آذربایجان نین دیرلی میللتی

بیلدیگینیز کیمی سون 20 ایلین ایچینده یاغینتیلارین آزالماسینی نظرده آلاراق، آذربایجانیمیزین گؤزل گليني تانينان اورمو گؤلو قوروما حالینا گلیب چاتميشدير. چوخ اوتاندیریجی حالدير کی  ایران حوکومتی دونیانین قبول اولونموش اینسان و چئوره ( محیط زیست) حاقلارینا قارشی، عصریمیزین جان یاندیرجی حاديثه سینه اعتیناسیز قالیب، آنتی آذربایجان و شوونیستی سیاست لری نتیجه سینده اورمو گؤلونون قوروما پروسه سینه شیدتله زمینه یارادیب .

بیز آذربایجان میللتی اولاراق ایران حاکیمیتی نین بو سیاستینی اورمو گؤلو یوخ بلکه آذربایجانی قوروتما سیاستی کیمی قیمت لندیریریک.

سایین سویداشلاریمیز!

آذربایجان میللتینین 1389-جو ایلینین چؤل گونونده(13 بدر گونو) اورمو گؤلو اطرافیندا اعتيراض هارایی دونیا افکاریندا جیدی تأثیری اولدو، اما تاسوفله بو گونه قدر ایران حاکيمیتی اورمو گؤلونون قوروما مسئله سینه مسئوليت سيز اولدوغو گؤز اونونده دیر.

بو ایل ده اوغوز بایرامینین 13-جو گونو(سیزده بدر) ایران حاکیمیتی نین يانليش سیاست لرینی سوچلایاراق و اورمو گؤلونون قوروماسینا بی تفاوت اولدوغونا اعتيراض اوچون  بیر یئره توپلاشيب و بیر داها بو آجی حاديثه نی دونیايا چاتديرماغا چاليشاجاييق.

یقین كي سیز دیرلی میللتیمیزین بو اعتيراضا قاتیلمانیز آذربایجانیمیزا ظفر و آذربایجان دوشمانلارینا کسگین جاواب اولاجاقدیر. اینانیریق کی گئچن ایل کیمی آذربایجانیمیزین باشقا شهر و کندلرینده و دونیانین هر یئرینده یاشایان آذربایجانلی و تورک قارداشلاریمیز اؤز میللی گؤرولرینی یئرینه یئتیریب اعتيراض کامپانیيالاري قورماقلا و یا خبر آژانسلاريیلا ایلگيلنرك میللتیمیزین هارای سسینی دونیا کامویونونا ( افکار عمومی) اینعکاس ائده جک لر.

آذربایجان میللی حرکتی – اورمو

زامان: چؤل گونو( روز طبیعت – سیزده بدر)

یئر: اورمو - ائللر باغی – حووض قیراغی

ساعات : 17 آخشام باشی

دیقت: بو اعتيراض کامپانیاسینا قاتيلانلار قیرمیز رنگلي سمبول لار و موختلیف سیويل(مدنی) یوللارلا اؤز اعتيراض لارینی گرچک لشدیره جک