، دوردو.

آنیتا وئردیگی اللی اویرولوغون قالانینی آلماق ایله مشغول ایکن، من ائنیب "کشگه عؤمرومون سونوناجان ائششک قالسام" دئیه آنقیرا آنقیرا تاکسی دان اوزاقلاشدیم.

سون

 

  

 

 

Share/Save/Bookmark
 
آدرسهای ما - Follow us

YouTube

 -----

Facebook

----- 

Twitter