آلت طرف ائله قیشقیردی کی، اورتایا چیخان کولک دالغاسی سایه سینده تووالئت داشینین قاپاغی، دیوارلا کوره یین آراسیندا دالغالانمایا باشلادی.

- یوخ. من دئموکراتیک حاقلاریمدان فایدالانماق ایستیرم.

ان یاخین یولداشی مثانه کیسه سی اونون هیرسینی یاتیرتمایا چالیشیب دئدی:

- ساکیت اول دوستوم. سنین ایسته دیگین شئی ایمکانسیز.

بو سؤزو ائشیدینجه داها دا هیرسله نیب زورت- زورت باغیردی. گومبورتو سسلریندن ووجودن ایچینده کی بوتون اورقانلار تیتره دی. اؤزونه گلینجه هرکس ماراغلانیب آشاغیدان گلن سسلره دوغرو یئریدی.

آلت طرفین اطرافیندا ییغیشان اورقانلار بیر- بیرلریندن نه اولدوغونو سوروشوب دوردولار. آمما اورداکی اولان کیمسه نین بیر شئیدن خبری یوخودو. سونوندا باغیرساقدان آسلانان معده سوروشدو:

- قارداشیم نه اولدو؟ کیم سنی بو قدر هیرسلندیریب؟

- نمنه اولدو؟ بیر ده مندن سوروشور! هامیزی قیناییرام. بوتون گوجومله بو عدالتسیزلیغا، بو زوربالیغا قارشی باغیریرام.

- اشی سنی آند وئریرم ایستی یوموشاق آش حاققینا، ده گؤروم آخی نئیین وار سنین؟

- من بو رهبرلیک سیستئمینه قارشییام. گؤزوموزو آچدیغیمیزدان بری، هئی بئیین باشیمیزین اوستونده اولدو. آرتیق نه زامانا قدر ایقتیدارینی سوردوره جک بو چاتلاق قوجا؟ ایله ری و گلیشمیش یئرلرده اولدوغو کیمی بیزلر ده دئموکراسی یولویلا، اؤزوموزه تزه بیر لیدئر سئچمه لی ییک.

- یاخشی آمما، بو گونه قدر هئچ بیر موشکوله چاتمادیق کی. هرکس ده اؤز وضعیتیندن راضیدی.

- آمما من راضی دئییلم.

- نئیه؟

- آی میللت، بسدی بو قدر حاقسیزلیق. سیزلر بوتون پوخلو ایشلریزین هامیسینی منه تاپشیریرسیز. یورولدوم. آرتیق بونا دایانا بیلمرم. باشا توشورسوز منی؟ هئی آلتدا قالیب ازیلدیم. بو دوروم سونا چاتمالیدی. نئیه او اؤزونو بئیه نن حریف، هر زامان  ایستی قافانین ایچینده اوتورسون، یازیق من سویوق تووالئت داشینین اوستونده اوتوروب دونوم. منده ده باجاریقلار وار. دونیایی دییشدیره جک قدر پارلاق فیکیرلره صاحابام. من شانسیمی قوللانماق ایستیرم. ایقتیدارا کئچیب ووجودا رهبرلیک ائتمک ایستیرم. او چاتلاغین نئچه پارچا اولدوغو بئله بللی دئییل. ان آزیندان منیم ایکی پارچالیغیم، اوستو آچیق اورتادادی.

آلت طرفین بو سؤزلرینه، اورقانلار دلی کیمی  گولدولر. باغیرساغین  گولمکدن اوزانیب قیسالماسی آز قالسین اونو اورتادان ایکییه آییراجاغیدی. یولداشی مثانه کیسه سی بئله، اؤزونو ساخلایا بیلمه دی و قهقه هه لریندن دولایی ایچینده کی تیتره ین داشلار قیرت- قیرت قیریلدیلار.

اطرافداکی قهقه هه لر آلت طرفین اوره گینی او قدر سیندیرمیشدی کی آرتیق دانیشادا بیلمیردی. اورقانلار بو اولانلاری بیر شوخلوق کیمی حئسابلاییب یاواش یاواش داغیلدیلار و اونو سینان اوره گی ایله باش باشا قویدولار.

میللت اورتالیغی ترک ائله دیکدن سونرا، اؤز دردلرینه دالیب صوراتلارینی تووالئت داشینین ایکی چیینینه قویدو و هؤنگور هؤنگور آغلامایا باشلادی. ایچینده کی هیرس و اوزونتوسونو تووالئت داشینین ایچینه بوشالتماق ایستیردی آمما، آنیدن آغلینا پارلاق بیر فیکیر گلدی و اؤز اؤزونه دئدی:

- منه می گولورسوز شرفسیزلر؟ اولسون گولون. گؤره جه ییک سیزین سونوزو، دییوسلار!.

گئجه یاریسییدی. هرکس شیرین یوخویا گئتمیشدی. بیر آن آشاغی بؤلگه لردن گؤی گورلتوسونا بنزر بیر جور سسلر هامینی یاتاقلاریندان ائشیگه فیرلاتدی.

آلت طرف تزه دن قیشقیرمایا باشلامیشدی، هم ده گئجه نین گئج ساعاتلاریندا. آمما بو سفر سسینی کسمیردی. هر اون- اون بئش دقیقه ده بیر اوجا سسلرله اورقانلاری سینسیدیب یاتماقلارینا مانع اولوردو. ائرته سی گون یوخلایا بیلمه ین اورقانلار، ایشلرینی دوزگون شکیلده گؤره بیلمه دیلر. مثانه کیسه سی ایدرار ساعاتلارینی قاریشدیردی. بوتؤو گئجه نی قیوریلیب آچیلان معده، یئیه جکلرین ازمگینده زورلاندی. سحره قدر اویاق قالان باغیرساق، حرکتسیز قالمیشدی و معده نین یاریمچیلیق ازدیگی یئیه جکلرین اوستونده هئچ بیر ایش گؤرمه دی و یئیه جکلر، ائله سینه ایچینه دولوب قاللاقلاندی.

خبرلر بئینین قولاغینا دا چاتدی. بئیین، اورقانلاری ساکیت اولمایا دعوت ائله دی. اولایین کئچیجی اولدوغونو دئییب ایشلرینین باشینا دؤنمه لرینی ایسته دی. آمما صاباحیسی گون عئینی شئیلرین یاشاماسی اورتالیغی یامان قاریشدیردی. دوروملاری وخیمله شن اورقانلار، قافانین دؤوره سینه ییغیشیب بئییندن اولایا ال آتماسینی طلب ائله دیلر.

بئیین تئزجه، آلت طرفه بیر ائلچی یوللادی و اوندان ائله دیغی گئجه گورولتولاریندان ال چکمه سینی ایسته دی. آمما آلت طرف ایشینه هله  ده دوام ائده جه یینی دئدی و یئنی لیدئر اوچون سئچیم اولمازسا، گئجه لری عئینی سسلرین داها دا بترینی چیخاداجاغینی سؤیله دی. آلت طرفین گؤندردیگی مئساژ بئینی فیکره سالدی. بئیین، قلب ایله ده گؤروشدو و یئنی لیدئر اوچون سئچیم اولماسینا قرار وئردی.

تئز قارنین اورتاسیندا، تام دا گؤبه یین آلتیندا سئچیم صاندیغی قویولدو. اورقانلار رای وئرمک اوچون سیرایا دوزولدولر. گونون سونوندا رای لر ساییلدی. بیر کیشیدن سئوای هامی بئینه رای وئرمیشدی.

هر شئی تزه دن اسکی حالا دؤندو. گئجه یاریسی گورولتولردن خبر یوخودو. آرتیق یئنیدن، اورقانلار ایشلرینی دوزگون شکیلده گؤره بیلیردیلر. آمما....

آمما اوچونجو گونون سحریسی، باغیرساغی هوشدان گئتمیش شکیلده بئینین قاباغینا اوزالتدیلار. بئیین شیشمیش و آز قالسین پاتلاماقدا اولان باغیرساغا باخیب دئدی:

- ائی وای. نه اولدو سنه؟

خسته باغیرساق، زورلا قافاسینی یئردن قالدیردی. باتمیش بیر سسله دئدی:

- سروریم اؤلورم. ایندی پاتلایاجاغام. آلت طرف سئچیم سونوجلارینی قبول ائله میر. یولو باغلادی. ایچیمی بوشالتمایا ایزین وئرمیر. بئله گئتسه، صاباحا قدر یوز- ده یوز پاتلارام. سروریم، من اؤز فیکریمده دئییلم. پاتلاسام ایچیمده کی پوخلار بوتون اورقانلاری زهرله ده جک. لوطفن چارا یولونو تاپین.

- آخی نه ایستیر بو کؤنه زین بیری؟

- سروریم، ایکینجی سئچیم ایستیر.

- تزه بیر سئچیمله موشکولوموز یوخدو آمما، ائله کی گؤرونور او حریف قازانمازسا بو سئچیمن ده هئچ بیر فایداسی اولمایاجاق. بللی کی بو اینادلی کئچینین تک ایسته دیگی ایقتیداردی.

قورخو کابوسو ووجودون دؤود بیر یانینی بوروموشدو. بوتون اورقانلار- بئیین ده اونلارین ایچینده- باغیرساغین پاتلاماسی و هامینین زهرلنمه سیندن وحشت ایچیندئیدیلر. آرتیق ایکینجی سئچیمی قبول ائله ییب ایقتیداری آلت طرفه وئرمکدن سئوای باشقا چارا قالمامیشدی.

سونوندا آلت طرف ایکینجی سئچیمی سیچماماق سایه سینده قازاندی. بئیین له، یئر دئییشدیریب قافایا یئرلشدی. بئیین ده ووجدون آلت قیسمینا کئچدی.

او آندان اعتیبارن، قافادان پوخ کیمی فیکیرلر فیشقیرمایا و آلتدان دا فیکیر کیمی پوخلار چیخمایا باشلادی. قافادان چیخان پوخ- پوسور، بوتؤو ووجودو دولدوردو. اورقانلار پیسلیکلر ایچینده اوزوردولر. فقط  بیریسینین فیکیرلری بو موشکولو دوزلدردی، آمما نه یازیق کی او فیکیرلر ده تووالئت داشینین ایچینه گئدیردی.