ایلک لرین باشچیسی- یاشین زونوزلو

سنه یازان ایلک اینسان اولماق ایستیرم، چون کی سن هر زامان سینه سینی سیپر ائدن ایلک اینسان اولدون...................................جان یول داشیم علی ریضایی یا ایتحاف.

سنه چاتدیغیمدا قلم الیمده اوینور، سنه گوره یازماغا نه وارکی!

یئترکی سوز قونوسو ووقارلی باخیش لارین اولا!

ایلک اونجه سنین بویونا اوخشاماغیم گلیر دوغروسو، او اوجا بویونا، ایراده لی باخیش لارینا، آنلاملی داورانیش لارینا، سنه قیسقانماغیم گلیر، کئشکه سنین یرینده اولسایدیم، بونا اعتراف ائدیرم، سنین یئرینده اولماغیم گلیر!

ایلک تهرانین شهرانین دا سنله گوروشدوق، من یئنی تبریزدن گلمیشدیم، یاشین تهران تبریز کیمی دییل، باشلادین تهرانین دورومونو آنلاتماغا!

ایلک تانیش اولدوغوم آدام سن اولدون! سون اینادیغیم اینسان دا سنسن!

زامان دورمادان آخدی، هر زامان یانیمدا اولدون، هر زامان اوزنو بورجلو حیس ائتدین، ایندی ایسه بورجونو داها جیددی اودویورسن!

من بونا سیناو دئمیرم، سن داها چون اونجه بو سیناولاردان گئچدین، گئجه لری پارک لاردا یاتاسی، ایشینی-یاشاییشینی بوراخاسی اولدون، سنین گولوش دوداغیندان پوزلمایینجا من ندن اوزولوم کی علی! چیخیب قینایارسان منی!

خلیل ریضانین شعرلرینه دفعلر قوناق ائله دین منی، نادیر الهی یا چاتینجا دویغولاندین،آتیلا کیشی زاده نی سن قدر سئودیم من ده، سندن اینجه خیال لی گورمه دیم کی اوزونو نه قدر گوبود گوسترمک ایسته سنده!

سن هر زامان ایلک آدام اولدون منه، منه ایراده ائتمک یئترلی اولدو سنی یانیمدا گورمه یه، داریخیرام دئدیغیم دا قاپیمدا اولدون، تهرانین او گرگین گون لرینده ایشینی بوراخیب من سیخیلمییم دیه اوزوندن گئچدین!

یورقون اولدوغونو حیسس ائتمه دیم سانیرسان، آج اولدوق لارینی بیلمه دیم، او شوخلوق لار آرخاسیندا، منی سئویندیرمک ایسته دیغیندا اوزندن گئچماغین بیلمه دیم می دوشونورسن!

من گوجومو سندن آلدیم تهراندا، اعتیباریمی سندن قازاندیم، دردلریمی بیر تک سنه آچدیم، درمانینی سنده تاپدیم!

سنله نه دانیشماقدان دویدوم نه گوروشمک دن!

بیرده اویمه گلسن، یاشین آجام نه وار دئسن، بیز دویماق قصدی ایله دییل قوتارماق مقصدی ایله ییریک دئییب دولاشسان بیر ائویمده، بیرده شیوانی باغرینا باسیب حیاتیم دئسن، بیرده دانناسان منی، بیرده یاواشجا نه لازیم دیر قولاغیما سسلنسن، بیرده قیزیم نیه اوتورموسان ائوده دور گل بیزه ائشیتسم سندن، منه سن خرمشهری آزاد ائله دین، دوشمن بهانه ایدی!

منی باغیشلا شیوانین یانیندا دییرم! منی باغیشلا اونون نیگران باخیشلارینا بیر جوابیم یوخدور! منی باغیشلا سنی تک قویدوم! منی باغیشلا سن اولا بیلمه دیم! سن اولماق هئچ راحات دییرمیش علی!

آناسی یانین دا اولمایان اوشاق لار کیمی شیلتاق وریرم، ایکینجی گون اولدو و سندن هله بیر زنگ آلا بیلمه میشیق. بو خبرسیزلیک دار آغاجینین ایپی کیمی بوینومو سیخیب نفس آلماغیمی انگل لیر!

هر دونه ماموریته گئتدیغیندا زنگ ائدیب شیوانی تک دیر گئد اونون یانینا دییردین، ایندی اما اوزوم قارادیر سندن! باشیم آشاغادیر! کئشکه.....لعنت اولسون...ویجدان آغریسی ایچیمی یئییر.

سنی اوزوندن سونرا هئچ کسه امانت ائده بیلمه رم، زیندان قارانلیق دیر، هاواسیزدیر، آجیماسیزدیر...

نادر الهی نین بو شعری یادیما دوشور:

یاز دردیمی ساغالتمادی

یاراما بیر قیش باغلایین

گؤیلومه بولود دؤشه یین

گؤزومه یاغیش باغلا یین

***

تای توشو قول قاناد چالدی

زیروه لرین اوستون آلدی

چیرپینا چیرپینا قالدی

اوره ییمه قوش باغلایین

***

بوگونلرده کئچدی بلکه

دورنا اولوب کوچدو بلکه

بو قفس ده اوچدو بلکه

ایاغینی بوش باغلایین

بو قفس لر بو نیسگیل لرده اوچاجاق بیر گون علی دوستوم، سن آنجاق اورا گئتمیسن کی اورانین بیر بند ده آیاغین بوشالداسان جانیم. باخ زورونا، نه قدر گوجون ایذین وریرسه بوشالد او قفسین آیاغین و بیزه دون!

Share/Save/Bookmark