"بۇگون «آذربایجانین اۇرموداکی سسی»نین تؤرَنی گۆوَنلیک گۆجلرینین باسقیسییلا یاریدا قالدی"+ شکیللر
آذوح: بۇگون «آذربایجانین اۇرموداکی سسی» قۇرومو بیر تؤرن داها کئچیرمیش و بۇ تؤرن گۆوَنلیک گۆجلرینین باسقیلاری اۇجباتیندان ياریمچیق قالمیشدیر.
بۇ اوْتورومدا «آذربایجانین اۇرموداکی سسی» قۇرومونون آماجلاری و دستکلهدییی آدايلار اۆزَرینده دانیشیقلار اوْلموشدور.
اوْتورومون باشلانغیجیندا «آذربایجانین اۇرموداکی سسی»نین باش يازمانی اۇرمو بیلیميوردو اؤيرنچیسی «ياسیر رنجبری(ساوالان)» قۇرومون سؤيلمی ایله ایلگیلی دانیشمیش و بۇ قۇرومون سئچکیلر دؤنمی آذربایجان میللی حرکتی سؤيلمی اۇغروندا آتدیغی آددیمدان سؤز آچاراق «آذربایجان میللی حرکتیندن سئچکیلر اۇغروندا دئيیل، سئچکیلردن آذربایجان میللی حرکتی اۇغروندا يارارلانمالیيیق» دئيه آچیقلاما ياپمیشدیر. بۇ اؤيرنچی ائلهجهده اۇرمو بیلیميوردوندا سئچکیلر قاباغی میللتچی اؤيرنچیلره قارشی يۆرودولن سیاست و باسقیلاردان دا سؤز آچمیشدیر.
آردیندا «آذربایجانین اۇرموداکی سسی»نین باش يؤنَلدیجیسی «سینا حسنی» بۇ قۇرومون دانیشیغا گیردییی آدايلاردان دانیشمیش و دستکلنَن آدايلار اۆزَرینده اینجلهمه ياپمیشدیر. ائلهجهده بۇ فعال، بۇ قۇرومون قۇروجولارینین گنج و اؤيرنچی اوْلدوغوندان دوْلايی، گنج فعاللارین آذربایجان میللی حرکتیندهکی اؤنَمینی وۇرغولامیش و سئچکیلر دؤنَمی بۇ قۇروم فعاللارینین آذربایجان میللی حرکتی سؤيلهمینی يايماقدا ائتکیلی داورانیشیندان سؤز آچمیشدیر.
تؤرَن سۆردورولورکن بیر بؤلوم گۆوَنلیک گۆجو سیتادین قاپیسینین قاباغیندا توْپلانمیش و قاتیلیمچیلار آراسیندا قوْرخو فضاسی ياراتماغا چالیشمیشدیر. سوْنراسی بیرنئچه شخصی گئيیملی گۆوَنلیک گۆجو ایچَری گیرمیش و تؤرَنین قۇروجولاریندان «بۇ تؤرَن مجوزلیدیر» سؤزونو ائشیتدییینه باخماياراق قۇروجولاری باسقیلامیش و تؤرن ياریمچیق سوْنا چاتمیشدیر.
@azerbaycaninurmudakisesi
آذوح
