دیرلی اویرنجی  سیته سی بیر بیلدیری یاییبدیر و دونیا آنا دیلی گونونو قوتلاماق اوچون اسفند آیی نین بیرینده یاشیل لار ایله بیر گونده میتینگ یاراتماغی اونری وئریبدیر و خصوصیله تبریز شهری نین ایچینده چیخیش ائتمه یی تکلیف ائدیب دیر. آنجاق منجه نئچه دلیله گوره بوگونکو وضعیتده بوجور چاغیریشلاردا داها دیققتلی اولمالییق. بیرینجی سی حرکتین یاشیل لار طرفیندن مصادره ائدیلمک امکانی وار. البته من بونو چوخدا اونملی بیلمیرم چون بیز اوز نیشانه لریمیزله و فرقلی شعارلاریمیزلا مستقیل اولدوغوموزو گوستره بیلریک آنجاق چوخ اونملی مساله بودور کی  بیز بو آز زاماندا تبلیغات آپارماق ایمکانیمیز یوخدور و بو گونلر گوناز تی وی ده پارازیت لر واسیطه سیله بیزیم الیمیزدن آلینمیش وضعیتده دیر. بیز بو قدر سوسماقدان سونرا گرک چوخ دیققتلی و حساب اولونموش یئنی بیر حرکته باشلایاق و حتمن امین اولاق کی ان آزی اون مینلر نفری کوچه لره توکه بیله جه ییک. اگر بیز بو چوخ دار مقامدا ضعیف تبلیغات نتیجه سینده یالنیز کیچیک بیر حرکت یولا سالساق، اونون بیزه ایکی بویوک ضرری اولاجاق. بیرینجی سی رئژیمین الینه بهانه وئره جک تا بیزیم آکتیو فعاللاریمیزی توتوقلاسین و گله جک حرکت لرده گوجلو مئیدانا گله بیله جک پتانسیلی میزی آرادان آپارسین و او بیری طرفدن یاشیل لار طرفیندن بیزه تحقیر ائدیجی طعنه لر گله جک کی بو قدر دئییردینیز سکوت ائتمیشیک و بیزیم حاقلاری رسمیته تانیین تا سکوتو سیندیراق، ائله گوجونوز بو قدر ایدی؟ پس بیز گرک چوخ دیققتلی اولاق کی تام حساب اولونموش و یاخشی تدارک گورونموش و تبلیغات اولونموش قاباغا گئدک تا بیر بویوک حرکت یارادا بیله ک.

منیم اونریم بودور کی اویرنجی لریمیز اسفند آیی نین بیرینده یالنیز یونیورسیته لرین ایچینده آنا دیلی گونونو قوتلاسین لار و اونو بیر اعتیراض میتینگی کیمی یوخ، بیر طبیعی حاقی طلب ائتمک کیمی اورتایا قویسون لار تا رئژیمین الینه بهانه وئریلمه سین. آنجاق بیز گرک ایندی دن جوما گونو ایسفند آیی نین 6 سی کی تراختور نئچه آیدان سونرا تبریزده بیر تعطیل گونده ماچی واردیرتبلیغات لار و چاغیریش لار، پوسترلر و ... حاضیرلایاق و بو بیر هفته ایچینده یاخشی تبلیغات آپاراق تا بیر داها یوز مینلر نفری سهند ایستادیومونا گتیرک و بو گونو ایکی اونملی موناسیبته حصر ائدک. آنا دیلی گونو و خوجالی فاجیعه سی نین ایل دونومو.  گرک تبلیغات لاریمیز او قدر چوخ اولسون کی بیر داها سهند ایستادیوموندا کئچن ایل کیمی یوز مین نفر بیرلیکده تورک دیلینده مدرسه و باشقا شوعارلاریمیزی سسلندیرسینلر. منجه بو ان یاخشی و ان خطرسیز و آز هزینه لی و ان کسرلی  آکسیون دور بو مرحله ده. جوما گونو اسفند آیی نین 6 سیندا بیرداها بیرلیگیمیزی گوسترمه میز گله جک شهر ایچینده آکسیون لارا دا زمین یارادا بیلر، اگر شرایط بیر جور قاباغا گئتسه کی بیز سکوتوموزو سیندیرماق قرارینا گلسک. اوندا بو بیرلیگیمیزی بیرداها تمرین ائتمه ییمیز، بیر بویوک حرکتین یارانماسنیا چوخ بویوک یاردیم ائده بیلر.