سن و من- محمد احمدی زاده
بیر عؤمور دانیشدین سنی دینله دیم
بیر کلمه ده، سن دینله سن منه بسدیر
مین بیر یارا ووردون هئچ دینمه دیم
بیر شیرین سؤزله گلسن منه بسدیر
امیشدیردیم هر گئجه سنی قوجاغیمدا
اؤز اوشاغیم دا بیر گئجه امسه منه بسدیر
بؤیوتدوم سنی دیل آچدین ایستی یاتاغیمدا
مندن آیری بالام دا، آنا دئسه منه بسدیر
هر گئجه قالدین ائویمده اؤولادیم کیمی
اؤز اؤولادیم دا بیر گئجه قالسا منه بسدیر
دانیشدیم هر گون دیلینده اؤز دیلیم کیمی
اؤز دیلیمده بیر گون دانیشسا منه بسدیر
دیلینده دانیشیب دینله مه یی اؤیرنمیشم
دیلیمده ده سن دینله مه یی اؤیرن، منه بسدیر
هر دیلده سئو دئییب آنام من دینله میشم
سن ده بیر دیلده سئویرم سنی اؤیرن، منه بسدیر
سن گول من ده باغبان اولدوم بو بوستاندا
باغدا هر یانا عطیر ساچسان، منه بسدیر
بیر گون من ده ایسترم گول اولوم یانیندا
سن ده باغدا گول یولماسان منه بسدیر
اوزاتدیم الیمی هر یئرده توتدوم قولونو
آیاغینی اوزاتماسان آیاغیما منه بسدیر
من سنین سیلیب سوپوردوم یولونو
سن ده داش آتماسان یولوما، منه بسدیر