سئچگی لره گئت میریک  ـــ  دوُشمانا سئس وئرمیریک

نوبتی اوُلاراق یئنه ده ایران آدلانان یئرده  قوندورما "سئچگیلر" تئاتری نین گوُلونج نمایش لری و جیناحلار آراسی مصنوعی توققوشمالاری ، گاه ضعیف گاه شیدتلی شئکیلده باشلانماقدا دیر. هئرنوبه ده اوُلدوقو کیمی یئنه ده رژیمین رسوای اوُلموش اوُغرو ، تروریست حزب الله مافیا گروپلاری ، باشدا خامنه ای باندی اوُلماقلا ، آلدادیجی و باشدان آیاقا یالان وعده لرله منبرلرده ، مسجید لرده تلویزیون شوولاریندا موعظه لره باشلییب ، آج ، مُحتاج ایش سیزکوتله لرین بئینلرین اوُیدوروجو سوُزلرله  قاباقجادان  یوماقا و قارشیدان گئلن انتصابات تئاترینین نمایشنامه سینه  حاضیرلییب ، اوُنلاری صاندیق لارین آیاقینا چئکمئگ اوُچون دورمادان چالشیرلار .

آنجاق ایندی دن گوُرونور کی بودفعه کی اوُیون کئچمشلردن چوُخ فرقلی و رژیم اوُچون تهلیکه لی اوُلاجاق ، بوگوُن ایران دئیلن یئرده یاشییان چئشیدلی میللت لرین گئنج نئسیل لری ساده لیکله رژیمین چیرکین اوُیونلارینا آلت اوُلمییاجاقلار . یئنی نئسل هئرهانسی میللت دن اوُلورسا اوُلسون 34 ایللیک پروسئسده  فارس راسیسمی نین وعمامه لی و یا عمامه سیز اوُغرولارین جور به جورحیله کارلیق لارین دفعه لرله گوُروب تجروبه اتمیشلر، و اوُنلارین چئشیدلی حیله گرلیک لری ایله تانیش دیرلار.

چوُنکی بو گوُنه قدر رژیمین هئچ بیر قدر قوندارما سئچگی لری اوُلکه ده یاشییان چئشیدلی میللت لرین ایراده سی و سئسی ایله اوُلما میشدیر، ایلک گوُندن " ایسلام ناب محمدی" شعاری ایله اساسی قوُیولان رژیم ، بو سیلاح دان سوء ایستفاده اتمئکله ، تام حیله کار اوُیونلارلا ، ماکیاویلیسم شیوه لرینه دایاناراق ، اوُلکه ثروت لرینین اصلی صاحیب لری اوُلان آیاق یالین لارا قارشی خئیانت ، میللی ثروت لری غارت اتمئک ، أللری قابارلی زحمتکش لرین سفره لریدن چوُرئگ لرین قاپماق  ، اینسانلاری محتاج حالا سالماق، و حاقلی اعتراض سئس لرین ، بوُغازلاریندا بوُغماق ، بو رژیمین گوُنده لیک وظیفه سینه و هدفینه چئوریلمیشدیر .

نتیجه ده حوُققا باز، حیله گر آیت الله لار مولتی میلیاردرلر اوُلماقلا ، یاراددیقلاری قانلی شریعت رژیمی " قاچاقچیلارین ، جینایتکارلارین ، حزب الله مافیالارینین وتروریست لرین بهشتینه چئوریلمیشدیر"

مافیا گروپلاری نین باشیندا دوران و اوُنلاری هدایت ائدن ، شخصن خامنه ای دیر.

اوُلکه نین توُکنمز ثروت  منبع لرین أله کئچیره ن ،  مولالار و اوُنلارین توره مه لری ، و یا اوُنلارا خیدمت ائدن ، أللری قانلی نوکرلری ، أمرقوللاری ، اطلاعات مأمورلاری ،  پاسدارلار ، بسیجی لر ، ساده لیکله مقاملارین واوُغورلوق منبع لرین ، ترک ائدیب ألدن وئرمئگ ایسته مزلر، بوساتیلمیش عنصرلرهئر زاماندا اوُلدوقو کیمی صمیمییت له !  خامنه ای نین یئنی ، نوبتی شئیطان اوُیون لارین ایجراء اتمئگ اوچون ، قوُیون کیمی باشلارین آشاغی سالیب چوبانین أمرینه باش أئیب ، پول آلیب ، ایطاعت اتمئک مجبورییتینده دیلر. 

آنجاق گوُرونورکی بودفعه کی تئاترکئچمیش لره بئنزراوُیونلاردان فرقلی دیر ، چونکی ایران دئیلن یئرده یاشییان میللت لر، ویلایت فقیه رژیم نین کوُکودن دئوریلمه سین و یوُخ اوُلماسین ایسته یرلر، هئله قالسین کی یالانچی ایصلاحاتلارینا و یا حیله کار وعده لرینه هئچ اینانمیرلار. بونو حزب الله مافیا گروپ لاری اوُلان جانیلرده بیلیرلر. رژیم بیلیر کی هئر جور "ایصلاحات" اوُنون دئوریلمه سی ایله برابراوُلاجاق ، و بیزقارشیدان گئلن یاخین گوُنلرده بوُیوک حادیثه لره شاهید اوُلاجاییق . 

بونا گوُره ده قارشیدان گئلن حساس گوُنلرده ، گوُنئی آذربایجان میللتی نین داخیلده وخاریجده اوُلان میللی تشکیلات لاریمیز و میللی آکتیویست لریمیزین قارشی لاریندا چوُخ اوُنئملی وتعیین ائدیجی وظیفه لرقرارتوتور. میللی تشکیلات لاریمیزآراسیندا داها آرتیق بیرلیگین یارانماسی أن اوُنئملی مسئله میزدیر. ألبته کی میللی مجادیله نین تاکتیک وعمل شیوه لری داخیلده اوُلان میللی حرکت فعاللاری میزین ایراده سیندن آسیلی دیر. آنجاق قوندارما سئچگی لرین قارانلیق ماهییتین آچیب ایفشاء ائدیب گوُسترمئک ، و بوگوُنه قدراوُلدوقو کیمی ، بوندان سوُنرا دا آذربایجان میللتینه هئچ بیر فایداسی اوُلمادیقین ، آچیقلییب ، بیلدیرمئیمیزلازیم دیر. اونودمییاق کی رژیم بوحساس گونلرده جوربه جور داخیلی و خاریجی بحرانلارایچینده چیرپینماقدا ، و بحرانلاردان قورتارماق اوُچون چاشغینلیق ایچینده  چابالاماقدا دیر.

                      ویلایت فقیه رژیمینده آزاد اینسان اوُلماقین معناسی یوخدور.    

بیر ــ  ولایت مطلقه فقیه قورقوسوندا مللت دئیمی نین مهفومو اوُلماز ، جامعه ده یاشییان اینسانلار بوتوُنلوکله ولی فقیه آدلانان شخصین کوُله لری و ایسلامین ایختیارسیز اوُمّت لری حئساب اوُلونارلار. بئله اوُلدوقو حالدا پارلمانین سئچگی نین ده میللت لر اوُچون هئچ بیر معناسی و مفهومو اوُلماز .

تکنولوژی دوُنیاسیندا ، میللت لرین گوُنده لیک یاشام طرزی نین ایره لییه دوغرو آددیم لار آتدیقی بیر زاماندا ، ولایت فقیه قورقوسوآذربایجان زحمتکشلرینه ، ایشچیلرینه ، کئندچیلرینه ، اوُیرنجیلرینه ، قادینلارینا وهئرجهت دن یوخسول لاشدیریلمیش میللتیمیزه نه قازاندیراجاق ؟ یعقین کی هئرزاماندا اوُلدوقو کیمی بوُیوک بیرهئچ ! میللتی میزین طبیعی حاققی اوُلان ، کوُرپه اوشاغلاریمیزاوُچون ابتدائی اوُخولدان ، اونیورسیتیه قدر اوُز آنا دیللرینده مدرسه لری اوُلاجاق می ؟ عائله لرین حئیاتین جهنمّه چئویره ن باهالیقا قطعی چاره اوُلوناجاق می ؟ زیندان لاردا اشکنجه لره معروض قالان اینسانلاری سوُرغوسوز، سئوال سیز آزادلیق ائده جئکلرمی ؟ اورمو گوُلوموزون غصب اوُلونموش سولاری اوُز طبیعی یاتاغینا دوُنه جئک مِی ؟  مطبوعات آزادلیقی و آذربایجان تورکجه سینده ژورنال ، گاذت ، کیتاب ،  فرهنگی ، ادبی ، نشریه لرآزاد ، سربست اوُلا بیله جئک لرمی ؟  آذربایجانین طبیعی ثروت لری نین غارت ائدیلمه سینه سوُن قوُیولاجاق می ؟ میللتیمیز بوتون غصب اوُلونموش طبیعی حاقلارین ألده بیله جئکلرمی ؟ یوخسا بو قوندارما انتصابات تکجه فاشیست رژیمه بیرداها برائت قازاندیرماق معناسیندا دئیرمی ؟ بئله اوُلدوقو حالدا ، قانلا بوُیانمیش میللی مجادیله نین وارلیغینا ضربه وورماق و شهید لریمیزین توُکولن قانلارین هئچه ساییب ،  اهانت ائدیب اوُنا اعتینا سیزلیق معناسیندا دئیرمی ؟

ایکی ــ رژیم هئر زاماندان داها آرتیق داخیلده و خاریجده اعتیبار و مشروعییتین ألدن وئرمیشدیر، بوسببدن بوُتون حیله کاراوُیونلارا أل آتماقلا جامعه ده یاشییان اینسانلارا یالان و ایچی بوُش وعده لر وئرمئکله اوُنلاری قاباقجادان ساختالانمیش صاندیقلارین آیاقینا چئکیب ، رأی لرین آلماق اوچون هئرجور حیله کار اوُیونلارا أل آتاجاقلار .

حتی رأی ورقه لرینده رژیم باشچیلارینا یاراشان  جور به جور توهینلرده یازیلسا ، اوُنا گوُز یوما جاقلار . چونکی تکجه هدف لری رأی آلماق و رأی حوزه لرین قالابالی گوُستریب ، اوُندان فیلملر چئکیب دونیایا گوُستریب ، اوُزلرینه برائت قازاندیرماق دیر .علاوه اوُلاراق پول وئریب سئچگیلره گئتیریلمیش لرین کیملیگینه «سئچگی ده ایشتراک ائدیب »  دامغا سینین یعنی" مهُرونون" وورولماسی  و شخصین آدی ، مشخصاتی ،  شیناسنامه سی نین سریال نمره سینین لیسته لرده قئید اوُلونماسی رژیم اوُچون اوُنئملی دیر. چونکی همان مشخصات و سریال نمره لری داها آرتیق شیشیردیب ، بوُیودوب ، بین الخالق تشکیلات لارا گوُسترمئکله ، بیرداها اوُز34 ایللیک جبّارلیقلارینا برائت و مشروعییت قازاندیرماق اوُچون چالیشاجاقلار . بو حقیقت لری دوُشونوب نظرده آلاراق ، بیزیم میللتیمیزه هئچ بیر فایداسی اوُلمییان سئچگی لری بایکوت ائدیب  و رد ائدیریک .

اوچ ــ بوتون بونلارا رغمن سپاه و اطلاعات صاندیقلاری ساختا کاغیذ لارلا دوُلدورماقا جهد گوُستره جئکلر، بوُنا گوره ده ایندی دن گئدیشات بونو گوُستریرکی رژیم گئله جئک هفته لر و گونلرده بوُیوک کوتله وی قیاملارلا اوُزلئشسین و "ایران آدلانان زینداندا یاشییان" میللت لرین قارشی سیندا عاجیز قالیب  گئت گئده مغلوب اوُلوب ، آددیم آددیم گئرییه چئکیلیب سقوط مرحله سینه چاتاجاقدر . یعنی هئر ایکی حالدا رژیم بوُیوک مغلوبییت له اوُزلئشه جئک ،  ایندیدن بئله بیرشوم سرنوشت له اوُزلئشئجئک لرین اوُزلریده بیلیرلر.  

دوُرد ــ 12 ایلدن آرتیق دیرکی روسیه ، چین ، شومالی کرُۀ و باشقا غارتچی فاشیست دوُولت لر ،  رژیمینین آتوم بوُمب ألده اتمه سی اوُچون گیزلی و یا آشکار شئکیلده اوُنا یاریملار ائدیرلر ، علاوه اولاراق بومقصد ایستقامتینده آوروپا ، لاتین آمئریکا ویا باشقا اوُلکه لرده اوُلان سیلاح مافیا لاریندان گیزلی شئکیلده یئنی تکنولوژیلر آلیب ، آتوم پروژه سین تکمیل لئشدیرمئگ اوچون جیددییت له فعالییت گوستریب یاردم اتمئکده دیرلر .

ایللردن بئری بیرلئشمیش میللت لرتشکیلاتینین آتوم انرژیسی شعبه سی وآمئریکا دوُولتی حاقلی اوُلاراق رژیمین گیزلی آتوم پروگراملارینا اعتراضلار ائدیب ، تحریم لره باشلامیشلار، آنجاق رژیم بوُتون اعتراضلارا سایمازیانا لیقلا یاناشاراق ، اوُنا قارشی دوُروب ، هئردفعه ده آلدادیجی اوُیونلارلا آتم فعالییت لرینه گیزلیجه داوام وئردیگی حالد ، بو فعالییت لرین "باریشجیل !! " اولدوقون گوُسترمئگه چالیشمیش دیر ، و یا کئچیریلن بوتون کنفرانسلاری ، دانیشیقلاری بوایلدن گئلن ایله ، بو آیدان گئلن آیا اوزاداراق ، اصلینده هم رژیمین عومرونون اوزادیلماسی و همده فعالییت لرینه واخت قازاندیرماق هدفی ایله اوُلموشدور، رژیم دوُنیا افکارعمومی سین آتم مسئله سی ایله مشغول ائدرکن ، اوُلکه داخیلینده دیسپوت جینایت لرینه داوام وئریب ، اینسان حاقلارین شیددت له پوُزماقدا و آردیجیل حبس لر اشکنجه لر، اعداملارا داوام وئرمئکده دیر .

رژیم ألده اتدیگی یئنی و مدُرن تکنولوژی لر وسیله سی ایله داخیلده اوُزاق مسافه لی سیلاحلار ایستحصال اتمئگه باشلییب و اوُنلاری داغلارین درینلیکلرینده چوُخ دیققتلی شئکیلده ساخلییب محافظت اتمئکده دیر.

میللته گوُز داغی وئرمئگ اوچون بو سیلاح لاری آرا سیرا آمبّارلاردان چیخاریب بسیجیلر و پاسدارلار وسیله سی ایله ، رژه مئیدانلاریندا نمایش وئریب ، میللتی قورخودماق و رژیمین فاشیست اعمالی قارشیسیندا تسلیم اتمئک اصلی هدف لریندن دیر.             

بئش ــ  کئچمیش پهلوی رژیمی نین توُرتوُکوُنتوُلری ، فارس پان ایرانیست راسیستلری و اوُنلارین نشر اتدیکلری ، گاذت لر ، ژورنال لار ، رادیو و تلویزیون وئرلیش لرینده "ایران" دئیلن یئرده یاشییان میللت لری آلدادماق اوُچون ، هئله ده اوتانمادان فارس راسیسمی نین 90 ایلیک جینایت لرین اینکار ائدرکن ، غیر فارس میللت لرین طبیعی میللی حاق لاریندان بیر کلمه ده  نه دانیشیرلار، نه ده یازیرلار! بعضن تهران رژیمینه بوُش ـ بوُش سوُزلر دئسه لرده ، باطینده همان جینایتکارموللالارو یئنی میلیاردر اوُلموش پاسدارلارلا دوُستلوق ، ایرتباط و گیزلی واسیته چیلیک آلیش وئریش لری وار.

گوُنئی آذربایجان میللتی و باشقا میللت لرین اوُیانیشی و آزادلیق ، ایستقلال مجادیله سی مطرح اوُلدوقو زامان ، بوُتون شوینیست لر بیرلئشیرلر و هئچ اوتانمادان تام حئیاسیز جاسینا بیرمعنالی شئکیلده تهران رژیم نین آرخاسیندا دوُروب ، ایچی بوُش تحلیل لر وئرمئکله  نهایت درجه آلچاقلیق سویه سینه سقوط ائدرکن ، حتی اعتراف ائدیرلرکی ظولمه معروض قالمیش میللت لراوُز میللی حاق لارین ألده اتیکلری حالدا ، گئدیب خامنه ای نین ألیندن اوُپمئگی و توُبه اتمئگه ده حاضیراوُلدوقلارین آچیقجاسینا تلویزیندان لاریندان اعلان ائدیب ، فاشیست ماهییت لرینه اعتراف ائدیرلر ! ؟ 

آنجاق رنگارنگ پان ایرانیست لرین بوتون تخریبات لارینا رغمن ،  گونئی آذربایجان میللتی نین میللی آزادلیق ، قورتولوش  مجادیله سی اوُز یوِلوندا داوام اتمئکده دیر. بومجادیله کئچمیشلره بئنزرحرکت لردن اساسی شئکیلده فرقلی دیر، گوُنئی آذربایجان میللتی نین بوگوُنکو اوُیانیش و حرکاتی نین بیرداها گئرییه دوُنوش یوُلو یوخ دور، چوُنکی بو حرکاتی رهبرلیگ ائدنلر، آذربایجانین اوُیانمیش  آییق ـ ساییق یئنی ضیالی گئنج نئسیلی و زحمتکش کوُتله لری ، قهرمان زحمتکش لر، جسارتلی شرفلی   قادینلار، آکتیوفداکاراینسانلاردیر، اوُسته لیک بو میللی مجادیله میزین غلبه سی نتیجه سینده "ایران" دئیلن یئرده یاشییان بوتون میللت لرین ده آزادلیقینا و قورتولوشا دوُغر یوُللاری آچیلاجاق و فارس راسیسمی نین 90 ایللیک چئشیدلی حیله کارلیق لارینا ، وحشی جینایت لرله دوُلوعوُمرونه سوُن قویولاجاق  .

قوندارما سئچگی تئاترینا گئلدیکده ، تهران رژیمی باشدا خامنه ای اوُلماقلا ، قاباقجادان معیین اوُلونموش ، هئرهانسی بیر شخصین آدین توُربادان چیخاریب ، اوُنو "یوکسئک سئس قازانمیش ! ؟ " و غالیب شخص کیمی گوُستره جئکلر . آنجاق "سئچگی" تئاتری پروسئسینده هئرهانسی فوق العاده حادیثه باش وئردیکده  ؟ ! اوُنومهار اتمئکده اوُ قدر قولای اوُلمیاجاق و نهایت ده سوُنوج نه اوُلورسا اوُلسون ، رژیم ایندی دن ایکی یوُل آیریجیندا قرار توتوب ، بو انتصابات دان سوُنرا یا داها سرت و آشیری فاشیست موقعی توتاجاق !؟ و یا اوُز مهُره لریندن بیر چوخون قوربان وئرمئکله میللت لرین قارشیسیندا دیزه چوکوب ، گئرییۀ چئکیلمئگه مجبور اوُلاجاق . هئر ایکی حالدا ایسترداخیلده و یا خاریجده اوُلان میللی تشکیلات لاریمیز، هم سئچگیدن قاباق وهم سئچگیدن سوُنراکی شرایط اوُچون ایندی دن دوُشونوب حاضیرلیقـلی اوُلمالییق .

 آزادلیق ، قورتولوش ،  ایستقلال اوُچون ، اوُره یمیز ، سوُزوموز ، میللتیمیزله  بیرگه اوُلمالی دیر.    

                         یاشاسین آذربایجان ، یاشاسین بیرلی یمیز ، یاشاسین ایستقلال .                

                    گوُنئی آذربابایجان سوسیال دموکرات پارتیسی ـ آذرخش ـ 17 / 2 / 1392