آذربایجان قادینی‌نین بوغولموش سسی- مهسا مئهدیلی
فئمئنیزم سؤزونو ایلک کز چارلز فئورییه (19.قرنین سوسیالیست‌لرین‌دن)قادین حاق‌لارینی ساوونماق ایچین قوللاندی. فئمئنیزمین بیرینجی دالغاسی قادین‌لارا اوی حاقی قازانماق آماجیلا20.عصرین بیرینجی یاری‌سیندا باشلاندی و آردیجا ائورنسل یاسا‌لارین گلیشمه و یئنی‌لشمه‌سیله اویغون 2. و 3. دالغا‌لاریدا یاراندی. نه ایسه فئمئنیزمی اؤزل بیر قابسامدا آچیقلاماق اولماز، آنجاق فئمئنیزم گئنل آنلامیندا قادین‌لارین جینسی اؤزل‌لیک‌لرین‌دن دولایی اوغرادیق‌لاری حاق برابرسیزلیگینه قارشی اولان بیر دوشونجه ساییلیر.
هر توپلومون مدنی یاسا‌لاری و یاشام کولتورو یاشام قورال‌لاری و گئچمیشده یاشادیغی تاریخیله اویغون فئمئنیزمی اؤزل یؤنئتیمده اولوشا بیلر. آما فئمئنیزم گاه اؤزونو بیر رادیکال قادینچی و قادینی ارکک‌دن اوستون توتان بیر فورومدا اؤزونو گؤرسه‌دیر، بئله بیر فئمئنیزمده ارککله قادین بیربیرینه قارشی ساییلیر و اینسان حاق‌لاری یئرینی ارکک‌سیز یاشام یا ارکیی آشاغی گؤرن یؤنتم توتور. آشیری فئمئنیست‌لر فئمئنیزم آدینا اینسانی ایکی پارچایا بؤلورلر و بیر جینسی او بیری جینس‌دن اوستون توتورلار. برابرلیک‌دیر و اؤزلریده اؤزلرینی ارکک یاپی‌سیلا یاشاییرلار.بون‌لارا گؤره قادین یا ارککقادین‌دیر یا دا ارکک‌لره قادین...
آذربایجان توپلومودا اؤزل‌لیکله بو گونکو اینسانی میللی حاق‌لارینی قازانماغا قالخیش دوروموندا اولدوغونا گؤره قادین‌لارین رولو و دوشونجه یاپی‌سی توپلومسال بیر دئییشیم ایچری‌سینده فئمئنیزمی اؤز اینسانی‌نین دورومونا اویغون و توپلومون بوتوو‌نون اینسان حاق‌لارینی قازانماغی اوغروندا یارادیب، تانیتدیریماغی چوخ اؤنم‌لی‌دیر. اینسانی حاق‌لاری و کیم‌لیگی تاپتالانیب تالانمیش بیر میللتین یاشام قورال‌لارینی دئییشمه او میللتین اجتماعی سیاسی دوشونجه‌سی‌نین ساغلام بیچیمده فورمالاشماسین‌دان آسی‌لی‌دیر. قادین هر توپلومون یاری‌سی دئمک‌دیر. میللتین پروتئست روحون‌دان یارانان هر حرکتین یاری‌سی دئمک‌دیر و بو یاری توپلومو ائییتمکده ان اؤنم‌لی رولا صاحب‌دیر. آیدین‌دیر کی دونیا گوندمینده اؤز میللتینه و اینسانینا اؤزگور بیر کیم‌لیک قازانماق ایسته‌ین اؤزگورچو بیر دوشونسل سیاسال موباریزه اؤنجه‌لیکله اؤز ایچری‌سین‌دکی موباریزه روحونو بوتوونلشدیرمه‌لی‌دیر. آذربایجان قادینی ایستر اوخویان ایستر اوخومویان ایستر موباریز قادین ایستر مطبخ قادین‌لاری، بیرینجی درجه‌ده بو توپلومون و ایکینجی درجه‌ده بو دئییشمک ایسته می روحونون یاری‌سی‌دیرلار. اؤنجه‌لیکله بیر حاق‌لاری تاپتالانمیش میللتین اینسانی اولا‌راق و سونرا توپلوم کولتورونون جینسی باخیمین‌دان قایناق‌لانان حاق‌سیزلیق‌لاردان دولایی اؤزونه اؤزل بیر فئمئنیزم حرکتی یئیه‌لنه بیلجک قدر گوجلنمه‌لی‌دیر. بو حرکتین ائتکن‌لری و قورا بیلجگی یؤنتیم و چالیشدیغی یؤنتمی تاسارلاماق ارککله قادینی آییرما‌دان میللی اینسانی بیر دوشونسل گوج بیرلیگین‌دن آسی‌لی‌دیر. بو قونودا قادینیمیزین یئرینه و گونجل رول‌لارینا باخماق یارارلی اولا بیلر یعنی ندن و نئجه (آزربایجان قادین ) حرکتی اولوشما‌لی‌دیر ؟
1.ایرانین اینسانی حاق‌لارا چالیشان آیدین دوشونجه‌لی آدینی داشییان حرکت‌لرین همیشه آذربایجان اینسانینا فاشیست بیر توتومدا اولدوق‌لاری ثابت اولوب. پانفارسیستی دوشونجه‌لر باشقا میللت‌لرین اینسانی حاق‌لارینی گؤرمه گؤزلرینی باغلایان بو اینسان‌لیق ساوچی‌لاری هله سویچولوق‌لارینی ساوونماقلا دوشونجه‌لرینی آیدینلا‌دیرلار بو ضیا‌لی‌لارین هر زامان آذربایجانا قارشی سرت و باغلی توتوم‌لاری اولوب اؤرنک ایچین زنیستان آدلی آدلیم فئمئنیست سیته لری آذربایجان‌لی قادین موباریزلرین آدینی و توتوقلانما خبرلرینی یایمادی او حالداکی کوردوستان میللی حرکتی‌نین خبرلرینی گئنیشله یاییردی، یعنی بیزیم قادین میللی اینسانی حاق‌لارینی آذربایجان آدیلا قازانماغا موباریزه ائله‌سه بو قادینلیغین داشین سینه لرینه دؤین فئمئنیست‌لرجه گؤرونممه‌لی‌دیر.
2.آذربایجان‌لی قادینین یئری نورمال توپلوموموزدا نه اولدوغو هامیمیزا آپ آیدین‌دیر .او بیری میللت‌لره دیل‌سیز قادین‌لاریمیزی یاخشی آشچی اولا‌راق تانیتدیردیغیمیزدان نه یؤنده گلیشمیش اولدوغوموزون بلگه‌سی‌دیر. اوخویان اوخومایان آراسیندا یاخشی قادین اولگوموز ثابت‌دیر،قادیندا ائولنمه‌یه و اوشاق دوغماغا آلینان ائولی‌لیک قیدالاریندان‌‌دیر و یاخشی قادین‌لاریمیز سئویلن کوسن آیاق‌لاریدا دیل‌لری تک باغلی اولان گول‌لردی‌لر بیزیم اوچوب اؤتن بولبول ارکک‌لریمیز قادین‌لارینی گولولدوق‌لاریندا سئورلر...اوخویوب اوخومایان قادین اولگوسونون تک آیریمی اوخویان‌لارین فارسجا ساوادلانمیشلاریندان ایتیردیک‌لری من‌لیک‌لری‌دیر
توپلومون ازیلمیش تالانمیش کیم‌لیک قایغیلاریندان قایناق‌لانان میللی اینسانی حاق‌لاری قازانماق ساواشیندا دا قادین‌لارین رولو و یئرینی اینجه‌لمک گلیشمیش مودئرن بیر دوشونجه یاپی‌سی‌نین قورولوشو و سونوجوندا گلیشمیش بیر اؤزگور جامعه‌یه یئه‌لنمک ایچین ان اؤنم‌لی ندن‌لردن‌دیر. بیر داربا داغیم توپلومون آجی‌لارینی چیگین‌لرینده داشییان قادین‌لار هئچ بیر زاد ایستمه‌دن و آرخا سیرا‌لاردا اولدوق‌لارینادا اعتراض ائتمه‌دن وفا‌لی اولدوق‌لارینی ائشلرینه و میللت‌لرینه بو شکیلده گؤرسه‌دیرلر. بیلیم یوردلاریندا توم حده‌لرین قورخولارین ایچینده اولان قهرمان قیزلار بو موباریزنی آیاقدا ساخلاماقد، قادین اولدوقلاریندان دولایی اؤزل حاق‌سیزلیق‌لارا اوغراییرلار. و آغیر دیرلری اؤده‌یه‌رک ده یا مین تورلو یول‌لارلا آلان‌دان چیخاریلیرلار.
...
تالانمیش وارلیغینی قازانماق اینانجیندا اولان بیر توپلوم اؤز اینسانینی و اینسان حاق‌لارینی سایماق آدینا قادینی‌نین دورومونا یئنی‌دن باخیب یاریمچی‌لیق بیر موباریزه روحونو او بیر یاری‌سینیدا یاشاماق و آنلاماق گریینده‌دیر.بو تکجه قادین‌لارین یولا چیخماسییلا باشاریلا سونلانماز ندن کی قادین ارکک آیریمی گوجو ایکییه بؤلر .بو توپلومو قورتارماق ایسته‌ین دوشونجه لر، ایستر قادین ایستر ارکک اولسون بیرلشیب آذربایجان موباریزه دورومونون گرکدیگی قادین حرکتینی یاراتما‌لی‌دیرلار. قادین گوج‌لری‌نین اؤزگه فئمئنیست موباریزه‌لرینده هدر اولماسی‌نین انگللمه‌سی ایچین میللتی‌نین یاری‌سینا باخما‌دان باشاری‌لی اولا بیلمز. آذربایجان قادینی قادینجیل حاق‌لارینی قازانماق ایچین بو میللتین بل‌لی دوشمان‌لاری اولان حرکت‌لره سیغنماق زوروندا قویماماق آغیر و ائتکی‌لی گؤرو‌دیر. بو سورون‌لاری اینجه‌له‌ییب گونجل قادینین ایستکلرین گؤرمک و ائنئرژی‌لرینی اؤز میللتیمیز ایچین قازانماق مدنی موبازه‌نین باشاری گوونجه‌سی‌دیر. آذربایجان قادینی اؤنجه تورک‌دور سونرا قادین و بو یعنی یا ایرانین مودئرن حرکت‌لرینده تاپتالانماق یادا توپلوم کولتورونون بوشلوقلاریندان یارانمیش نقس‌لرده بوغولماق. زنگین گئچمیشیمیزین موباریز اولگولرینه یئنی‌دن باخماق، آذربایجان توپلوموندا قادین‌لارین یئرینی، گوج‌لرینی و دوشونجه یاپی‌لارینی اینجه‌لمک، قادین‌لارین اینسانی حاق‌لارینی تانیماق و بئینیمیزدکی بوشالتدیغیمیز گونجل موباریز قادینین یئرینی دولدورماغا اوزون و قوتلو بیر یولا چیخماق آزربایجانین گلجیینی نه بیچیمده قوراجاغیمیزین گؤسترگسیدیر
