سودان-این گونئیی، تئهران-این یئشی‌لی و بیز
میللی شورا اساسنامه‌سی‌نین ایلک جمله‌سی‌نین “اساس مقصدیمیز، گونئی آذربایجاندا میللی موقددراتین تعیینی‌دیر” سؤزلری ایله باشلاماسی البتتکی تصادفی دئییل‌دیر. آذربایجان میللی حرکاتی‌نین دوزگون یولونون سئچیمینده بو فیکیره وئریلن دیر، بیرینجی پرنسیپیمیز اولان بو مفکوره‌نین، مرامنامه‌میزین 1.2.2.2- جی بندین‌دکی هدف‌لر بؤلمه‌سینده تیکرارالانماسی دا، اؤلچو دیری‌نین یوکسکلیگین‌دن خبر وئرمکده‌دیر. قارا سودانین جنوبون‌داکی رئفراندومون نتیجه‌لری گؤستردی کی، ایستر آذربایجانا اوریی یانان‌لار، ایسترسه ده قیسقانچ‌لیق دایره‌سینده سرگردان قالان‌لارین تنقید ویا تخریب‌لری نتیجه‌سیز قالمیش‌دیر. قریبه بوراسیندا‌دیر کی “بیرلشمیش میللت‌لر تشکیلاتی‌نین” 1541 سایی‌لی “میللی موقددراتی تعیین” بیانییه‌سی‌نین، او قورومون سندلرینه دایانان تشریحینی مرامنامه‌میزده گؤرممزلیک‌دن گله‌رک یئنی مودئل‌لر آخدارما‌لاری دا گؤزه چارپماقدا‌دیر. میللی سیاسی مفکوره‌نین باشاری‌سینی آنجاق اؤز فعالیت‌لرینده خلاصه ائتمه‌یه چالیشان‌لارین، بیرلیگین علیهینه آپاردیق‌لاری آنتی میللی فعالیت‌لرین نتیجه‌سیز قالماسین‌دان سونرا آلتئرناتیو آخداریش‌لاری ایله بیر آددیم ایره‌لی، ایکی آددیم گئری آتیلما‌لارین میللی حرکاتیمیزین ایشینه یارامادیغی آیدینلاشمیش‌دیر. چئشیت‌لی جبهه‌لردن آتیلان داش‌لار، زیروه‌نین اتیینده چورورکن، بیر گون یئشیل‌لره آچیلان میدان، ائرته‌سی گون میللی موقددراتین تعیینینی آنجاق “فئدئرالیزم”ده گؤرن دوشونجه‌نین، اساس دوشمنیمیزی “فارس شووینیزمی” دایره‌سین‌دن چیخارا‌راق، ساده‌جه حاکم رئژیمله موباریزه مئیدانینا چکمک ایسته‌ین‌لرین آیاغینا دین داش‌دان اویانماماسی دا بؤیوک بیر تالئه‌سیزلیک ساییلماقدا‌دیر. قریبه‌دیر، بو اینسان‌لارین بعضی‌لری “ میللی موقددراتی” تعیین مسئله‌سینده، 1960-دا ایران دؤولتی‌نین ده ایمزالادیغی بمت بیانییه‌سی‌نین ایچینی بوشالدماغا چالیشارکن دئموکراسی بایراغینی قال‌دیرماقدا‌دیرلار. قارا سودانین گونئین‌دکی رئفراندوم آچیقجا گؤستردی ک “ میللی شورانین” تکلیف ائتدیگی، گونئی آذربایجاندا، 5 ایل رئفراندوما حاضرلیق مرهه‌سین‌دن سونرا میللتین سسینه بویون ایمک ان دوغرو یول، ان لئگئتیم سئچیم و ان دوزگون سیاسی قاورام‌دیر. بهمن آیی‌نین 25-ده یئشیل‌لرین تئهران‌داکی اوزدن ایراق تزاهوراتی، 3 گون اوندان سونرا تورکییه پرئزیدئنتی سایین عبدالله گولون تبریز شهرینده میللی گنجلیگیمیز طرفین‌دن اؤیله‌سینه یوکسک سوییه‌ده قارشیلانماسی آچیقجا گؤسترمیش‌دیر کی “میللی شورانین” باشقا پرنسیپی اولان “ آذربایجان مرکزلی دوشوجه سیستمی” اینکار ائدیلمز بیر حقیقت‌دیر. بونادا اینانیتیق کی، او بوغونتولو موحیطده وئریلن او میللی شوارلار، آزجاجیق دئموکراتیک اورتامدا مین‌لرین دئییل، یوزمین‌لرین هایقیریشینا دؤنوشه‌جک‌دیر.
آذربایجان میللی حرکاتی‌نین بوگونکو چاتیشما‌لاری، شانتاژ، شاییعه و باشقا‌لارینی تخریب مئییل‌لری‌نین چئشیت‌لی سبب‌لری اولسا دا اساسینی قیسقانچی‌لیق تشکیل ائتمکده‌دیر. میللتیمیزه هئچ بیر فایدا ساغلامییان بو اوزدن ایراق ایفشا‌لار، اؤنجول‌لریمیزین آیاقلاریندان یاپیشیب آشاغی چکمک قئیرت‌لری‌نین اساس قایناغینی بوش ایددئا‌لار و رهبرلیک هوس‌لری تشکیل ائتمکده‌دیر. بو یئرسیز ایددئا‌لار بوگونه قدر چوخ‌لارینی روسوای ائدیب، ائدیر و بون‌دان سونرادا بیابیر ائدجیینه شوبهه یوخ‌دور.
بونونلا بئله، هله ده ایبرت درسی آلمییان‌لار، هر هانسی بیر فرد، قوروم و تشکیلاتین آپاردیغی ائتکین فالیتی سوال آلتینا آپاران‌لار تاپیلماقدا‌دیر. بونوندا قارشی‌سینی آلماق اوچون “میللی شورانین” اوچونجو پرنسیپی اولان “ باشقان‌لیق شوراسی” فورمولو ان منتیقی وهدت کؤرپوسودور. بعضی دوست‌لاریمیز، قیسقانج‌لیق درجه‌سی‌نین یوکسلیشی ایله قیزدیرمایا دوچار اولا‌راق بیر بیرینه ووردوقلاقری ایفتیرا‌لارا ایدئولوژیک دون گئی‌دیره‌رک یارگانی داها دا درینلشدیریرلر. بو فاجعه‌نین قارشی‌سیندا دورماق اوچون “میللی شورانین” دؤردونجو پرنسیپی اولان، آذربایجان میللی حرکاتی‌نین داخیلینده دئموکراتیک داورانیش و دوشونجه دارتیشما‌لاری تکلیفی ائدیلمیش‌دیر. باشقا سؤزله، بیز اؤز ایچیمیزدکی بوتون پروبلم‌لری ساغلام موذاکیره اصول‌لاری ایله حل ائدیب، بیر بیریمیزه حؤرمتله یاناشیب ایدئولوژیک مسئله‌لری ماسایا یاتیرتماغی باجارارساق، میللی بیرلیگین قاپ‌لاری‌نین اوزوموزه آچیلاجاغی اینکار ائدیلمزدیر. بو پلاتفورمانین تنزیملنمه‌سینده گودولن مودئل، بوتون فیکیر صاحب‌لری و تشکیلات‌لار، اؤز دوشونجه‌سین‌دن آیریلماماق شرطی ایله بونا دستک وئرمک ایستیی ان دئموکراتیک قایدا‌دیر.
عزیز میللی هرکتچی‌لر:
بو تحلیل‌لر هر هانسی بیر شخص، قوروم ویا تشکیلاتی سوال آلتینا آپارماق‌دان اؤتورو دئییل، تام ترسینه، هامی‌نین ایستعدادینا گؤره بیرلیکده رول اوستلندیگی بیر فالیت قاپ‌لاری‌نین آچیلماسی مقصدی گودمکده‌دیر. میللی شورانین مرام و نیزامنامه‌سینه ایشاره ائتمک‌دن مقصدیمیز، بوتون سویداش‌لاریمیزا سس‌لنه‌رک، حقیقت‌لری آنلادا‌راق، گوج مرکزینه دؤنوشمک اوچون بیرلیک کؤرپوسونو قورماق‌دان عبارت‌دیر. حقیقت بودور کی، بیر ایکی تشکیلاتیمیزدان باشقا، قوروم‌لاریمیزین یئتری قدر عضوو اولمادیغینا گؤره، میللی شورانین تشکیلات‌لاردان گلن اوزولوک مئخانیزمینه اویگون‌لوغو دوشونولممکده‌دیر. آنجاق، اونلارین تییدی و میللی فعال‌لاریمیزین گؤنول‌لو ایشتیراکی ایله “میللی شورانین” یاراناجاغینا درین‌دن اینانیر و مزلوم خالقیمیزی آق گونه آپاران یولدا، عدالت و اینسان‌لیق نامینه، بیر گون قول‌لارینی چیرما‌لییا‌جاق‌لارینا گوونیریک. حقیقت‌لری اینکار ائدن‌لرین ده بیر گون پئشمان اولا‌راق، اتک‌لرین‌دکی داش‌لاری تؤکه‌جک‌لری، تاریخین بیزه اؤغرتدیگی اینام قایناغیمیزدیر. چوخ گئج اولما‌دان دوزگون یولو سئچمک، دوغرو چیزگی اوزرینده ساغا-سولا ساپما‌دان ایره‌لیلمک، موباریزه میدانیمیزین ییخیلماز قالاسینا چئوریلمه‌سی‌نین تأمیناتی‌دیر.
گونئی آذربایجان میللی بیرلیک شوراسی‌نین -تبلیقات کومیته‌سی
تاریخ: فئورال آیی‌نین 21-ای/2011
آنا دیلی گونو موبا‌رک اولسون
