آذربایجان اویرنجی حرکاتی- آذوح دونیا آنادیلی گونو حاقدا بیلدیریسی
"...و نهایت، بیر من قالدیم، بیر دیلیم...
دوغراسالار دیلیم دیلیم، منیم دیلیم، اولن دئییل..."
بو گون، دیللری یوخ اولما تهلوکهسی ایله قارشی قارشیدا اولان میللتلر اوچون سئچیلمیشدیر. 1999 ایلدن اعتیبارا بيرلشميش میللتلر تشكيلاتینین آلدیغی قرار اوزره ۲۱ فئورال دونیا آنادیلی گونو آدلانمیش و بوتون اؤلکهلرده بایرام کیمی قئید اولونور و نه یازیق کی، بونونلا بئله آنادیل بایرامینا جان و دیلدن قاتیلان میللتیمیز هله ده دیل حاقلارینا مالیک اولمامیش، هله ده تاپداقلار آلتیندا ازیلمکدهدیر.
ایران آنایاساسینین 15 ماددهسی فارس اولمایان میللتلرین اؤز آنادیلینده اوخوماقی اؤن گؤرسه ده هئچ بیر زامان او مادده عملی اولماییبدیر. و نه تک دؤولت اورقانلاری بونون دوغرولتوسوندا هئچ بیر آتدیم آتمیر، حتی میللی درنکلر و شخصلرین کؤنوللو چابالارینا بئله انگل اولورلار. بئلهلیکه، دؤلت اورقانلاري بیلرکدن، آذربایجان تورکلرینی سسسیزجه اریدیب، ایتیرمگه چالیشیر.
بیز، اؤز دیلیمیزی الده ن وئرمكده ییك. ایندیلیكده دونیادا یاخلاشیق آلتی مین دیلده دانیشیلیر، آمما یاشادیغیمیز یوز ایللی یین سونونا ده ك بو دیللرین یاریسی آرادان گئده جكدیر. دئمك هر ایكی هفته ده بیر دیل. مارك آبلی اؤز اینسانسل و ماراقلی كیتابیندا، بعضی تهلوكه ده اولان دیللر حاقدا دوشونه ره ك، اینسان اؤز اوشاقلیق دیلی نین آرادان گئتمه سینی گؤردوكده نئجه بیر دویغودا یاشاییب و داشییا بیلرمی دئیه سورور. بریتانیادا مارگارئت تاچئر وئلز اهالیسی نین رأیینی قازانماق اوچون، وئلز دیلینده بیر تئلیویزیا كانالی نین آچیلماسینا سؤز وئریبمیش. آمما ایقتیدارا چاتدیقدان سونرا اؤز سؤزونه صاحیب چیخماماسی نین دولایی سیلا وئلزین میللتچی پارتیاسی نین لیدئری آجلیق آكسییاسی كئچیرمه هده له مه سی نین آردینجا سؤزو گئده ن كانال آچیلمیشدیر.
بیر دیلی قورویوب ساخلاماق اوچون تعصصوبلو اولماق گركلیدیر. مودئرنلشمیش عئبری دیلی نین یارادیجیلاریندان اولان ائلیزئر بئن یهودا، حیات یولداشییلا اونون بو دیلی بیلمه مه سینه رغمن بو دیلده ن باشقا بیر دیلده دانیشماغا راضی دئییلدی. او حتتا ائوینده كی حئیوانلاری ائركك-دیشی سئچه ره ك او حئیوانلارین بالالارینا عئبری دیلینده ائركك-دیشی آنلامینی بیلمه یه ایمكان یاراتدی.
بیر میللتین وارلیقی توپراق، تاریخ و هر بیر وارلیقدان اونجه اونون دیلی حئساب اولونور. اونون اوچون ده استعمار بیر میللتی اوز مستعمره سینه چئویرمک اوچون ایلک اونون دیلین الیندن آلماقا چالیشیر. آذربایجان میللی حرکتینین موباریزهسینین مرکزینده دیلیمیزین یاساق اولماسی یاتماقدادیر. اونا گؤره ده 21 فئورال گونونده (2 اسفند) آذربایجان میللی حرکتی فعاللاری بوگونون آذربایجانین هر طرفینده چئشیدلی شکیللرده قوتلاماقلاری لازیمدیر.
آذربایجان میللی حرکتی ان حساس گونلرینی یاشاماقدادیر. بؤلگهدکی دئییشیکلیکلر البته کی بیزیم حرکتی ده اؤز تأثیری آلتینا آلاجاقدیر. اؤز دیلیمیزه صاحب چیخاراق و تورک دیلینده مدرسه، اؤز دیلینده مدرسه، اولمالیدیر هر کسه، شعاری ایله هر یئرده بو گونو عزیزله مه لییک.
دونیا آنادیلی گونو عرفهسینده بو بایرامی، دیل حاقلاریندان یوخسون قالان بوتون اینسانلارا، خصوصیله ده آذربایجان قهرمان میللتینه تبریک ائدیب، هامینی اؤلکهده دیل قاداغاسی علئیهینه اعتیراض سسلرینی اوجالتماغا و بو یاساقلارین آرادان قالدیریلماسیندا باشلانان حرکته یاردیمجی اولماغا چاغیریریق.
ایران اسلام جمهوریتی رئژیمی نین اؤلکه ده فارس اولمایان میللت لرین دیللرینه قویدوغو قانونسوز قاداغانی محکوم ائدیب، بو سیاستی غئیری اینسانی و غئیری مدنی اولدوغوندان قیناییب، ایراندا تورک نوفوسونون سایی سینا اساسلاناراق، آذربایجان تورکجه سینین رسمی دوولت دیلی اولماسینی ایسته ییریک.
گوج بیرلیکده دیر...
آذربایجان اویرنجی حرکاتی- آذوح
1390-12-1