کشگه- دوریش اوغلو

***

اللی ایل اؤنجه،

داها دوققوز یاشیندا بیر اوغلان اوشاغی ایکن،

اؤزمدن اون - اون بئش ایل یاشلی قیزلارا وورولاردیم.

روحوم قانادلانیردی،

خیالیمدا بیر دونیا یاراداردیق سئوگیلیم ایله،

انسان عاغلینا سیغمایاجاق ایشلر گؤرردیک بیرلیکده،

داغلاری یئریندن اویناداردیق،

اولدوزلاری دریب، بیری - بیرمیزه هدیه ائدردیک،

جیران سورولریمیزی ساغارکن، قارتاللارین قانادینین اوستونده اوچاردیق......

***

اللی ایل سونرا،

یئنه وورولورام،

اون – اون بئش یاش اؤزومدن گنج اولانلارا.

خیاللاریمی کاغاذا تؤکورم.

دیوغو دولو سؤزجوکلردن سیرقا آسیرام سئوگیلیمین قولاغینا،

گلینلیک تیکیرم ایگنینه، آغ، پارلاق سؤزجوکلردن.

مضرابیم ایله تاریمین تئللرینه دانیشیرام خیاللاریمی،

گون باتانین آغیرلیغیندا راین دا قوشا اوزن قوو قوشلارینا تؤکورم پنجره دن،

یوخ،...

او دادی آلابیلمیرم،

کشگه بؤیومَسه ایدیم.

کؤلن، یونی 2016

Share/Save/Bookmark