8مارت دونيا قادينلار گونو بوتون قادينلارا خصوصيله سن، تورک قادينينا قوتلو اولسون.

ايللردير کي مارت آيي نين 8- اي قادينلار گونو دييه بير چوخ خالقلار آراسيندا قوتلانير.

قادينلار حاقي دييه يازيلار يازيلير، کليپلر چکيلير، قوشمالار قوشولور. بير سؤزده اينسانليغين و وارليغين ياريسينا اوبير ياريسييلا ائشيت هاق قازانديرماق اوغروندا نه لر کي ائديلمير.

قاديني يالنيز دوغوب بؤيودن گؤرن ميلتلر دئ وار، اونو شيطانلا برابر و حتّي ايبليسين اؤزو بيلنلرده وار، بونا ميثال فردوسي کيمي بير خالقين کولتور آتاسي کيمي تانينانلار وار.

خالقلار وار قاديني ايلک دوغولدوغوندا بئله قبول ائده بيلمه ييب اونو ديري- ديري گؤممه يه قالخيب. دونيا خالقلاري نين کئچميشينه باخديقدا هئچ بيرينده تورک قاديني قدر تاريخ يارادان گؤرمک مومکون دئييل. " دده قورقود " دا بورلا خاتون، سئلجان خاتون، بانو چيچک، وحشي بير وارليغين نفسيني کسن و اونون کؤلگه سيني بئله يئر اوزوندن اوزن تومريس آنا، " ايسکندرنامه " ده نوشابه، کوروغلونون شهامت و غئيرت سببي حيات يولداشي نيگار خانيم، قاچاق نبي نين داياغي و عؤمور يولداشي هجر خانيم، بونلار يالنيز اوستوره و ناغيل دئييل بلکه بير خالقين اينسانليغا اينسانجا باخيشيدير.

بونلار بير ميلتين اؤزونو ايکي ياري دئييل بلکه بوتؤو گؤروشودور. مهستي گنجوي، هئيران خانيم، آشيق پري، خورشيدبانو ناتوان، پروين اعتصامي کيمي شخصيتلرينه فخر ائدن بير ميلتيميز وار. باخماياراق کي اسارت آلتيندا ياشاماق، باشقا ميلتلرين آيريمچيليق دوشونجه سي زورلا خالقيميزا هؤکوم سورور، آما آذربايجان تورک اولوسو هله ده بيله بگيم، خانلا خانيمي آيري دئييل بلکه بير و ائشيت گؤرور.

قادين آنا اولور،قادين يار اولور، اونون وارليغيندان،يووا قورولور. سن آللاهين يئر اوزونده ايزي، سن وارليغين ظرافت سيمگه سي، سن قهرممانليق اؤلچوسو، سن آذربايجان تورک قادينيسان. يالنيز سؤزده دئييل، بلکه کيمليگيميزين کؤکو، وارليغيميزين سببي، ديليميزين دير قايناغيندادا سنسن.

بو اولوس اينانير کي آسلانين ائرکگي- ديشيسي اولماز! 8 مارت دونيا قادينلار گونو بوتون قادينلارا خصوصيله سن، تورک قادينينا قوتلو اولسون.

گونئي آذربايجان ميللي بيرليک شوراسي

تبليقات کوميته سي