کیرلی بارماقلار- محمد احمدی زاده

لکه لندیره بیلمزلر

وطنه دوغرو اوزانان کیرلی بارماقلار

دیک باشلی داغلارینین آغ کؤینه گینی

بوراسی اورمیه، تبریز، اردبیل

بوراسی دلی قانلی گئنجلرین یوردو، خیاودیر

مشکین کؤینه گینی ییرتیب

ساوالان گونشیندن پارلایان

 بم بیاض آزربایجاندیر بوراسی

سوسدورامازلار بو توپراقلاردا

آلچاق کؤپکلرین هاولاماسی

ساوالان زیروه سینده اولایان قوردلارین سسینی

ائی منیم آغ کؤینکلی، باشی طوفانلی ساوالانیم!

پارلا سونسوزا دک

ایشیق ساچ

سؤنسون وطنیمین بیاض کؤینه گینه لکه سالان کج باخیشلار

یاغدیر اود یاغمورلارینی ائی اودلار دیاری آزربایجان

یانسین آغ ووجودونا اوزانان کیرلی بارماقلار

اولا ائی منیم اوجا داغیم اولا

اولا یانکیلانان ووقارین

ییرتسین کوستاحلیغین قولاق پرده سینی

اولا جسارتیندن قوپان فیرتینالار

سیندیرسین تمیزلیگینه مئیدان اوخویان

کیرلی بارماقلارین جهالتینی

اولا ائی ساوالان اولا

دیک دورسونلار آزربایجانین ایگیدلری

اوخوسونلار قارانلیغا قورخو سالان

اؤزگورلوک نغمه لرینی

اولا ائی شانلی ساوالان اولا

سوسدورسون گئچمیش تاریخیمیزین سسی

آلچاق کؤپکلرین ایرگنج سسلرینی

Share/Save/Bookmark