AZOH: Bu gün Rusiya səfəri başa çatan Türkiyən in baş naziri Rəcəb Tayyib Ərdoğan Mersin vilayətinin Akkuyu bölgəsində tikilməsi planlaşdırılan atom elektrik stansiyasından vaz keçmədiklərini bildirib. Ərdoğan bu məsələ ilə bağlı təqvimin işlədiyini bildirib. Baş nazir atom elektrik stansiyasının təməlinin aprelin sonu və ya mayın əvvəlində qoyula biləcəyini deyib.

Səfər çərçivəsində viza məsələsi də həllini tapıb. Ərdoğanla Rusiya prezidenti Dmitri Medvedev arasındakı görüşdən sonra viza rejiminin ləğvinə dair qərarın aprelin 17-dən etibarən qüvvəyə minəcəyi açıqlanıb. Qərara görə, iki ölkə vətəndaşları 90 gün içərisində 30 günü keçməyən səfərləri üçün viza almayacaqlar.

Ərdoğan Moskvadakı görüşlərindən sonra Tatarıstana gedib. Baş nazir burada Tatarıstan prezidenti Rüstəm Minnixanıv tərəfindən qarşılanıb. Bu gün Ərdoğan Kazan Federal Universitetində tələbələr qarşısında çıxış edəcək. Daha sonra Kazandakı prezident iqamətgahını ziyarəti planlaşdırılan Ərdoğan axşam saatlarında Türkiyəyə dönəcək.

TRT